Gardening Tips: கோடை வெயிலில் செடிகளுக்கு எப்போது தண்ணீர் ஊற்ற வேண்டும்? இந்த நேரத்தை மட்டும் மிஸ் பண்ணாதீங்க!

கோடைக்காலத்தில் செடிகளுக்கு அதிகமாக தண்ணீர் ஊற்றுவது பாதிப்பை ஏற்படுத்தும். என்னென்ன செய்ய வேண்டும் என்பதை விரிவாக பார்க்கலாம்.

கோடை செடி பராமரிப்பு

கோடைக்காலம் வந்துவிட்டாலே, “செடிகளுக்கும் தாகம் இருக்கும்” என்று நினைத்து அதிகமாக தண்ணீர் ஊற்றுவது பலரின் வழக்கம். ஆனால் இதுவே செடிகளுக்கு பெரிய பாதிப்பை உண்டாக்கும். சில நாட்களில் இலைகள் மஞ்சளாகி உதிர்வதும், செடி சோர்ந்து போவதும் அதிக தண்ணீரின் விளைவாகத்தான் நடக்கும். எனவே, வெயிலில் செடியை காப்பாற்ற தண்ணீர் அவசியம் என்றாலும், அதை சரியான அளவிலும் நேரத்திலும் கொடுக்க வேண்டும்.

செடிகளுக்கு தண்ணீர் ஊற்றுவதற்கான சிறந்த நேரம் அதிகாலை. காலை 6 முதல் 8 மணி வரை ஊற்றினால், மண் மெதுவாக ஈரத்தை உறிஞ்சிக் கொள்ளும். இதனால் செடி நாள் முழுவதும் சீராக இருக்கும். காலை நேரம் சாத்தியமாகவில்லை என்றால், மாலை சூரியன் மறைந்த பின் தண்ணீர் ஊற்றலாம். ஆனால் இலைகள் ஈரமாக இருக்காமல் பார்த்துக் கொள்ள வேண்டும், இல்லை என்றால் பூஞ்சை நோய் தாக்கும் அபாயம் உள்ளது.

தண்ணீர் ஊற்றும் நேரம்

மதியம் 12 முதல் 3 மணி வரை தண்ணீர் ஊற்றுவது மிகப்பெரிய தவறு. அந்த நேரத்தில் மண் மிகவும் சூடாக இருக்கும். குளிர்ந்த நீர் வேர்களுக்கு அதிர்ச்சியை ஏற்படுத்தும். மேலும், இலைகளில் தண்ணீர் இருந்தால், சூரிய ஒளி அதைப் பெரிதாக்கி இலைகளை சேதப்படுத்தும். அதே போல் இரவு நேரத்தில் தண்ணீர் ஊற்றினால், மண் நீண்ட நேரம் ஈரமாக இருந்து வேர்கள் அழுகும் அபாயம் அதிகரிக்கும்.

செடிக்கு உண்மையில் தண்ணீர் தேவையா என்பதை அறிய சில எளிய முறைகள் உள்ளன. மண்ணில் விரலை நுழைத்து பார்த்தால், அது காய்ந்திருந்தால் மட்டும் தண்ணீர் ஊற்றுங்கள். இலைகள் வாடி சுருங்கினால் தண்ணீர் குறைவு; மஞ்சளாக இருந்தால் அதிக தண்ணீர் என அறியலாம். மேலும், தொட்டியை தூக்கிப் பார்த்து அதன் எடையைக் கவனித்தாலும் மண் நிலையைப் புரிந்து கொள்ளலாம்.

தோட்ட டிப்ஸ்

தண்ணீர் ஊற்றும் முறையும் முக்கியம். எப்போதும் வேர்ப்பகுதியில் மெதுவாக ஊற்ற வேண்டும்; இலைகளில் நேரடியாக ஊற்ற வேண்டாம். தினமும் சிறிது சிறிதாக அல்லாமல், 2-3 நாட்களுக்கு ஒருமுறை நன்றாக ஊற்றினால் வேர்கள் ஆழமாக வளரும். மேலும், மண்ணின் மேல் உலர்ந்த இலைகள் போட்டு மூடுவது, செடிகளை நிழலில் வைப்பது, தொட்டிகளை ஒன்றாக வைப்பது போன்ற முறைகள் கோடையில் ஈரப்பதத்தை பாதுகாக்க உதவும். சரியான பராமரிப்புடன், கடும் வெயிலிலும் உங்கள் செடிகள் பசுமையாக வளரும்.