500 ஆண்டுகளுக்கு பின் வெடித்த ரஷ்ய எரிமலை: விண்வெளியில் இருந்து துல்லியமாக படம்பிடித்த ‘நிசார்’ செயற்கைக்கோள்!

ரஷ்யாவின் கம்சட்கா தீபகற்பத்தில் சுமார் 500 ஆண்டுகளாகச் செயலற்றுத் தூங்கிக்கொண்டிருந்த 'கிராஷெனின்னிகோவ்' எரிமலை, ஜூலை 2025-இல் ஏற்பட்ட 8.8 ரிக்டர் நிலநடுக்கத்திற்குப் பிறகு மீண்டும் வெடிக்கத் தொடங்கியது.

500 ஆண்டு தூக்கம் கலைந்தது... ரஷ்ய எரிமலையின் அதிபயங்கரம்!

கிட்டத்தட்ட 500 ஆண்டுகள்... எந்தச் சலனமும் இன்றி ஆழ்ந்த உறக்கத்தில் கிடந்த ஒரு ராட்சத எரிமலை திடீரெனக் கண்விழித்து நெருப்பைக் கக்கினால் எப்படி இருக்கும்? அதுவும், யாரும் எட்டிப்பார்க்கவே முடியாத பூமியின் மூலையில் நிகழும் அந்தப் பேரதிசயத்தை, விண்வெளியில் நின்றுகொண்டு துளி விடாமல் ஒரு கேமரா நேரலையாகப் பதிவு செய்தால்? அப்படி ஒரு மெய்சிலிர்க்க வைக்கும் காட்சியைத்தான் இந்தியா - அமெரிக்க கூட்டுத் தயாரிப்பான ‘நிசார்’ (NISAR) செயற்கைக்கோள் துல்லியமாகப் படம்பிடித்து உலகையே வியப்பில் ஆழ்த்தியுள்ளது.

தூங்கிக்கொண்டிருந்த பூதம் விழித்தது எப்படி?

ரஷ்யாவின் மிகத் தொலைதூரக் கடுமையான பனிப் பகுதியான கம்சட்கா தீபகற்பம் (Kamchatka Peninsula). அங்குள்ள ‘கிராஷெனின்னிகோவ்’ (Krasheninnikov) என்ற எரிமலை, கி.பி. 1550-ஆம் ஆண்டிற்குப் பிறகு எந்தவிதச் சத்தமுமின்றி அடங்கிக் கிடந்தது.

ஆனால், கடந்த 2025 ஜூலை 30 அன்று பசிபிக் பெருங்கடலில் 8.8 ரிக்டர் அளவில் ஏற்பட்ட பயங்கர நிலநடுக்கம், பூமிக்கடியில் தூங்கிக்கொண்டிருந்த அந்த ராட்சத எரிமலையை உசுப்பிவிட்டது. அடுத்த சில நாட்களிலேயே, அரை நூற்றாண்டு கால அமைதியை உடைத்துக்கொண்டு செந்நிற லாவா குழம்புகளை வானத்தை நோக்கி உமிழத் தொடங்கியது.

விண்வெளியில் இருந்து ஒரு ‘டைம்லேப்ஸ்’ மேஜிக்!

பூமியிலிருந்து சுமார் 747 கிலோமீட்டர் உயரத்தில் மிதந்துகொண்டிருந்த நாசா - இஸ்ரோவின் கூட்டுச் செயற்கைக்கோளான ‘நிசார்’, விண்ணில் ஏவப்பட்ட பிறகான ஆரம்பக் கட்ட சோதனைகளை முடித்துக் கொண்டிருந்த நேரம்... 2025 டிசம்பர் 25, கிறிஸ்துமஸ் நாளன்று இந்த எரிமலையின் முதல் பிரம்மாண்டப் புகைப்படத்தைப் பதிவு செய்தது.

அங்கிருந்து தொடங்கியது நிசாரின் வேட்டை! இரண்டு சுற்றுப்பாதை கோணங்களில் இருந்து ஆகஸ்ட் நடுப்பகுதி வரை எடுக்கப்பட்ட 17 ரேடார் படங்களை விஞ்ஞானிகள் ஒன்றாக இணைத்து 'டைம்லேப்ஸ்' (Time-lapse) வீடியோவாக மாற்றினர். அதில் தெரிந்த காட்சி அறிவியலாளர்களையே அதிர வைத்தது.

கொதிக்கும் லாவா குழம்பு முதலில் எரிமலையின் சிறிய உள் பள்ளத்தை (inner caldera) மெல்ல நிரப்புகிறது. அங்கிருந்து நிரம்பி வழிந்து, அடுத்திருந்த பிரம்மாண்டமான பெரு பள்ளத்திற்குள் அருவி போலப் பாய்கிறது. இறுதியாக, ஒரு ராட்சத விசிறியைப் போல விரிந்து, சுற்றியுள்ள நிலப்பரப்பு முழுவதும் பரவிப் பாய்கிறது. இதில் பிரதான லாவா கிழக்கு நோக்கி விரிய, மற்றொரு லாவா ஓட்டம் வடமேற்கு நோக்கி நகர்வதும் பதிவானது. மனித கால்களே பட முடியாத ஒரு பனி நிலப்பரப்பில் நடக்கும் இந்த நெருப்பு விளையாட்டை, விண்வெளியில் அமர்ந்து இவ்வளவு துல்லியமாகக் காட்டுவது அறிவியலின் அசுர சாதனை!

மேகங்களை ஊடுருவும் மைக்ரோவேவ் கண்கள்!

பொதுவாக விண்வெளி கேமராக்களுக்குச் சூரிய வெளிச்சம் வேண்டும்; அடர்ந்த மேகமூட்டம் இருந்தால் கீழே உள்ளதைப் பார்க்க முடியாது. ஆனால், நிசார் சாதாரணக் கேமரா அல்ல; அது சிந்தெடிக் அப்பர்ச்சர் ரேடார் (SAR) தொழில்நுட்பத்தில் இயங்கும் ஒரு கழுகு.

சூரிய ஒளியை நம்பாமல், பூமியை நோக்கித் தொடர்ந்து ஆயிரக்கணக்கான மைக்ரோவேவ் துடிப்புகளை (Microwave pulses) அனுப்பி, அவை மோதித் திரும்பி வருவதை வைத்தே படங்களை வரைகிறது. சுற்றியுள்ள பனி படர்ந்த பாறைகளை விட, கொதிக்கும் திரவ லாவா இந்த மைக்ரோவேவ் கதிர்களை முற்றிலும் மாறுபட்ட முறையில் பிரதிபலிப்பதால், ரேடார் படங்களில் அது ஒரு தங்கக் கோடு போல ஜொலிக்கிறது. இதில் பதிவாகும் ஒவ்வொரு புள்ளியும் (Pixel), தரையில் வெறும் 10 மீட்டர் x 10 மீட்டர் அளவிலான பரப்பளவையும் துல்லியமாகக் காட்டுகிறது.

உலகிற்கு ஏன் இது மிகப்பெரிய பொக்கிஷம்?

பூமிக்கு மேலே கடல் மட்டத்தில் உள்ள சுமார் 1,300 உயிருள்ள எரிமலைகளையும் பனி, மழை, மேகம், இரவு என எந்தத் தடையும் இல்லாமல் கண்காணிக்கக்கூடிய ஒரே விண்கலம் நிசார்தான். மேலும், விண்வெளியில் 'L-band' மற்றும் 'S-band' ஆகிய இரண்டு அதிநவீன ரேடார் அலைநீளங்களையும் ஒருசேரச் சுமந்து செல்லும் உலகின் முதல் சுதந்திர விண்கலமும் இதுவே.

12 நாட்களுக்கு 2 முறை, இவ்வளவு துல்லியமான உயர்தெளிவுத்திறனில் இயற்கை பேரிடர்களைத் தொடர்ந்து கண்காணிக்க முடிவது சாதாரண விஷயமல்ல; இது அறிவியலின் மாபெரும் மைல்கல் என்று சிலிர்ப்போடு கூறுகிறார் கார்னெல் பல்கலைக்கழகப் புவி இயற்பியலாளர் மேத்யூ பிரிட்சார்ட். எரிமலைகள் எப்போது வெடிக்கும், லாவா எந்தத் திசையில் பாயும் என்பதை முன்கூட்டியே கணித்து, மனித உயிர்களையும் பேரிடர் மீட்புக் குழுக்களையும் வழிநடத்த விண்வெளியில் இருந்து கிடைத்திருக்கும் ஒரு பிரம்மாண்ட 'மூன்றாவது கண்' தான் இந்த நிசார்.