தவெக வரலாறு படைக்கும்.. விஜய் தான் அடுத்த சி.எம்! செங்கோட்டையன் சூளுரை!

விரைவில் அரசியல் சூழலில் மாற்றம் ஏற்படும் என்று கணித்த செங்கோட்டையன், அடுத்த சில மாதங்களில், அதிகாரிகள்கூட தவெக-வின் வளர்ந்து வரும் செல்வாக்கை அங்கீகரிப்பார்கள் என்றார்.

செங்கோட்டையன் பேச்சு

சென்னையில் நடந்த கூட்டத்தில் உரையாற்றிய செங்கோட்டையன், ''இந்த கூட்டத்தில் எந்த செலவும் இல்லாமல் பெருமளவில் மக்கள் பங்கேற்றது. தவெக இயக்கத்தின் வளர்ந்து வரும் வலிமையைப் பிரதிபலிக்கிறது. இன்று இங்கு கூடியுள்ள கூட்டம், 2026-ல் தவெக-வுக்கு ஒரு வரலாற்று வெற்றி உருவாகி வருவதைக் காட்டுகிறது.

மக்கள் வைத்துள்ள நம்பிக்கை

கோடிக்கணக்கில் செலவு செய்து கூட்டங்களைக் கூட்டும் மற்ற அரசியல் இயக்கங்களைப் போலல்லாமல், தவெக நிகழ்விற்கு ஆயிரக்கணக்கான மக்கள் தானாக முன்வந்து கூடியிருக்கின்றனர். இது, தமிழ்நாட்டில் ஊழலற்ற ஆட்சியை வழங்குவதாக விஜய் அளித்த வாக்குறுதியின் மீது மக்கள் வைத்துள்ள நம்பிக்கையை வெளிப்படுத்துகிறது' என்றார்.

விஜய்யின் சக்தி

234 சட்டமன்றத் தொகுதிகளிலும் வேட்பாளர்களை அடையாளம் கண்டு, கட்சியின் தேர்தல் வியூகத்தை வழிநடத்துவதன் மூலம் விஜய் ஒரு தீர்க்கமான பாத்திரத்தை வகிப்பார் என்று செங்கோட்டையன் உறுதிபடத் தெரிவித்தார். இது குறித்து பேசிய செங்கோட்டையன், ''விஜய்யால் அடையாளம் காட்டப்படுபவர்கள் மட்டுமே கோட்டையை அடைவார்கள். வேறு எந்த சக்தியாலும் அதைச் செய்ய முடியாது'' என்று கூறினார்.

தவெகவை வெல்ல முடியாத சக்தியாக மாற்றும்

மேலும் பெண்களுக்கு சம பிரதிநிதித்துவம் மற்றும் உரிமைகளை உறுதி செய்வதன் மூலம் தவெக மற்ற அரசியல் கட்சிகளிலிருந்து வேறுபட்டு நிற்கிறது என்றும், இது எதிர்க் கட்சிகளிடையே பாராட்டையும் பதற்றத்தையும் ஒருசேர உருவாக்கியுள்ளது என்றும் அவர் குறிப்பிட்டார்.

தொடர்ந்து விரைவில் அரசியல் சூழலில் மாற்றம் ஏற்படும் என்று கணித்த செங்கோட்டையன், அடுத்த சில மாதங்களில், அதிகாரிகள்கூட தவெக-வின் வளர்ந்து வரும் செல்வாக்கை அங்கீகரிப்பார்கள் என்றார். கட்சித் தொண்டர்கள் தங்கள் சேவைப் பணிகளைத் தொடர வேண்டும் என்று அழைப்பு விடுத்த அவர், கட்சிக்குள் இருக்கும் ஒற்றுமை, தமிழக அரசியலில் தவெகவை வெல்ல முடியாத சக்தியாக மாற்றும் என்று நம்பிக்கை தெரிவித்தார்.