செவ்வாய் கிரகத்தின் 20 கி.மீ உயரமுள்ள 'அர்சியா மோன்ஸ்' எரிமலைக்கு அருகில் 1,800 கி.மீ நீளமுள்ள விசித்திரமான பனிக்கட்டி மேகம் குறித்து ஐரோப்பிய விண்வெளி முகமையின் மார்ஸ் எக்ஸ்பிரஸ் விண்கலம் புதிய தகவலை வெளியிட்டுள்ளது.
செவ்வாய் கிரகத்தின் 'அர்சியா மோன்ஸ்' (Arsia Mons) எரிமலைக்கு அருகில் உருவாகும் விசித்திரமான மேகம் குறித்த புதிய ஆய்வு முடிவுகள் வெளியாகியுள்ளன. துகள்கள் (Dust) ஏதுமின்றி, நீராவியானது நேரடியாக பனிக்கட்டியாக மாறும் அரிய நிகழ்வு மூலம் இம்மாபெரும் மேகம் உருவாவதாக அறிவியல் மாதிரிகள் (Modeling) சுட்டிக்காட்டுகின்றன. கோள்களின் வளிமண்டலத்தில் இதுவரை பார்த்திராத புதிய செயல்முறை இதுவென்பது குறிப்பிடத்தக்கது.
24
தூசி இல்லாத பனிக்கட்டி மேகம்
செவ்வாய்க்கோளின் தெற்கு அரைக்கோளத்தில் வசந்த காலம் மற்றும் கோடைக் காலத்தில், தினமும் காலையில் 20 கி.மீ(சுமார் 12 மைல்) உயரமுள்ள அர்சியா மோன்ஸ் எரிமலையின் கீழ்நோக்கிய காற்றில் ஒரு வெள்ளை மேகம் தோன்றுகிறது. 'அர்சியா மோன்ஸ் நீள மேகம்' (AMEC - Arsia Mons Elongated Cloud) என்று அழைக்கப்படும் இந்த நீர்-பனிக்கட்டி மேகம், மிக விரைவாக ஆவியாகி மறைவதற்கு முன்பு சுமார் 1,800 கி.மீ (சுமார் 1,120 மைல்) நீளம் வரை நீள்கிறது. இது பிரிட்டன் நாட்டின் நீளத்தை விட கிட்டத்தட்ட இரண்டு மடங்காகும். செவ்வாயின் தூசி நிறைந்த காலத்தில் சில மாதங்களுக்கு தினமும் காலையில் இந்நிகழ்வு தொடர்கிறது.
பொதுவாக வளிமண்டலத்தில் நீர் ஆவி குளிர்ந்து, காற்றில் மிதக்கும் உப்பு, மகரந்தம், புகை அல்லது தூசி போன்ற நுண் துகள்கள் மீது படிந்துதான் மேகங்கள் உருவாகும். இது ‘ஹெட்டிரோஜீனியஸ் நியூக்ளியேஷன்’ (Heterogeneous Nucleation) என அழைக்கப்படுகிறது.
ஆனால், இந்த அர்சியா மோன்ஸ் மேகம் உருவாக எந்தவித தூசித் துகள்களும் தேவையில்லை எனப் பாரிஸில் உள்ள LMD/CNRS/சொர்போன் பல்கலைக்கழகத்தின் முன்னணி ஆய்வாளர் ஜார்ஜ் ஹெர்னாண்டஸ்-பெர்னல் (Jorge Hernández-Bernal) தெரிவித்துள்ளார்.
34
செவ்வாயின் தீவிர சூழல் அமைப்பு
பூமியில் அன்றாடம் நாம் காணும் ஈரப்பதத்தை விட 1,00,000 மடங்குக்கும் அதிகமான தீவிர ஒப்பீட்டு ஈரப்பதம் (Relative Humidity) இருக்கும்போது மட்டுமே இந்த ‘ஹோமோஜீனியஸ் நியூக்ளியேஷன்’ சாத்தியமாகும். செவ்வாயின் மெல்லிய வளிமண்டலமும், உயரமான எரிமலையும் இணைந்து காற்றை சில நிமிடங்களிலேயே பல கிலோமீட்டர் உயரத்திற்கு உயர்த்துகின்றன. இதனால் காற்று வெறும் 10 நிமிடங்களில் 30 டிகிரி வரை குளிர்ந்து ஈரப்பதம் மிகக் கடுமையாக உயர்கிறது.
ஐரோப்பிய விண்வெளி முகமையின் (ESA) மார்ஸ் எக்ஸ்பிரஸ் (Mars Express) விண்கலம் 2018-ல் இந்த மேகத்தைக் முதன்முதலில் கண்டுபிடித்தது. அதிலுள்ள விசுவல் மானிட்டரிங் கேமரா, ஹை-ரெசல்யூஷன் ஸ்டீரியோ கேமரா மற்றும் OMEGA ஆகிய 3 கேமராக்களின் தரவுகள் மற்றும் 'எக்ஸோமார்ஸ் டிரேஸ் கேஸ் ஆர்பிட்டர்' உதவியுடன் காலை நேரத்தில் இந்த மேகத்தின் மாற்றங்கள் தொடர்ந்து கண்காணிக்கப்பட்டு ஆய்வு செய்யப்பட்டுள்ளன.
பாடப்புத்தகங்களில் வெறும் கோட்பாடாக மட்டுமே கருதப்பட்டு, இயற்கையில் நடக்காது என்று நினைக்கப்பட்ட இந்த இயற்பியல் விதியைத் (Exotic Physics) தங்கள் கணினி மாதிரிகளில் (Simulations) சேர்த்த பின்னரே, மார்ஸ் எக்ஸ்பிரஸ் விண்கலம் பார்த்த அதே மேக அமைப்பை விஞ்ஞானிகளால் உருவாக்க முடிந்தது.
இந்தக் கண்டுபிடிப்பு செவ்வாய் கிரகத்தைப் பற்றிய புரிதலை மட்டுமன்றி, பிரபஞ்சத்தின் பிற வேற்றுக்கோள்களின் (Exoplanets) வளிமண்டலத்தையும், அங்கு மேகங்கள் உருவாகும் முறையையும் ஆய்வு செய்ய விஞ்ஞானிகளுக்குப் புதிய பாதையை அமைத்துக் கொடுத்துள்ளது. இந்த ஆய்வு முடிவுகள் 'நேச்சர் ஜியோசயின்ஸ்' (Nature Geoscience) இதழில் (அக்டோபர் 7, 2026) வெளியாகியுள்ளன.
ஸ்மார்ட்போன்கள் மற்றும் AI முதல் சைபர் பாதுகாப்பு, அறிவியல் முன்னேற்றங்கள் வரை — சமீபத்திய தொழில்நுட்ப (Technology News in Tamil) அப்டேட்களை தொடர்ச்சியாக பெறுங்கள். டிஜிட்டல் டிரெண்ட்ஸ் குறித்து நிபுணர்களின் கருத்துகள், விரிவான தகவல்கள் மற்றும் பிரேக்கிங் நியூஸை வழங்கும் ஒரே தளம் ஏஷ்யாநெட் தமிழ் நியூஸ்.புதிய கேஜெட் ரிலீஸ் ஆனதா? புதிய ஸ்டார்ட்அப்புகள் வந்தவையா? எதிர்காலத்தை மாற்றக்கூடிய எந்த டெக் பாலிஸி வந்துள்ளது? இவை அனைத்திற்கும் சிறு சிறு தகவல்கள் இங்கு கிடைக்கும். டெக் விளக்கக் குறிப்புகள் மற்றும் கேஜெட் டெமோ வீடியோக்களையும் நீங்கள் பார்க்கலாம்.
