ஐபிஎல் தொடர் தொடங்கும் நேரத்தில், சென்னை சூப்பர் கிங்ஸ் அணிக்கு மிகப்பெரிய பின்னடைவு ஏற்பட்டுள்ளது. அந்த அணியின் முக்கிய வீரரான எம்.எஸ். தோனி, காயம் காரணமாக முதல் இரண்டு வாரங்களுக்கு விளையாடமாட்டார் என அறிவிக்கப்பட்டுள்ளது. சென்னை சூப்பர் கிங்ஸ் நிர்வாகம் இன்று இதனை அதிகாரப்பூர்வமாக உறுதிப்படுத்தியது. திங்கட்கிழமை மாலை கவுகாத்தியில் உள்ள பர்சபரா ஸ்டேடியத்தில், ராஜஸ்தான் ராயல்ஸ் அணிக்கு எதிராக CSK தனது முதல் போட்டியில் விளையாட உள்ளது நிலையில் ரசிகர்களுக்கு இது அதிர்ச்சியை ஏற்படுத்தியுள்ளது.
24
சிஎஸ்கே நிர்வாகம் அறிவிப்பு
'எம்.எஸ். தோனி தற்போது கால் தசைப்பிடிப்பு காயத்திற்கு சிகிச்சை பெற்று வருகிறார். இதனால், ஐபிஎல் 2026-ன் முதல் இரண்டு வாரங்களுக்கு அவர் விளையாட வாய்ப்பில்லை. விரைவில் குணமடையுங்கள், தலைவா' என்று சென்னை சூப்பர் கிங்ஸ் தனது அதிகாரப்பூர்வ சமூக வலைதளப் பக்கத்தில் பதிவிட்டுள்ளது. தோனி இல்லாததால், இந்திய வீரர் சஞ்சு சாம்சன் விக்கெட் கீப்பிங் பொறுப்பை ஏற்பார். தோனியின் அடுத்த வாரிசாகவே சஞ்சுவை அணி நிர்வாகம் பார்க்கிறது. கடந்த டிசம்பர் ஏலத்திற்கு முன்பு, ஒரு பெரிய டிரேடு மூலம் சஞ்சு சென்னை அணிக்கு வந்தார். ரவீந்திர ஜடேஜா மற்றும் சாம் கரன் ஆகியோரை ராஜஸ்தான் ராயல்ஸ் அணிக்கு கொடுத்து, CSK சஞ்சுவை வாங்கியது.
34
ரசிகர்களுக்கு ஆறுதல்
2020-ல் சர்வதேச கிரிக்கெட்டில் இருந்து ஓய்வு பெற்ற பிறகு, தோனி ஐபிஎல் தொடரில் மட்டுமே விளையாடி வருகிறார். கடந்த சீசனில் சென்னை அணிக்காக 14 போட்டிகளில் விளையாடி, 135.17 ஸ்ட்ரைக் ரேட்டில் 196 ரன்கள் எடுத்தார். கடந்த சீசனில் ருதுராஜ் கெய்க்வாட் காயமடைந்தபோது, தோனியே அணியை வழிநடத்தினார். இப்போது தோனியின் காயம் சென்னை அணிக்கு கவலையை ஏற்படுத்தியுள்ளது. ஆனாலும், சஞ்சு சாம்சன் போன்ற ஒரு திறமையான வீரர் அணியில் இருப்பது ரசிகர்களுக்கு சற்று ஆறுதல் அளிக்கிறது.
அஸ்வின் கணிப்பு
சிஎஸ்கேவில் தோனி இல்லாத இடத்தில் அந்த இடத்தை நிரப்புவது கடினம் என்றாலும், கார்த்திக் ஷர்மா போன்ற இளம் வீரர்களுக்கு அதிக வாய்ப்பளிக்க வேண்டும் என்று முன்னாள் வீரர் ரவிச்சந்திரன் அஸ்வின் தெரிவித்துள்ளார். அதிரடி ஆட்டக்காரர் கார்த்திக் சர்மா அந்த இடத்தில் சரியாக பொருந்துவார் என்று கூறியுள்ளார்.
