Fridge Cleaning: பிரிட்ஜ் வெஜிடபிள் டிராயரை சுத்தம் செய்ய சூப்பர் டிப்ஸ்! பாக்டீரியாக்களை ஓட ஓட விரட்டலாம்!

Fridge Cleaning Tips: பிரிட்ஜின் காய்கறி டிராயரில் தங்கும் பாக்டீரியாக்கள் மற்றும் துர்நாற்றத்தைப் போக்க அவற்றை சுத்தம் செய்வது எப்படி? என விரிவாக பார்க்கலாம்.

பிரிட்ஜ் வெஜிடபிள் டிராயரைச் சுத்தம் செய்ய டிப்ஸ்

2023-ஆம் ஆண்டு 'Food Microbiology' இதழில் வெளியான ஓர் ஆய்வு முடிவு பலரையும் முகம் சுளிக்க வைத்தது. வீடுகளில் பயன்படுத்தப்படும் பிரிட்ஜின் காய்கறி வைக்கும் பெட்டிகளில் தீங்கு விளைவிக்கும் பாக்டீரியாக்கள் தங்கியிருப்பதே அந்த அதிர்ச்சித் தகவல். எனவே, பிரிட்ஜ் வெஜிடபிள் டிராயர் சுத்தம் என்பது வெறும் துணியால் துடைப்பதோடு முடிந்துவிடக் கூடாது.

எளிய பொருட்களே போதுமானது

விலை உயர்ந்த ரசாயனக் கலவைகள் இல்லாமல், சமையலறையில் உள்ள பொருட்களை வைத்தே பிரிட்ஜ் வெஜிடபிள் டிராயர் சுத்தம் செய்யும் பணியை எளிதாக முடிக்கலாம். முதலில் உள்ளே இருக்கும் காய்கறிகள், பழங்கள் அனைத்தையும் வெளியே எடுத்துவிட்டு, அழுகிய மற்றும் பூஞ்சை படிந்தவற்றை குப்பையில் வீசுங்கள். தயாரிப்பு நிறுவனத்தின் வழிகாட்டுதல்படி டிராயரை மெதுவாக வெளியே எடுக்க வேண்டும். சிரமமாக இருந்தால் வலுக்கட்டாயமாக இழுக்க வேண்டாம்.

வெதுவெதுப்பான நீரில் சிறிதளவு பாத்திரம் கழுவும் திரவத்தைக் கலந்து கொள்ளுங்கள். மைக்ரோஃபைபர் துணி அல்லது மென்மையான ஸ்பாஞ்ச் கொண்டு பெட்டியின் உட்புறம், அடிப்பகுதி என அனைத்தையும் துடைத்து எடுக்க வேண்டும். பிசுபிசுப்பான கறைகள் இருந்தால், சோப்பு நீரில் நனைத்த துணியை அதன்மீது சிறிது நேரம் ஊறவைத்துத் துடைப்பது நல்ல பலன் தரும்.

பேக்கிங் சோடா கைக்கொடுக்கும்

காய்கறிச் சாறு மற்றும் பழக்கழிவுகளால் ஏற்படும் துர்நாற்றத்தை விரட்ட பேக்கிங் சோடா கைக்கொடுக்கும். 1 அல்லது 2 டேபிள்ஸ்பூன் பேக்கிங் சோடாவை வெதுவெதுப்பான நீரில் கலந்து, அந்த கலவையால் பெட்டியைத் துடைக்கலாம். பிடிவாதமான கறைகளை மெதுவாகத் தேய்த்து அகற்றிய பின், சோப்பின் எச்சங்கள் போக சுத்தமான நீரால் கழுவ வேண்டும்.

பெட்டியின் கைப்பிடிகள், மூலைகள் மற்றும் சிறிய இடைவெளிகளில் அழுக்குகள் எளிதில் ஒளிந்துகொள்ளும். இவற்றைச் சுத்தம் செய்ய பழைய டூத் பிரஷ் அல்லது மென்மையான பிரஷைப் பயன்படுத்துவது புத்திசாலித்தனம். கடினமான கறைகள் மீது சோப்பு நீரைத் தடவி ஊறவிட்ட பிறகு தேய்க்கலாம். ஆனால் கூர்மையான பொருட்களைக் கொண்டு சுரண்டக் கூடாது.

டிராயரை மட்டும் கழுவிவிட்டு அப்படியே வைத்துவிட முடியாது. அது அமரும் பிரிட்ஜின் அடிப்பகுதி, பக்கவாட்டுச் சுவர்களிலும் அழுக்குகள் படிந்திருக்க வாய்ப்புள்ளது. வெதுவெதுப்பான சோப்பு நீரால் அந்த இடங்களைத் துடைத்துவிட்டு, பின்னர் ஈரத்துணியால் சுத்தப்படுத்த வேண்டும்.

இந்தச் செயல்பாட்டின்போது பிரிட்ஜின் மின்சாரப் பகுதிகள் மற்றும் காற்றோட்டத் துளைகளுக்குள் தண்ணீர் புகாமல் பார்த்துக்கொள்வது மிக முக்கியம். உலர்ந்த துணியைக் கொண்டு மீதமுள்ள ஈரப்பதத்தையும் முழுமையாகத் துடைத்து எடுக்க வேண்டும்.

உலர்த்துவதும் தொடர் பராமரிப்பும்

கழுவிய பெட்டியை ஈரம் காயாமல் அப்படியே மீண்டும் உள்ளே வைப்பது பூஞ்சை வளர்ச்சிக்கு நாமே வழிவகுப்பது போலாகும். சுத்தமான துணியால் துடைத்து, காற்றோட்டமான இடத்தில் முழுமையாக உலர வைக்க வேண்டும். பிரிட்ஜின் உட்புறமும் பெட்டியும் ஈரம் காய்ந்த பிறகே மீண்டும் பொருத்தப்பட வேண்டும்.

மாதத்திற்கு ஒருமுறையாவது இப்படி முழுமையாகச் சுத்தம் செய்வதை வழக்கமாக்கிக் கொள்ளுங்கள். கழுவிய காய்கறிகளை ஈரம் காயாமல் நீண்ட நேரம் மூடிய பெட்டியில் வைப்பதைத் தவிர்க்க வேண்டும். சிந்தும் உணவுப் பொருட்களை உடனுக்குடன் வெதுவெதுப்பான சோப்பு நீரால் துடைத்துச் சுத்தம் செய்ய வேண்டும் என அமெரிக்க வேளாண்மைத் துறையின் உணவுப் பாதுகாப்புப் பிரிவு பரிந்துரைக்கிறது.