உலக சுகாதார அமைப்பு பொது சுகாதார அவசர எச்சரிக்கையாக அறிவித்துள்ள Mpox Clade 1b மாறுபாட்டின் முதல் பாதிப்பு இந்தியாவில் கேரளாவில் உறுதி செய்யப்பட்டுள்ளது. அதன் அறிகுறிகள் என்னென்ன என்று இந்த பதிவில் பார்க்கலாம்.
Mpox Clade 1b மாறுபாட்டை உலக சுகாதார அமைப்பு பொது சுகாதார அவசர எச்சரிக்கையாக அறிவித்துள்ள நிலையில் இந்தியாவில் முதல் பாதிப்பு பதிவாகி உள்ளது. இந்த பாதிப்பு கேரளாவின் மலப்புரம் மாவட்டத்தில் உறுதி செய்யப்பட்டுள்ளதாக தகவல்கள் தெரிவிக்கின்றன.
Mpox வைரஸின் Clade 1b மாறுபாட்டை கொண்ட நோயாளி கேரளாவைச் சேர்ந்த 38 வயதான நபர் ஆவார். அவருக்கு வைரஸ் பாதிப்பு உறுதி செய்யப்பட்டதாக கூறப்படுகிறது. ஐக்கிய அரபு அமீரகத்தில் இருந்து அவர் சமீபத்தில் நாடு திரும்பிய நிலையில் அவருக்கு Mpox பாதிப்பு உறுதி செய்யப்பட்டுள்ளது. அவரின் உடல்நிலை தற்போது சீரான நிலையில் இருப்பதாகவும் தகவல்கள் தெரிவிக்கின்றன.
Mpox வைரஸ் குரங்கு அம்மை என்றும் அழைக்கப்படுகிறது. இந்த வைரஸ் தோல் புண்கள் அல்லது ஆடை அல்லது துணி போன்ற அசுத்தமான பொருட்களுடன் நேரடி தொடர்பு மூலம் பரவுகிறது. இதை ஏற்கனவே உலக சுகாதார அமைப்பு அதை சர்வதேச கவலையின் பொது சுகாதார அவசரநிலையாக அறிவித்தது.
முன்னதாக ஹரியானாவைச் சேர்ந்த 26 வயது ஆண் ஒருவர் மேற்கு ஆப்பிரிக்க Clade 2 வகை Mpox வைரஸ் பாதிப்பு உறுதி செய்யப்பட்டது. எனினும் இந்த மாறுபாடு WHO இன் அவசர எச்சரிக்கையின் கீழ் இல்லை. பாதிக்கப்பட்ட அந்த நோயாளி சனிக்கிழமை டிஸ்சார்ஜ் செய்யப்பட்டதாக கூறப்படுகிறது. இந்த சூழலில் தான் இந்தியாவின் முதல் Mpox Clade 1b பாதிப்பு கேரளாவில் பதிவாகி உள்ளது.
இந்த சூழலில் மத்திய சுகாதார அமைச்சகம் அனைத்து மாநிலங்களுக்கும் யூனியன் பிரதேசங்களுக்கும் பொது சுகாதாரத் தயார்நிலையை மேம்படுத்துமாறு அறிவுறுத்தியுள்ளது, நாடு முழுவதும் சந்தேகத்திற்கிடமான Mpox பாதிப்புகளை திரையிடுதல் மற்றும் சோதனை செய்வதில் கவனம் செலுத்துகிறது.
Mpox என்றால் என்ன?
Mpox என்பது பெரியம்மை போன்ற அறிகுறிகளைக் கொண்ட ஒரு வைரஸ் நோயாகும், ஆனால் குறைவான மருத்துவ தீவிரம் கொண்டது. எனினும் உலக அளவில் அதிகரித்து வரும் நோய்த்தொற்று காரணமாக கடந்த ஆகஸ்ட் மாதம் பொது சுகாதார அவசரநிலையாக உலக சுகாதார அமைப்பு அறிவித்தது. 2022 ஆம் ஆண்டு ஜூலை மாதமும் இந்த வைரஸை பொது சுகாதார அவசர நிலையாக அறிவித்தது.
அறிகுறிகள் என்ன?
உலக சுகாதார மையத்தின் கூற்றுப்படி Mpox இன் சில பொதுவான அறிகுறிகள்:
தோலில் சொறி அல்லது புண்கள்
காய்ச்சல்
தலைவலி
தசை வலிகள்
முதுகு வலி
குறைந்த ஆற்றல்
தொண்டை புண்
Mpox இன் அறிகுறிகள் ஒரு வாரத்தில் தொடங்கி 1 முதல் 21 நாட்கள் வரை வெளிப்படும். இந்த அறிகுறிகள் இரண்டு முதல் நான்கு வாரங்கள் வரை நீடிக்கும். பலவீனமான நோயெதிர்ப்பு அமைப்பு உள்ள ஒருவருக்கும் இது நீண்ட காலம் நீடிக்கலாம். முதலில் முகத்தில் தோன்றும் சொறி, இறுதியில் உள்ளங்கைகள் மற்றும் உள்ளங்கால்கள் உட்பட உடலுக்கு நகரும். முகத்தைத் தவிர, பிறப்புறுப்பு பகுதி உட்பட தொடர்பு ஏற்பட்ட இடத்திலிருந்து தொடங்கலாம்.
இந்த கொப்புளம் வலி அல்லது அரிப்புடன் இருக்கலாம்.. சொறி குணமான பிறகு, இந்த கொப்புளங்கள் உலர்ந்து, மேலோட்டமாக உருவாகி, இறுதியில் உதிர்ந்துவிடும். புண்கள் அல்லது கொப்புளங்களின் எண்ணிக்கை நோயாளிக்கு நோயாளி வேறுபடலாம். சிலருக்கு நூற்றுக்கணக்கான கொப்புளங்கள் இருக்கலாம், அதே நேரம் சிலருக்கு சில கொப்புளங்கள் மட்டுமே ஏற்படலாம். அவை உடலில் எங்கு வேண்டுமானாலும் தோன்றும், அதாவது இடுப்பு, பிறப்புறுப்புப் பகுதிகள், உள்ளங்கைகள் மற்றும் உள்ளங்கால்கள், முகம், வாய் அல்லது தொண்டை என எந்த பகுதியில் வேண்டுமானாலும் தோன்றலாம்.
புண்கள் ஆறாமல், தோலில் புதிய அடுக்கு உருவாகாமல் இருந்தால் மற்றவர்களுக்கு நோய் பரவும் வாய்ப்பு உள்ளது. இருப்பினும், சில நோயாளிகளுக்கு எந்த அறிகுறிகளையும் காட்டாமல் இருக்கலாம். அத்தகைய சந்தர்ப்பங்களில் தகவல் குறைவாக உள்ளது.
Mpox வைரஸ் ஒரு நோயாளி, அசுத்தமான பொருட்கள் அல்லது பாதிக்கப்பட்ட விலங்குகளுடன் நெருங்கிய தொடர்பு மூலம் பரவுகிறது. கர்ப்பமாக இருக்கும் போது ஒரு பெண்ணுக்கு வைரஸ் பாதிப்பு உறுதி செய்யப்பட்டால், குழந்தைக்கும் பாதிப்பு ஏற்படலாம்.
Mpox clade IIb இன் உலகளாவிய பாதிப்பு 2022 இல் தொடங்கியது. அந்த ஆண்டு சில ஆப்பிரிக்க நாடுகளில் தொடர்கிறது. ஆகஸ்ட் 2024 நிலவரப்படி, ஆப்பிரிக்கா மட்டுமின்றி பல நாடுகளிலும் வைரஸ் பதிவாகி உள்ளது.
Mpox வைரஸை எவ்வாறு தடுப்பது?
உலகளவில் Mpox வைரஸ் பரவுவதால் முன்னெச்சரிக்கை நடவடிக்கைகளை எடுப்பதன் முக்கியத்துவத்தை மருத்துவர்கள் வலியுறுத்துகின்றனர். Mpox முதன்மையாக தோலிலிருந்து தோலுக்கான தொடர்பு மூலம் பரவுகிறது. இந்த வைரஸ் அறிகுறிகள் கொண்ட எவருடனும் நெருங்கிய மற்றும் பாலியல் தொடர்பைத் தவிர்ப்பது தான் முக்கியமாக முன்னெச்சரிக்கை நடவடிக்கை ஆகும்.
சேனலை கிளிக் செய்து பின்தொடரவும்