பரந்தூர் புதிய விமான நிலையத் திட்டத்திற்காக அரசுப் பணம் ரூ.680 கோடி செலவிடப்பட்டுள்ள நிலையில், இத்திட்டத்தை எவ்வாறு பாதியில் கைவிட முடியும் எனத் தமிழக அரசுக்குச் சென்னை உயர்நீதிமன்றம் கேள்வி எழுப்பியுள்ளது. சென்னையைச் சேர்ந்த மென்பொருள் பொறியாளர் கௌதமன் என்பவர் சென்னை உயர்நீதிமன்றத்தில் பொதுநல மனு ஒன்றைத் தாக்கல் செய்திருந்தார்.
அந்த மனுவில், மீனம்பாக்கம் விமான நிலையத்திற்கு ஆண்டுதோறும் சுமார் 3 கோடி பயணிகள் வந்து செல்கின்றனர். அங்கு நிலவும் இடநெருக்கடியைச் சமாளிப்பதற்காக ரூ.27,000 கோடி மதிப்பீட்டில் பரந்தூரில் புதிய விமான நிலையம் அமைக்க முடிவு செய்யப்பட்டது. இதற்காக 1,700 ஏக்கர் நிலத்தை கையகப்படுத்த ரூ.680 கோடி அரசுப் பணம் செலவழிக்கப்பட்டு, 48% நிலங்கள் கையகப்படுத்தப்பட்டன.
இந்நிலையில், தமிழகத்தில் புதிதாகப் பொறுப்பேற்றுள்ள த.வெ.க. அரசு இத்திட்டத்தைக் கைவிடுவதாக அறிவித்துள்ளது. விமான நிலையத்திற்காக விவசாய நிலங்கள் கையகப்படுத்தப்படுவதால் விவசாயிகளின் வாழ்வாதாரம் பாதிக்கப்படுவதாகக் கூறி, முதலமைச்சர் விஜய் கடந்த ஆக.24-ம் தேதி சட்டப்பேரவையில் 110 விதியின் கீழ் பரந்தூர் விமான நிலையத் திட்டத்தைக் கைவிடுவதாக அறிவித்தார்.