மன்னிப்பா? சான்சே இல்ல.. கப் வேணும்னா என் ஆபீசுக்கு வாங்க! மோஷின் நக்வியின் தெனாவட்டு பதில்!

ஆசியக் கோப்பை கிரிக்கெட் தொடரில் கோப்பை வழங்குவதில் ஏற்பட்ட சர்ச்சையைத் தொடர்ந்து, இந்திய அணி துபாயில் உள்ள ஏசிசி அலுவலகத்திற்கு வந்து கோப்பையைப் பெற்றுக் கொள்ளலாம் என ஏசிசி தலைவர் மோஷின் நக்வி கூறியுள்ளார்.

ஆசியக் கோப்பை கிரிக்கெட்

ஆசியக் கோப்பை கிரிக்கெட் தொடரில் சாம்பியன் பட்டம் வென்ற இந்திய அணிக்கு கோப்பையை வழங்குவதில் ஏற்பட்ட சர்ச்சைகள் தொடரும் நிலையில், ஆசிய கிரிக்கெட் கவுன்சிலின் (ஏசிசி) தலைவரும், பாகிஸ்தான் கிரிக்கெட் வாரியத்தின் (பிசிபி) தலைவருமான மோஷின் நக்வி இன்று (புதன்கிழமை) ஒரு அதிரடியான அறிக்கையை வெளியிட்டுள்ளார்.

"இந்திய அணிக்கு கோப்பை தேவை என்றால், துபாயில் உள்ள ஏசிசி அலுவலகத்திற்கு வந்து என்னிடம் பெற்றுக் கொள்ளலாம்" என்று அவர் தெரிவித்துள்ளார்.

மன்னிப்புக் கோர மறுப்பு

ஆசியக் கோப்பை இறுதிப் போட்டி பரிசளிப்பு விழாவின்போது, இந்திய வீரர்கள் தம்மிடம் கோப்பையை ஏற்க மறுத்ததால், மோஷின் நக்வி கோப்பையுடன் வெளியேறியது சர்ச்சையை ஏற்படுத்தியது. இது தொடர்பாக நடந்த ஆசிய கிரிக்கெட் கவுன்சிலின் (ACC) பொதுக்குழு கூட்டத்தில் இந்திய கிரிக்கெட் வாரிய அதிகாரிகளிடம் (BCCI) அவர் மன்னிப்புக் கேட்டதாக வெளியான செய்திகளை நக்வி கடுமையாக மறுத்துள்ளார்.

சமூக வலைதளமான எக்ஸ் தளத்தில் அவர் எழுதியுள்ள பதிவில், "ஏசிசி தலைவராக, அன்றைய தினமே கோப்பையை வழங்க நான் தயாராக இருந்தேன். இப்போதும் நான் தயாராகவே இருக்கிறேன். இந்திய அணிக்கு அது உண்மையிலேயே தேவை என்றால், ஏசிசி அலுவலகத்திற்கு வந்து என்னிடம் இருந்து அதைப் பெற்றுக் கொள்ளலாம்" என்று குறிப்பிட்டுள்ளார்.

மேலும், "நான் எவ்வித தவறும் செய்யவில்லை என்பதைத் திட்டவட்டமாகத் தெளிவுபடுத்துகிறேன். நான் பிசிசிஐயிடம் ஒருபோதும் மன்னிப்புக் கேட்கவில்லை, எதிர்காலத்திலும் அவ்வாறு செய்ய மாட்டேன்" என்றும் அவர் ஆவேசமாகத் தெரிவித்துள்ளார்.

கோப்பையை வாங்க மறுத்த இந்தியா

பாகிஸ்தான் உள்துறை அமைச்சராகவும், இந்தியாவுக்கு எதிரான அரசியல் நிலைப்பாட்டை வெளிப்படையாகக் கொண்டவராகவும் மோஷின் நக்வி உள்ளார். இறுதிப் போட்டியில் பாகிஸ்தானை வீழ்த்தி சூர்யகுமார் யாதவ் தலைமையிலான இந்திய அணி கோப்பையை வென்றது.

இந்தத் தொடர் முழுவதும், பஹல்காம் பயங்கரவாதத் தாக்குதலைத் தொடர்ந்து, இந்திய வீரர்கள் பாகிஸ்தான் வீரர்களிடம் "கைகுலுக்க மறுக்கும் கொள்கையை" (no handshake policy) கடைப்பிடித்தனர். இது பிசிபி-யை கோபமூட்டியது. இதன் தொடர்ச்சியாக, மோஷின் நக்வி வேண்டுமென்றே இந்தியாவைச் சீண்டும் விதமாகக் கருத்துகளை வெளியிட்டதாகக் கூறப்படுகிறது. இதனாலேயே, இந்திய வீரர்கள் அவரிடமிருந்து கோப்பையை ஏற்க மறுத்தனர்.

ஐசிசி-யில் முறையிட்ட இந்தியா

பிசிசிஐ-யின் பிரதிநிதிகளாக ஏசிசி கூட்டத்தில் கலந்துகொண்ட ஆஷிஷ் ஷெலர் மற்றும் ராஜீவ் சுக்லா ஆகியோர், இறுதிப் போட்டியில் முறையாகக் கோப்பை வழங்கப்படாதது குறித்துக் கடும் ஆட்சேபனை தெரிவித்தனர். இந்தப் பிரச்சினையை நவம்பர் மாதம் நடைபெறவிருக்கும் சர்வதேச கிரிக்கெட் கவுன்சிலின் (ஐசிசி) கூட்டத்தில் எழுப்பப் போவதாக பிசிசிஐ தரப்பு தெரிவித்துள்ளது.

இந்திய அணியின் ஹாட்ரிக் வெற்றி

இந்தியா, பாகிஸ்தானை இத்தொடரில் மூன்று முறை எதிர்கொண்டு, மூன்றிலும் வெற்றி பெற்றது குறிப்பிடத்தக்கது. பஹல்காம் பயங்கரவாதத் தாக்குதலைத் தொடர்ந்து, இந்திய ராணுவம் 'ஆபரேஷன் சிந்தூர்' மூலம் எல்லை தாண்டிய பயங்கரவாத உள்கட்டமைப்பைத் தகர்க்க நடவடிக்கை எடுத்ததில் இருந்து இரு அண்டை நாடுகளுக்கும் இடையேயான பதட்டங்கள் மிக அதிகமாக உள்ளது.