2006-ல் ஆக்கி.. 2026-ல் கிரிக்கெட்.. 42 வயது சகலகலா வீரர்.. ஆனால் முதல் மேட்ச்சில் நடந்த சோகம்!

42 வயதான வெய்ன் மேட்சன், இத்தாலி அணியில் மிகவும் அனுபவம் வாய்ந்த கிரிக்கெட் வீரர் ஆவார். இதில் சுவாரஸ்யமான விஷயம் என்னவென்றால் இவர் வெறும் கிரிக்கெட் வீரர் மட்டுமல்ல; மிகச்சிறந்த ஆக்கி வீரரும் கூட. 

டி20 உலகக்கோப்பை 2026

டி20 உலகக்கோப்பையில் கொல்கத்தாவில் உள்ள ஈடன் கார்டன்ஸ் மைதானத்தில் இன்று (பிப்ரவரி 9) நடந்த இத்தாலிக்கு எதிரான போட்டியில் ஸ்காட்லாந்து அணி 73 ரன்கள் வித்தியாசத்தில் வெற்றி பெற்றது. 

கால்பந்தில் கலக்கில் இத்தாலி முதன்முறையாக டி20 கிரிக்கெட் உலகக்கோப்பையில் களமிறங்கியுள்ளது. இந்த போட்டியில் இத்தாலி அணிக்கு ஒரு சோகமான சம்பவம் நடந்தது. அதாவது இத்தாலி கேப்டன் 42 வயதான வெய்ன் மேட்சன் காயம் அடைந்து இருப்பது அந்நாட்டு ரசிகர்களிடம் சோகத்தை ஏற்படுத்தியுள்ளது.

இத்தாலி கேப்டன் வெய்ன் மேட்சன் காயம்

அதாவது ஸ்காட்லாந்து இன்னிங்ஸின் நான்காவது ஓவரில், பேட்டர் ஜார்ஜ் முன்சியின் புல் ஷாட்டைத் தடுக்க, வெய்ன் மேட்சன் தனது இடதுபுறம் டைவ் அடித்து பயிற்சி ஆடுகளத்தில் உருண்டபோது, அவரது தோள்பட்டை விலகியது. 

அவர் உடனடியாக மருத்துவ உதவிக்கு அழைப்பு விடுத்தார், களத்தில் இருந்த துணை ஊழியர்கள் அவருக்கு சிகிச்சை அளித்தனர். பின்னர் அவர் மைதானத்தில் இருந்து வெளியே அழைத்துச் செல்லப்பட்டார்.

கிரிக்கெட் வீரர் மட்டுமல்ல; ஆக்கி வீரரும் கூட‌

வெய்ன் மேட்சன் காயம் பெரிதாக இருப்பதால் அவர் மீதமுள்ள போட்டிகளில் விளையாடுவது சந்தேகம் தான் என தகவல்கள் கூறுகின்றன. 42 வயதான வெய்ன் மேட்சன், இத்தாலி அணியில் மிகவும் அனுபவம் வாய்ந்த கிரிக்கெட் வீரர் ஆவார். 

இதில் சுவாரஸ்யமான விஷயம் என்னவென்றால் இவர் வெறும் கிரிக்கெட் வீரர் மட்டுமல்ல; ஆக்கி வீரரும் கூட. கேட்கவே ஆச்சரியமாக இருக்கிறதா? ஆம்.. வெய்ன் மேட்சன் 2006 ஆண்கள் ஹாக்கி உலகக் கோப்பையில் தென்னாப்பிரிக்கா அணிக்காக விளையாடிள்ளார்.

ஆக்கி உலகக்கோப்பையில் பங்கேற்றார்

மேட்சன் தனது 22வது வயதில் தென்னாப்பிரிக்க தேசிய ஹாக்கி அணியில் அறிமுகமானார். தென்னாப்பிரிக்காவுக்காக 39 ஆக்கி போட்டிகளில் விளையாடி அசத்தியுள்ளார். 

கிரிக்கெட் வாழ்க்கையை பொறுத்தவரை வெய்ன் மேட்சன் தனது சிறு வயதில் தென்னாப்பிரிக்காவில் கிரிக்கெட் விளையாடி இருந்தாலும் 2009ல் இங்கிலாந்தின் டெர்பிஷையர் அணிக்காக அறிமுகம் ஆனார். தனது முதல் போட்டியிலேயே ஆட்டமிழக்காமல் 170 ரன்கள் அடித்து அசத்தினார்.

கிரிக்கெட் அறிமுகம் எப்போது?

பின்பு இத்தாலிக்கு குடிபெயர்ந்த அவர் 2023ம் ஆண்டு இத்தாலி தேசிய கிரிக்கெட் அணிக்காக ஜெர்சி அணிக்கு எதிராக தனது முதல் டி20 சர்வதேசப் போட்டியில் அறிமுகமானார். அதன்பிறகு சூப்பராக விளையாடி அணியில் நிரந்தர இடம் பிடித்து விட்டார்.

 இந்த டி20 உலகக்கோப்பையில் இத்தாலி அணியின் கேப்டனாகவும் பொறுப்பேற்று விட்டார். ஆனால் துரதிருஷ்டவசமாக தான் விளையாடிய முதல் டி20 உலககோப்பையில் முதல் போட்டியிலேயே காயம் அடைந்து விட்டார்.