
ஒரு துளி ரத்தம் ஒருவரின் உயிரைக் காப்பாற்றும் வல்லமை கொண்டது. அவசர சிகிச்சை, விபத்து, அறுவை சிகிச்சை என பல்வேறு சூழல்களில் ரத்தத்தின் தேவை தொடர்ந்து இருந்து வருகிறது. ஆனால், தேவைப்படும் நேரத்தில் சரியான ரத்தப் பிரிவு கிடைப்பது சில நேரங்களில் சவாலாக மாறுகிறது. இதற்குத் தீர்வு காணவும், இளைஞர்களிடையே தன்னார்வ ரத்ததானத்தை ஊக்குவிக்கவும் தமிழக அரசு புதிய முயற்சியை முன்னெடுத்துள்ளது.
தமிழகத்தில் ஏற்கெனவே செயல்பட்டு வரும் ரெட் ரிப்பன் கிளப்புகள் (Red Ribbon Clubs) மூலம், கல்லூரிகளில் புதிதாக ரத்ததான கிளப்புகள் (Blood Donor Clubs) அமைக்க அரசு அனுமதி வழங்கியுள்ளது. இதற்காக ஒவ்வொரு கிளப்புக்கும் ஆண்டுக்கு ரூ.4,000 செயல்பாட்டு நிதி வழங்கப்பட உள்ளது.
மொத்தம் ரூ.95.16 லட்சம் செலவில் செயல்படுத்தப்பட உள்ள இந்தத் திட்டம், கல்லூரி மாணவர்களை தன்னார்வ ரத்ததான இயக்கத்தில் ஒருங்கிணைப்பதுடன், அவசர காலங்களில் ரத்தம் கிடைப்பதையும் மேம்படுத்த உதவும் என எதிர்பார்க்கப்படுகிறது. இந்தத் திட்டம் குறித்த முழுமையான விவரங்களைப் பார்க்கலாம்.
தமிழகத்தில் செயல்பட்டு வரும் ரெட் ரிப்பன் கிளப்புகள் உள்ள கல்லூரிகளில் ரத்ததான கிளப்புகள் அமைக்க தமிழ்நாடு மாநில ரத்தப் பரிமாற்றக் கழகத்தின் (Tamil Nadu State Blood Transfusion Council - TNSBTC) திட்ட இயக்குநருக்கு அனுமதி அளிக்கப்பட்டுள்ளது.
மாநிலம் முழுவதும் தற்போது 2,379 ரெட் ரிப்பன் கிளப்புகள் செயல்பட்டு வருகின்றன. இவற்றின் மூலம் 2,379 கல்லூரிகளில் புதிய ரத்ததான கிளப்புகள் உருவாக்கப்பட உள்ளன.
சட்டப்பேரவையில் 2026-2027ஆம் ஆண்டுக்கான அறிவிப்பு எண் 76-ன் கீழ் சுகாதாரம், மருத்துவக் கல்வி மற்றும் குடும்ப நலத்துறை அமைச்சரால் அறிவிக்கப்பட்ட இந்தத் திட்டத்திற்கு தற்போது அரசாணை மூலம் அனுமதி வழங்கப்பட்டுள்ளது.
ரெட் ரிப்பன் கிளப் என்பது கல்லூரி மாணவர்களிடையே சுகாதார விழிப்புணர்வு, எச்.ஐ.வி மற்றும் எய்ட்ஸ் தடுப்பு குறித்த விழிப்புணர்வு, பாதுகாப்பான வாழ்க்கை முறை மற்றும் சமூகப் பொறுப்பு போன்றவற்றை வளர்க்கும் நோக்கத்துடன் செயல்படும் அமைப்பாகும்.
இந்தக் கிளப்புகள் மூலம் மாணவர்களுக்கு பல்வேறு விழிப்புணர்வு நிகழ்ச்சிகள், கருத்தரங்குகள் மற்றும் சமூக சேவை நடவடிக்கைகள் நடத்தப்படுகின்றன. கல்லூரிகளில் ஏற்கெனவே மாணவர்கள், ஆசிரியர் ஒருங்கிணைப்பாளர்கள் மற்றும் நிர்வாகத்தின் ஆதரவுடன் இந்த அமைப்புகள் செயல்பட்டு வருகின்றன.
இந்தக் கட்டமைப்பையே பயன்படுத்தி, கூடுதலாக ரத்ததான கிளப்புகளை உருவாக்க தமிழக அரசு முடிவு செய்துள்ளது. இதனால் முற்றிலும் புதிய அமைப்பை உருவாக்க வேண்டிய அவசியம் இல்லாமல், ஏற்கெனவே உள்ள மாணவர் அமைப்புகள் மூலம் ரத்ததான சேவையை விரிவுபடுத்த முடியும்.
புதிதாக அமைக்கப்படும் ஒவ்வொரு ரத்ததான கிளப்பிலும் சில முக்கியமான பொறுப்புகள் வழங்கப்பட்டுள்ளன.
ஆசிரியர் ஒருங்கிணைப்பாளர் நியமனம்
ஒவ்வொரு ரத்ததான கிளப்பிலும் ஒரு ஆசிரியர் ஒருங்கிணைப்பாளர் (Faculty Coordinator) நியமிக்கப்படுவார். இவர் கிளப்பின் செயல்பாடுகளை ஒருங்கிணைத்து, முகாம்கள் நடத்துவதற்கான ஏற்பாடுகளைக் கவனிப்பார்.
மாணவர் ஒருங்கிணைப்பாளர் நியமனம்
ஒவ்வொரு கிளப்பிலும் ஒரு மாணவர் ஒருங்கிணைப்பாளர் (Student Coordinator) நியமிக்கப்படுவார். மாணவர்களை ஒருங்கிணைப்பது, ரத்ததானம் தொடர்பான விழிப்புணர்வை ஏற்படுத்துவது உள்ளிட்ட பணிகளில் இவர் ஈடுபடுவார்.
அருகிலுள்ள ரத்த வங்கியுடன் இணைப்பு
ஒவ்வொரு கல்லூரியின் ரத்ததான கிளப்பும் அருகிலுள்ள உரிமம் பெற்ற ரத்த மையத்துடன் (Licensed Blood Centre) இணைக்கப்படும். இதன் மூலம் ரத்ததான முகாம்களை முறையான மருத்துவக் கண்காணிப்புடன் நடத்துவதற்கான ஏற்பாடுகள் செய்யப்படும்.
தொடர்ந்து ரத்ததான முகாம்கள்
இணைக்கப்பட்டுள்ள உரிமம் பெற்ற ரத்த மையத்தின் ஒத்துழைப்புடன் கல்லூரிகளில் அவ்வப்போது தன்னார்வ ரத்ததான முகாம்கள் நடத்தப்பட வேண்டும்.
சிறப்பாகச் செயல்படும் கிளப்புகளுக்கு அங்கீகாரம்
சிறப்பாகச் செயல்படும் ரத்ததான கிளப்புகளுக்கும், தன்னார்வ ரத்தக் கொடையாளர்களுக்கும் உரிய அங்கீகாரம் வழங்கப்படும். இதன் மூலம் தொடர்ந்து ரத்ததானம் செய்வதை ஊக்குவிக்க அரசு திட்டமிட்டுள்ளது.
ஒவ்வொரு கிளப்புக்கும் ஆண்டுக்கு ரூ.4,000 நிதி
இந்தத் திட்டத்தின் முக்கிய அம்சங்களில் ஒன்று, ரத்ததான கிளப்புகளுக்கு வழங்கப்பட உள்ள செயல்பாட்டு நிதியாகும். அரசாணையின்படி, ஒவ்வொரு ரத்ததான கிளப்புக்கும் ஆண்டுக்கு ரூ.4,000 வழங்க அனுமதி அளிக்கப்பட்டுள்ளது.
மொத்த ரத்ததான கிளப்புகள் - 2,379
ஒரு கிளப்புக்கான ஆண்டு நிதி - ரூ.4,000
மொத்த ஆண்டு நிதி - ரூ.95,16,000
இந்த நிதி தமிழ்நாடு மாநில ரத்தப் பரிமாற்றக் கழகத்தின் கார்பஸ் நிதியில் இருந்து வழங்கப்படும். அதாவது, ஆண்டுக்கு மொத்தம் ரூ.95.16 லட்சம் செலவிட அரசு அனுமதி அளித்துள்ளது.
இந்தத் தொகை ஒவ்வொரு கல்லூரிக்கும் வழங்கப்படும் தனிநபர் உதவித்தொகை கிடையாது. கிளப்புகளின் செயல்பாடுகளுக்கான ஆண்டு நிதியாகும்.
மாவட்ட அளவில்: மாவட்ட ரத்தப் பரிமாற்றக் குழுக்கள், (District Blood Transfusion Committees) திட்டத்தின் செயல்பாடுகளையும், நிதிப் பயன்பாட்டையும் அவ்வப்போது ஆய்வு செய்யும்.
மாநில அளவில்: தமிழ்நாடு மாநில ரத்தப் பரிமாற்றக் கழகம், திட்டத்தின் ஒட்டுமொத்த செயல்பாட்டைக் கண்காணிக்கும்.
கல்லூரி அளவில்: ஆசிரியர் மற்றும் மாணவர் ஒருங்கிணைப்பாளர்கள் கிளப்பின் அன்றாட நடவடிக்கைகளை ஒருங்கிணைப்பார்கள்.
இதன் மூலம் நிதி முறையாகப் பயன்படுத்தப்படுவதையும், ரத்ததான முகாம்கள் தொடர்ந்து நடத்தப்படுவதையும் உறுதி செய்ய நடவடிக்கை எடுக்கப்பட்டுள்ளது.
ரத்ததானம் என்பது உயிர்களைக் காக்க உதவும் உன்னதமான சேவை. இருப்பினும், அனைவரும் எல்லா நேரங்களிலும் ரத்ததானம் செய்ய முடியாது. பொதுவாக 18 முதல் 65 வயது வரை உள்ளவர்கள் ரத்ததானம் செய்யத் தகுதியுடையவர்களாகக் கருதப்படுகின்றனர்.
ஆனால், உடல் எடை, ஹீமோகுளோபின் அளவு, உடல்நிலை மற்றும் மருத்துவப் பரிசோதனைகளின் அடிப்படையில் தகுதி உறுதி செய்யப்படும்.