Toilet Cleaning Tips: டாய்லெட் கறைகளுக்கு எண்ட் கார்டு.. இந்த ஒரு பொருள் போதும்.. சூப்பர் டிப்ஸ்!

Toilet Cleaning Tips: டாய்லெட் மற்றும் குழாய்களில் உள்ள பிடிவாதமான மஞ்சள் கறை மற்றும் உப்புக்கறைகளை நீக்க வெள்ளை வினிகர் அருமருந்தாகும். இது தொடர்பான முழு விவரங்களை இந்த செய்தியில் பார்க்கலாம்.

டாய்லெட் கறைகளை சுத்தம் செய்ய டிப்ஸ்

வீடுகளில் கடின நீர் பயன்பாட்டால் டாய்லெட் கறை மற்றும் குழாய்களில் படியும் வெள்ளை நிற சுண்ணாம்புப் படிவங்கள் பெரும் தலைவலியாக இருக்கும். இந்த பிடிவாதமான டாய்லெட் கறை மற்றும் மஞ்சள் வளையங்களை நீக்க கடுமையான ரசாயனங்களை நாட வேண்டியதில்லை. வீட்டில் சமையலுக்குப் பயன்படுத்தும் காய்ச்சி வடிகட்டிய வெள்ளை வினிகர் ஒன்றே இதற்குப் போதுமானது. வினிகரில் உள்ள அசிட்டிக் அமிலம், கறைகளுக்குக் காரணமான கால்சியம் கார்பனேட்டுடன் வினைபுரிந்து அவற்றை எளிதாகத் தளர்த்துகிறது. இதை எப்படிச் சரியாகப் பயன்படுத்துவது என்பதைப் பார்ப்போம்.

டாய்லெட்டில் உள்ள மஞ்சள் வளையங்களை சுத்தம் செய்ய

நீண்ட நாட்களாகப் படிந்திருக்கும் கறைகளை நீக்க, முதலில் 1 முதல் 2 கப் வெள்ளை வினிகரை டாய்லெட் பவுலுக்குள் ஊற்ற வேண்டும். விளிம்புகளின் அடிப்பகுதியிலும் கறை படிந்த இடங்களிலும் இது படும்படி ஊற்றுவது அவசியம். தண்ணீர் மட்டத்திற்கு மேலே உள்ள கறைகளுக்கு, காகிதத் துண்டுகளை வினிகரில் நனைத்து அந்த இடங்களில் ஒட்டி வைக்கலாம்.

இப்படிச் செய்வதால் வினிகர் உடனடியாகக் கீழே வழியாமல் கறையின் மீது தொடர்ந்து செயல்படும். குறைந்தது 3 முதல் 4 மணி நேரம் வரை இதை அப்படியே விட்டுவிட வேண்டும். கறை மிகவும் கடினமாக இருந்தால் இரவு முழுவதும் ஊறவிடுவது நல்ல பலனைத் தரும். ஊறிய பிறகு வழக்கமான டாய்லெட் பிரஷ் கொண்டு உட்புறத்தை லேசாகத் தேய்த்தாலே கறைகள் எளிதில் வந்துவிடும். பின்னர் தண்ணீரை ஃப்ளஷ் செய்துவிடலாம்.

பேக்கிங் சோடா சேர்க்கலாமா?

சிலர் வினிகருடன் பேக்கிங் சோடாவையும் சேர்த்துப் பயன்படுத்துவார்கள். ஆனால், இவை இரண்டும் ஒன்றாகச் சேரும்போது வினிகரின் அமிலத்தன்மை குறைந்துவிடும். எனவே, கடினமான கறைகளுக்கு வினிகரை மட்டும் தனியாகப் பயன்படுத்துவதே சிறந்தது.

குழாய்களில் உள்ள உப்புக்கறையை நீக்கும் முறை

சமையலறை மற்றும் குளியலறை குழாய்களில் உள்ள கறைகளை நீக்க, ஒரு மென்மையான துணியை வினிகரில் நனைத்து குழாயைச் சுற்றி இறுக்கமாகக் கட்ட வேண்டும். துணி காயாமல் ஈரமாகவே இருப்பதை உறுதி செய்துகொள்ளுங்கள். குழாயின் முனைப்பகுதியில் மட்டும் கறை இருந்தால், ஒரு சிறிய பிளாஸ்டிக் பையில் வினிகரை ஊற்றி, முனையை அதில் மூழ்கும்படி வைத்து ரப்பர் பேண்ட் போட்டு கட்டலாம். சுமார் 15 முதல் 30 நிமிடங்கள் கழித்துத் துணியை அகற்றிவிட்டு, பழைய பல் துலக்கும் பிரஷ்ஷால் தேய்க்க வேண்டும். பின்னர் சுத்தமான தண்ணீரால் கழுவி, மைக்ரோஃபைபர் துணியால் துடைத்துவிட்டால் குழாய் புதிது போல மின்னும்.

இதை கவனத்தில் கொள்ளுங்க‌

வினிகரை எந்தக் காரணத்தைக் கொண்டும் ப்ளீச் அல்லது குளோரின் கலந்த கிளீனர்களுடன் சேர்க்கக் கூடாது. அப்படிச் செய்தால் ஆபத்தான வாயுக்கள் வெளியேறும் அபாயம் உள்ளது. சுத்தம் செய்யும்போது கையுறைகளை அணிந்துகொள்வதும், அறையில் நல்ல காற்றோட்டம் இருப்பதும் பாதுகாப்பானது.

பளிங்கு, இயற்கைக் கல் மற்றும் சில உலோகப் பரப்புகளில் வினிகரைப் பயன்படுத்தும் முன், சிறிய இடத்தில் தடவிப் பரிசோதிப்பது நல்லது. கறைகள் மீண்டும் படிவதைத் தவிர்க்க, குழாய்களைப் பயன்படுத்திய பின் காய்ந்த துணியால் துடைக்கும் பழக்கத்தை ஏற்படுத்திக்கொள்ளலாம்.