மாதம் ரூ.35,000 வருமானம் தரும் எக்ஸ்! கேம்பஸ் இன்டர்வியூ எல்லாம் வேஸ்டு...

21 வயதான பொறியாளர் கனவ், எக்ஸ் சமூக வலைத்தளத்தின் மூலம் மாதம் ₹35,000-க்கு மேல் சம்பாதிக்கிறார். இந்த வருமானம் அவரது கல்லூரி கேம்பஸ் இன்டர்வியூ வேலையில் கிடைக்கும் சம்பளத்தை விட அதிகம் என்பது குறிப்பிடத்தக்கது.

எக்ஸில் மூலம் வருமானம்

இன்றைய இளைஞர்களின் திறமையின் அடையாளம் சமூக ஊடகங்கள். பல இளைஞர்கள் சமூக ஊடகங்கள் வழியாக பிரபலமாவது மட்டும் அல்லாமல் நல்ல வருவாயும் ஈட்டி வருகின்றனர். இந்த வரிசையில் தற்போது ஒரு புதிய இளைஞர் சேர்ந்துள்ளார்.

21 வயதான பொறியாளர் கனவ், சமூக ஊடக தளமான எக்ஸ் சமூக வலைத்தளத்தின் மூலம் ஒரு மாதத்திற்கு ₹35,000-க்கு மேல் வருமானம் ஈட்டி வருவதாகக் கூறியுள்ளார். ஜூலை மாதம் ₹35,000-க்கு மேல் வருமானம் ஈட்டியதாகவும், ஆகஸ்ட் மாதம் ₹32,000-க்கு மேல் வருமானம் ஈட்டியதாகவும் கனவ் தெரிவித்துள்ளார்.

ஜூலை 5 முதல் ஆகஸ்ட் 30 வரை, எக்ஸ் தளத்தின் மூலம் ₹67,420 வருமானம் பெற்றதற்கான ஸ்கிரீன்ஷாட்களையும் அவர் பகிர்ந்துள்ளார். இந்த வருவாய், ஐந்து தவணைகளில் வழங்கப்பட்டுள்ளது. இதில் ஒரு தவணையின் மிகப்பெரிய தொகை ₹21,097 ஆகும்.

கேம்பஸ் இன்டர்வியூ வேலையை விட அதிக சம்பளம்

"எக்ஸ் தளத்தில் பதிவிடுவதன் மூலம், சராசரி வளாக நேர்காணலில் கிடைக்கும் வருமானத்தை விட அதிகமாக சம்பாதிப்பதாக கனவ் கூறுகிறார். மேலும், தான் இந்த தளத்தில் பதிவிடத் தொடங்கி இரண்டு மாதங்கள் மட்டுமே ஆவதாகவும் அவர் குறிப்பிட்டுள்ளார்.

அவர் பகிர்ந்துள்ள தகவலின்படி, அவரது கல்லூரியில் சராசரி வளாக நேர்காணல் மூலம் ஆண்டுக்கு ₹2.9 லட்சம் வருமானம் கிடைப்பதாகவும், அதிகபட்சமாக ₹5 லட்சம் மற்றும் குறைந்தபட்சமாக ₹1 லட்சம் வருமானம் கிடைப்பதாகவும் அவர் தெரிவித்துள்ளார். இந்த தகவல்கள், சமூக ஊடகங்களில் உள்ளடக்கத்தை உருவாக்குவதன் மூலம் விரைவாக எப்படி வருமானம் ஈட்ட முடியும் என்பதைத் தெளிவாகக் காட்டுகிறது.

எக்ஸ் சமூக ஊடகத் தளத்தில் வருமானம் ஈட்டுவது எப்படி? எக்ஸ் தளத்தின் கிரியேட்டர் வருவாய் பகிர்வு திட்டம் மூலம் வருமானம் ஈட்டலாம். இந்த திட்டம் உலகளவில், குறிப்பிட்ட தகுதிகள் உள்ள உள்ளடக்க உருவாக்குநர்களுக்குக் கிடைக்கிறது.

எக்ஸ் மூலம் சம்பாதிக்க…

எக்ஸ் தளத்தில் பிரீமியம் அல்லது வெரிஃபைடு அக்கவுண்ட் வைத்திருக்க வேண்டும். கடந்த மூன்று மாதங்களில் குறைந்தது 50 லட்சம் ஆர்கானிக் இம்பிரஷன்ஸ் (Organic Impressions) இருக்க வேண்டும்.

குறைந்தபட்சம் 500 வெரிஃபைடு ஃபாலோயர்கள் இருக்க வேண்டும். எக்ஸின் பயனர் ஒப்பந்தத்திற்கு உட்பட்டு, ஒரு குறிப்பிட்ட நாட்டில் இருக்க வேண்டும்.