AIADMK: முன்னாள் முதலமைச்சர் ஓ பன்னீர் செல்வத்தின் ஆதரவாளர்களாக இருந்து அதிமுகவில் இணைந்த தர்மர், கொளத்தூர் கிருஷ்ணமூர்த்தி முக்கிய பதவி வழங்கப்பட்டுள்ளது.
முன்னாள் முதல்வர் ஜெயலலிதா மறைவை அடுத்து அதிமுகவில் ஒற்றை தலைமை விவகாரத்தில் ஓ.பன்னீர்செல்வம், எடப்பாடி பழனிசாமிக்கு இடையே மோதல் ஏற்பட்டது. இதனையடுத்து ஓபிஎஸ் அவரது ஆதரவாளர்களான வைத்திலிங்கம், ஜேசிடி பிரபாகர், வெல்லமண்டி நடராஜன், குன்னம் ராமசந்திரன், கு.ப. கிருஷ்ணன், கொளத்தூர் கிருஷ்ணமூர்த்தி, தர்மர், மனோஜ் பாண்டியன், ஐயப்பன் உள்ளிட்டோர் அதிமுகவில் இருந்து அதிரடியாக நீக்கப்பட்டதை அடுத்து தனி அணியாக செயல்பட்டு வந்தனர்.
24
ஓபிஎஸ் ஆதரவாளர்கள் திமுக, தவெகவில் ஐக்கியம்
இந்நிலையில் ஓபிஎஸ் மீது ஏற்பட்ட அதிருப்தி காரணமாக ஜேசிடி பிரபாகர், கு.ப. கிருஷ்ணன் ஆகியோர் தவெகவில் இணைந்தனர். பின்னர் மனோஜ் பாண்டியன், வைத்திலிங்கம் ஆகியோர் முதல்வர் ஸ்டாலின் முன்னிலையில் திமுகவில் இணைந்தனர். அதேபோல் குன்னம் ராமசந்திரன் திமுக இணைவதாக கூறப்பட்டு வந்த நிலையில் அரசியலில் இருந்து விலகுவதாக அதிரடி அறிவிப்பை வெளியிட்டார்.
34
தர்மர் அதிமுகவில் ஐக்கியம்
அதேபோல் முதுகுளத்தூர் ஒன்றிய செயலாளரும் ஓபிஎஸ் தயவால் மாநிலங்களவை உறுப்பினராக்கிய தர்மர், முன்னாள் அமைச்சர் வெல்லமண்டி நடராஜன், கொளத்தூர் கிருஷ்ணமூர்த்தி ஆகியோர் எடப்பாடி பழனிசாமி முன்னிலையில் அதிமுகவில் இணைந்தனர். இந்நிலையில் முன்னாள் முதலமைச்சர் ஓ பன்னீர் செல்வத்தின் ஆதரவாளர்களாக இருந்து அதிமுகவில் எடப்பாடி பழனிச்சாமியின் தலைமையை ஏற்றுக்கொண்டு அதிமுகவில் இணைந்த தர்மர், கொளத்தூர் கிருஷ்ணமூர்த்தி முக்கிய பதவி வழங்கப்பட்டுள்ளது.
இதுதொடர்பாக அதிமுக பொதுச்செயலாளர் எடப்பாடி பழனிசாமி வெளியிட்டுள்ள அறிவிப்பில்: அனைத்திந்திய அண்ணா திராவிட முன்னேற்றக் கழக கொள்கை பரப்பு துணைச் செயலாளராக தர்மர் மாநிலங்களவை உறுப்பினர் (இராமநாதபுரம் மாவட்டம்), கொளத்தூர் கிருஷ்ணமூர்த்தி ( சென்னை மாவட்ட கூட்டுறவு ஒன்றிய முன்னாள் தலைவர்) இன்று முதல் நியமிக்கப்படுகிறார்.
