நீதிபதி ஜி.ஆர். சுவாமிநாதனுக்கு எதிராக போராட்டம்.. தமிழக அரசுக்கு 'குட்டு' வைத்த உச்சநீதிமன்றம்!

பதவியில் உள்ள நீதிபதிகளுக்கு எதிரான போராட்டங்களையும் பிரச்சாரங்களையும் அனுமதிப்பது நீதித்துறையின் சுதந்திரத்தைப் பாதிக்கும் என்று கூறப்பட்டுள்ளது.

தமிழக அரசுக்கு உச்சநீதிமன்றம் நோட்டீஸ்

திருப்பரங்குன்றம் முருகன் மலைக்கோயிலில் கார்த்திகை தீபம் ஏற்றுவதற்கு அனுமதி அளித்த உயர் நீதிமன்ற நீதிபதி ஜி.ஆர். சுவாமிநாதனுக்கு எதிராக, அவதூறான கருத்துக்களைப் பரப்பியதாகக் கூறப்படும் போராட்டக்காரர்கள் மீது தொடரப்பட்ட பொதுநல மனு மீது பதிலளிக்குமாறு தமிழக அரசுக்கு உச்ச நீதிமன்றம் இன்று நோட்டீஸ் அனுப்பியுள்ளது.

தலைமைச் செயலாளர், டிஜிபிக்கு நோட்டீஸ்

உச்சநீதிமன்ற நீதிபதிகள் அரவிந்த் குமார் மற்றும் பி.பி. வரலே அடங்கிய அமர்வு, வழக்கறிஞர் ஜி.எஸ். மணி தாக்கல் செய்த பொதுநல மனுவின் பேரில், தமிழக தலைமைச் செயலாளர், உள்துறைச் செயலாளர், டிஜிபி மற்றும் சென்னை காவல் ஆணையர் உள்ளிட்டோருக்கு நோட்டீஸ் அனுப்பியுள்ளது.

திருப்பரங்குன்றம் கார்த்திகை தீபம் ஏற்றும் விவகாரத்தில், சென்னை உயர் நீதிமன்றத்தின் மதுரை கிளை பிறப்பித்த உத்தரவைத் தொடர்ந்து, அரசியல் கட்சிகள் மற்றும் சில வழக்கறிஞர் சங்கங்களைச் சேர்ந்த குழுக்கள், சென்னை மற்றும் மதுரை உயர் நீதிமன்ற வளாகங்கள் முன்பு போராட்டம் நடத்தி, நீதிபதி ஜி.ஆர். சுவாமிநாதன் ராஜினாமா செய்ய வேண்டும் என்று கோரியதாக மனுவில் கூறப்பட்டுள்ளது.

நீதிபதிக்கு எதிரான போராட்டம் சரியல்ல‌

நீதிபதிகள் பிறப்பிக்கும் உத்தரவுகளுக்காக அவர்களை வீதிப் போராட்டங்கள், அரசியல் அழுத்தம் அல்லது சமூக ஊடக மிரட்டல்களுக்கு உள்ளாக்க முடியாது என்றும், ஒரு நீதித்துறை முடிவுக்கு எதிராக மேல்முறையீடு, மறுஆய்வு அல்லது பிற சட்டப்பூர்வ நடைமுறைகள் மட்டுமே அரசியலமைப்பு ரீதியாக அங்கீகரிக்கப்பட்ட தீர்வு என்றும் அந்த மனுவில் மேலும் கூறப்பட்டுள்ளது.

பதவியில் உள்ள நீதிபதிகளுக்கு எதிரான போராட்டங்களையும் பிரச்சாரங்களையும் அனுமதிப்பது நீதித்துறையின் சுதந்திரத்தைப் பாதிக்கும் என்றும், நீதிபதிகள் அச்சமின்றி தங்கள் கடமைகளைச் செய்வதைத் தடுக்கும் என்றும் அது மேலும் கூறுகிறது. உச்ச நீதிமன்றத்தை அணுகுவதற்கு முன்பு, மனுதாரர் தமிழக தலைமைச் செயலாளர், உள்துறைச் செயலாளர், காவல்துறை தலைமை இயக்குநர் மற்றும் சென்னை காவல் ஆணையர் ஆகியோருக்கு எழுத்துப்பூர்வமாக சட்டரீதியான புகார்களை அளித்துள்ளார்.

நடவடிக்கை எடுக்கப்படவில்லை

மனுவின்படி, கடந்த ஆண்டு டிசம்பர் 6-ம் தேதி, போராட்டக்காரர்கள் மீது முதல் தகவல் அறிக்கை (FIR) பதிவு செய்யக் கோரி, சென்னை உயர் நீதிமன்றப் பதிவாளர், மதுரை கிளை கூடுதல் பதிவாளர் மற்றும் சைபர் கிரைம் பிரிவினருக்கும் மனுக்கள் அளிக்கப்பட்டன. இந்த மனுக்கள் மீது இதுவரை எந்த பதிலும் அளிக்கப்படவில்லை. நடவடிக்கையும் எடுக்கப்படவில்லை என்று மனுவில் வாதிடப்பட்டுள்ளது. இதனைத் தொடர்ந்து தான் தமிழக அரசுக்கு உச்சநீதிமன்றம் நோட்டீஸ் அனுப்பியது.