இந்த முறை நயினார் நாகேந்திரனிடம் தோற்றால் திமுகவினரின் பதவி பறிக்கப்படும்! முதல்வர் ஸ்டாலின் எச்சரிக்கை

2026 சட்டமன்ற தேர்தலை முன்னிட்டு, முதல்வர் மு.க.ஸ்டாலின் கட்சி நிர்வாகிகளை சந்தித்து வருகிறார். நெல்லை தொகுதி நிர்வாகிகளுடனான சந்திப்பில், தேர்தலில் வெற்றி பெறாவிட்டால் அனைவரது பதவிகளும் பறிக்கப்படும் என அவர் கடுமையாக எச்சரித்துள்ளார்.

முதல்வர் ஸ்டாலின் ஒன் டூ ஒன் சந்திப்பு

தமிழ்நாடு சட்டப்பேரவை தேர்தல் அடுத்த ஆண்டு நடைபெற உள்ளது. இந்த தேர்தலில் தவெக தலைவர் விஜய் வருகையால் நான்கு முனைப்போட்டி நிலவி வருகிறது. இதனால் எப்போது இல்லாத வகையில் 2026 சட்டமன்ற தேர்தல் இருக்கும் என எதிர்பார்க்கப்படுகிறது. 

இந்நிலையில் 234 தொகுதிகளிலும் தொகுதி வாரியாக கட்சி நிர்வாகிகளை திமுக தலைவரும், முதலமைச்சருமான மு.க.ஸ்டாலின் ஒன் டூ ஒன் சந்திப்பு மேற்கொண்டு வருகிறார். திமுக மாவட்ட செயலாளர்கள் முதல், கிளை கழக செயலாளர்கள் வரை தொடர்ச்சியாக ஒவ்வொரு சட்டமன்ற தொகுதிக்குட்பட்ட நிர்வாகிகளை முதலமைச்சர் தனித்தனியே சந்தித்து வருகிறார்.

இதுவரை 33 நாட்களில் 73 சட்டமன்ற தொகுதிகளில் ஆலோசனை

இந்த சந்திப்பின் போது பொதுமக்களுக்கு அரசின் சாதனை திட்டங்கள் எவ்வாறு கொண்டு செல்லப்பட்டுள்ளது? தேர்தல் வியூகம், தொகுதிகளின் செயல்பாடுகள் என்ன? தொகுதி வாரியாக தேர்தல் பணிகள் எவ்வாறு மேற்கொள்ளப்பட்டு வருகிறது? என்பது குறித்து நிர்வாகிகளுடன் முதல்வர் ஸ்டாலின் கேட்டறிந்து வருகிறார். இதுவரை 33 நாட்களில் 73 சட்டமன்ற தொகுதிகளில் ஆலோசனை நடத்தியுள்ளார்.

நெல்லை தொகுதி

இந்நிலையில் நெல்லை மற்றும் சங்கரன் கோவில் தொகுதி நிர்வாகிகளுடன் இன்று அண்ணா அறிவாலயத்தில் ஒன்-டூ-ஒன் சந்திக்கும் உடன்பிறப்பே வா நிகழ்ச்சியில் முதல்வர் ஸ்டாலின் ஆலோசனை மேற்கொண்டார். அப்போது 2026 சட்டமன்ற தேர்தலில் நெல்லை தொகுதியில் திமுக கட்டாயம் வெற்றி பெற வேண்டும்.

முதல்வர் ஸ்டாலின் எச்சரிக்கை

நெல்லை தொகுதியில் திமுக வெற்றி பெறவில்லையென்றால் அனைவரது பதவிகளும் பறிக்கப்படும் என்று மாவட்டச் செயலாளர் உட்பட அனைத்து நிர்வாகிகளுக்கும் முதல்வர் மு.க.ஸ்டாலின் எச்சரிக்கை விடுத்துள்ளார். இதில் தெற்கு மண்டல பொறுப்பாளர் கனிமொழி எம்.பி.யும் பங்கேற்றிருந்தார். நெல்லை தொகுதியில் தற்போது எம்எல்ஏவாகவும், தமிழக பாஜக மாநிலத்தலைவராக நயினார் நாகேந்திரன் இருந்து வருவது குறிப்பிடத்தக்கது.