நிஜமான படமா, ஏ.ஐ கிராபிக்ஸா? வாட்ஸ்அப் சேனல்களில் புதிய ஏ.ஐ லேபிள் முறை அமல்!

வாட்ஸ்அப்-ல் பகிரப்படும் புகைப்படங்கள், வீடியோக்கள் ஏ.ஐ மூலம் உருவாக்கப்பட்டவையா? எடிட் செய்யப்பட்டவையா? என்பதைப் பயனர்கள் எளிதாகக் கண்டறியும் வகையில், ஏ.ஐ. கன்டென்ட் லேபிள் என்ற புதிய வசதியை வாட்ஸ்அப் சோதனை முறையில் அறிமுகப்படுத்தி வருகிறது.

வாட்ஸ்அப்பில் இனி போலிக்கு இடமில்லை!

இணையத்தில் நாம் பார்க்கும் புகைப்படங்களும் வீடியோக்களும் உண்மையா? ஏ.ஐ மூலம் உருவாக்கப்பட்ட போலியா என்று பிரித்தறிய முடியாமல் திணறும் காலம் இது. அந்த அளவிற்கு ஏ.ஐ தொழில்நுட்பத்தின் ஆதிக்கம் நாளுக்கு நாள் அதிகரித்து வருகிறது. இதற்குத் தீர்வு காணும் வகையில், உலகின் முன்னணி தகவல் தொடர்பு செயலியான வாட்ஸ்அப் ஒரு அதிரடியான புதிய அம்சத்தைக் களம் இறக்குகிறது.

வாட்ஸ்அப் சேனல்களில் பகிரப்படும் ஒரு புகைப்படம் அல்லது வீடியோ ஏ.ஐ மூலம் உருவாக்கப்பட்டதா? மாற்றியமைக்கப்பட்டதா? என்பதை பயனர்கள் நொடியில் கண்டறிய 'ஏ.ஐ. கன்டென்ட் லேபிள்' (AI Content Label) என்ற புதிய வசதியை வாட்ஸ்அப் படிப்படியாக அறிமுகப்படுத்தி வருகிறது.

எப்படிச் செயல்படும் இந்த புதிய அம்சம்?

நிர்வாகிகளுக்கான கட்டுப்பாடு:

வாட்ஸ்அப் சேனல் நிர்வாகிகள் தங்களது சேனல்களில் ஏதேனும் புகைப்படம் அல்லது வீடியோவைப் பதிவிடும்போது, அது ஏ.ஐ மூலம் உருவாக்கப்பட்டிருந்தாலோ அல்லது எடிட் செய்யப்பட்டு மாற்றப்பட்டிருந்தாலோ, அதற்கான 'ஏ.ஐ கன்டென்ட் லேபிளை' அவர்களே சுயவிருப்பத்துடன் இணைக்க முடியும்.

நீக்கவே முடியாது:

இதில் மிக முக்கியமான விஷயம் என்னவென்றால், ஒருமுறை அந்தப் பதிவுக்கு 'ஏ.ஐ லேபிள்' சேர்க்கப்பட்டு உறுதி செய்யப்பட்டுவிட்டால், அதன்பிறகு அந்த லேபிளை யாராலும் நீக்க முடியாது. இதனால் போலியான பதிவுகள் மூலம் மக்களைத் தவறாக வழிநடத்துவது தடுக்கப்படும்.

சட்ட நடைமுறைகளுக்கு ஏற்ப மாற்றம்:

உலகில் உள்ள சில நாடுகளில் ஏ.ஐ மூலம் உருவாக்கப்பட்ட உள்ளடக்கங்களை வெளிப்படையாக அடையாளப்படுத்துவது சட்டப்படி கட்டாயமாக்கப்பட்டுள்ளது. அதற்கேற்ப சேனல் நிர்வாகிகளுக்கு இதுகுறித்த முறையான அறிவிப்புகளையும் விழிப்புணர்வையும் வாட்ஸ்அப் வழங்கி வருகிறது.

யாருக்கெல்லாம் இப்போது கிடைக்கும்?

இந்த புதிய வசதி தற்போது ஆரம்பக்கட்ட சோதனை முறையில் உள்ளது. முதற்கட்டமாக, ஆண்ட்ராய்டு பீட்டா (Beta) சோதனைப் பதிப்பில் குறிப்பிட்ட சில பயனர்களுக்கு வழங்கப்பட்டு வந்த நிலையில், தற்போது ஐபோன் (iOS) பீட்டா பயனர்களுக்கும் இந்த வசதி விரிவுபடுத்தப்பட்டுள்ளது.

அனைத்து பொதுப் பயனர்களின் பயன்பாட்டிற்கும் இந்த அம்சம் எப்போது அதிகாரப்பூர்வமாக வெளியாகும் என்பது குறித்த தேதியை வாட்ஸ்அப் நிறுவனம் இன்னும் அறிவிக்கவில்லை. எனினும், சோதனை ஓட்டங்கள் முடிவடைந்ததும் படிப்படியாக உலகெங்கிலும் உள்ள அனைத்துப் பயனர்களுக்கும் இது பயன்பாட்டுக்கு வரும் என்று எதிர்பார்க்கப்படுகிறது. இனி வாட்ஸ்அப் சேனல்களில் வரும் ஏ.ஐ வித்தைகளைச் சாமர்த்தியமாகக் கண்டறிந்துவிடலாம்!