ஆப்கானிஸ்தானுக்கு எதிரான 2ஆவது டி20 போட்டியின் மூலமாக இந்திய அணியின் நம்பிக்கை நட்சத்திரம் விராட் கோலி 429 நாட்களுக்கு பிறகு டி20 போட்டியில் விளையாடுகிறார்.
இந்தியா வந்துள்ள ஆப்கானிஸ்தான் 3 போட்டிகள் கொண்ட டி20 தொடரில் விளையாடி வருகிறது. டி20 கிரிக்கெட்டிலிருந்து விலகியிருந்த ரோகித் சர்மா மற்றும் விராட் கோலி இருவரும் இந்த தொடரின் மூலமாக மீண்டும் டி20 கிரிக்கெட்டிற்கு திரும்பியுள்ளனர். முதல் டி20 போட்டியில் ரோகித் சர்மா விளையாடிய நிலையில், தனிப்பட்ட காரணத்திற்காக விராட் கோலி விளையாடவில்லை.
முதல் டி20 போட்டியைத் தொடர்ந்து இன்று இரவு 7 மணிக்கு இந்தூரில் 2ஆவது டி20 போட்டி நடக்கிறது. இதற்காக விராட் கோலி இந்தூர் வந்துள்ளார். இதன் மூலமாக அவர் இன்று நடக்கும் 2ஆவது டி20 போட்டியில் இடம் பெறுவார் என்று கூறப்படுகிறது. இதன் மூலமாக கிட்டத்தட்ட 429 நாட்களுக்கு பிறகு விராட் கோலி டி20 கிரிக்கெட்டில் விளையாடுகிறார்.
கடந்த 2010 ஆம் ஆண்டு ஜிம்பாப்வே அணிக்கு எதிரான டி20 போட்டியின் மூலமாக டி20 கிரிக்கெட்டில் அறிமுகமான விராட் கோலி, கடைசியாக கடந்த 2022 ஆம் ஆண்டு இங்கிலாந்திற்கு எதிராக டி20 உலகக் கோப்பையில் இடம் பெற்று விளையாடினார். இதுவரையில் விராட் கோலி 115 டி20 போட்டிகளில் விளையாடி 4008 ரன்களும், ஒரு சதமும், 37 அரைசதமும் அடித்துள்ளார். இதில், அதிகபட்சமாக 122 ரன்கள் எடுத்துள்ளார் என்பது குறிப்பிடத்தக்கது.