4 நாள் தொடர் விடுமுறை.. சொந்த ஊர் போறீங்களா? 1500+ சிறப்பு பேருந்துகள்.. முழு விவரம்!

தமிழகத்தில் மே தினம் தொடர் விடுமுறையையொட்டி சென்னையில் இருந்து பல்வேறு இடங்களுக்கு 1500+ சிறப்பு பேருந்துகள் இயக்கப்பட உள்ளது. இது குறித்த முழு பட்டியலை பார்க்கலாம்.

மே தினம் தொடர் விடுமுறை

தமிழகத்தில் வார விடுமுறை மற்றும் பண்டிகை காலங்களில் அரசு போக்குவரத்துக் கழகம் சார்பில் சிறப்பு பேருந்துகள் இயக்கப்பட்டு வருகின்றன. அந்த வகையில் 30/04/2026 (வியாழக்கிழமை) 01/05/2026 (மே தினம் - வெள்ளிகிழமை) 02/05/2026 (சனிக்கிழமை), மற்றும் 03/05/2026 (ஞாயிற்றுக் கிழமை) தொடர் விடுமுறையை முன்னிட்டு 30/04/2026, 01/05/2026 மற்றும் 02/05/2026 ஆகிய நாட்களில் சென்னையிலிருந்தும் மற்றும் பிற இடங்களிலிருந்தும் கூடுதலான பயணிகள் தமிழகம் முழுவதும் பயணம் மேற்கொள்வார்கள் என எதிர்பார்க்கப்படுகிறது.

சிறப்பு பேருந்துகள் இயக்கம்

இதனை கருத்தில் கொண்டு தமிழ்நாடு அரசு போக்குவரத்துக் கழகங்கள் தினசரி இயக்கப்படும் பேருந்துகளுடன் கூடுதலாக சிறப்பு பேருந்துகளை இயக்க திட்டமிடப்பட்டுள்ளது. அதாவது சென்னை கிளாம்பாக்கத்திலிருந்து திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் ஆகிய இடங்களுக்கு 30/04/2026 வியாழக்கிழமை அன்று 475 பேருந்துகளும், 01/05/2026 வெள்ளிக் கிழமை மற்றும் 02/05/2026 சனிக் கிழமை 315 பேருந்துகளும் சென்னை கோயம்பேட்டிலிருந்து திருவண்ணாமலை, நாகை, வேளாங்கண்ணி, ஓசூர். பெங்களூரு ஆகிய இடங்களுக்கு 30/04/2026 அன்று 85 பேருந்துகளும், 01/05/2026 மற்றும் 02/05/2026 தலா 75 பேருந்துகளும் இயக்க முடிவு செய்யப்பட்டுள்ளது.

பெங்களூரு, கோவை

மேலும் மாதாவரத்திலிருந்து 30/04/2026 முதல் 02/05/2026 வரை தலா 14 பேருந்துகளும் மற்றும் பெங்களூர், திருப்பூர், ஈரோடு மற்றும் கோயம்புத்தூர் ஆகிய இடங்களிலிருந்தும் பல்வேறு இடங்களுக்கும் 200 சிறப்பு பேருந்துகளும் இயக்க திட்டமிடப்பட்டுள்ளது. இதுமட்டுமின்றி ஞாயிறு அன்று சொந்த ஊர்களில் இருந்து சென்னை மற்றும் பெங்களூர் திரும்ப வசதியாக பயணிகளின் தேவைகேற்ப அனைத்து இடங்களிலிருந்தும் 03/05/2026 (ஞாயிற்றுக்கிழமை) அன்று 615 சிறப்பு பேருந்துகள் இயக்கிட திட்டமிடப்பட்டுள்ளது.

எப்படி முன்பதிவு செய்வது?

இந்த வார இறுதியில் வியாழக்கிழமை அன்று 13,103 பயணிகளும் வெள்ளிக்கிழமை அன்று 3,950 பயணிகளும் சனிக்கிழமை அன்று 3,134 பயணிகளும் மற்றும் ஞாயிற்றுக்கிழமை அன்று 7,232 பயணிகளும் பயணம் மேற்கொள்ள முன்பதிவு செய்துள்ளனர். இந்த எண்ணிக்கை மேலும் அதிகரிக்க வாய்ப்பு உள்ளதால் தொலைதூர பயணம் மேற்கொள்ள இருக்கும் பயணிகள் கூட்ட நெரிசலை தவிர்க்கும் பொருட்டு தங்களது பயணத்திற்கு www.tnstc.in மற்றும் Mobile App மூலம் முன்பதிவு செய்து பயணிக்கலாம். இந்த சிறப்பு பேருந்து இயக்கத்தினை கண்காணிக்க அனைத்து பேருந்து நிலையங்களிலும் போதிய அலுவலர்கள் நியமிக்கப்பட்டுள்ளனர் என்பது குறிப்பிடத்தக்கது.