லக்னோ சூப்பர் ஜெயிண்ட்ஸ் அணிக்கு எதிராக இன்று நடந்த 28ஆவது லீக் போட்டியில் கொல்கத்தா நைட் ரைடர்ஸ் 8 விக்கெட்டுகள் வித்தியாசத்தில் வெற்றி பெற்றுள்ளது.
கொல்கத்தாவின் ஹோம் மைதானமான ஈடன் கார்டன் மைதானத்தில் லக்னோ சூப்பர் ஜெயிண்ட்ஸ் மற்றும் கொல்கத்தா நைட் ரைடர்ஸ் அணிகளுக்கு இடையிலான 28ஆவது லீக் போட்டி இன்று நடந்தது. டாஸ் வென்ற கொல்கத்தா நைட் ரைடர்ஸ் அணியின் கேப்டன் ஷ்ரேயாஸ் ஐயர் பவுலிங் தேர்வு செய்தார்.
அதன்படி முதலில் பேட்டிங் செய்த லக்னோ சூப்பர் ஜெயிண்ட்ஸ் அணி 20 ஓவர்களில் 7 விக்கெட்டுகளை இழந்து 161 ரன்கள் எடுத்தது. இதில் அதிகபட்சமாக நிக்கோலஸ் பூரன் 45 ரன்கள் எடுத்துக் கொடுத்தார். பவுலிங்கைப் பொறுத்த வரையில் கேகேஆர் அணியில் மிட்செல் ஸ்டார் 3 விக்கெட்டுகள் கைப்பற்றினார்.
பின்னர் எளிய இலக்கை துரத்திய கொல்கத்தா நைட் ரைடர்ஸ் அணியில் சுனில் நரைன் 6 ரன்களில் ஆட்டமிழந்து அதிர்ச்சி கொடுத்தார். அடுத்த வந்த அங்கிரிஷ் ரகுவன்ஷி 7 ரன்களில் வெளியேறினார்.
இவரைத் தொடர்ந்து பிலிப் சால்ட் உடன் கேப்டன் ஷ்ரேயாஸ் ஐயர் இணைந்தார். இதில் ஷ்ரேயாஸ் ஐயர் நிதானமாக விளையாடினாலும், பிலிப் சால்ட் அதிரடியாக விளையாடி ரன்கள் குவித்தார். இந்தப் போட்டியில் அரைசதம் அடித்ததன் மூலமாக தனது 4ஆவது ஐபிஎல் அரைசதத்தை பூர்த்தி செய்தார்.
மேலும், தொடர்ந்து விளையாடி 47 பந்துகளில் 14 பவுண்டரி, 3 சிக்ஸர் உள்பட 89 ரன்கள் குவித்து அணியின் வெற்றிக்கு வித்திட்டார். இறுதியாக கொல்கத்தா நைட் ரைடர்ஸ் 15.4 ஓவர்களில் 2 விக்கெட்டுகளை இழந்து 162 ரன்கள் குவித்து 8 விக்கெட்டுகள் வித்தியாசத்தில் வெற்றி பெற்றது. இந்த வெற்றியின் மூலமாக முதல் முறையாக லக்னோ அணிக்கு எதிராக கொல்கத்தா வெற்றி பெற்றுள்ளது.
இதற்கு முன்னதாக இரு அணிகளும் மோதிய 3 போட்டிகளில் லக்னோ சூப்பர் ஜெயிண்ட்ஸ் தான் வெற்றி பெற்றிருந்தது. இந்த நிலையில் தான் 4ஆவது போட்டியில் கொல்கத்தா வெற்றி பெற்று லக்னோவிற்கு எதிராக முதல் வெற்றியை பெற்றுள்ளது.