ஆபரேஷன் சிந்தூரில் அசத்திய 400 விஞ்ஞானிகள்! இஸ்ரோ தலைவர் நாராயணன் பெருமிதம்!

ஆபரேஷன் சிந்தூர் நடவடிக்கையின்போது 400-க்கும் மேற்பட்ட இஸ்ரோ விஞ்ஞானிகள் இரவு பகலாக உழைத்து முழு ஆதரவு அளித்துள்ளனர். அனைத்து செயற்கைக்கோள்களும் 24 மணி நேரமும் சிறப்பாகச் செயல்பட்டன.

ஆபரேஷன் சிந்தூர் பற்றி இஸ்ரோ தலைவர் பேச்சு

நாட்டின் பாதுகாப்புக்கான ஆபரேஷன் சிந்தூர் நடவடிக்கையின்போது, புவி கண்காணிப்பு மற்றும் தகவல் தொடர்பு செயற்கைக்கோள்களைப் பயன்படுத்தி 400-க்கும் மேற்பட்ட இஸ்ரோ விஞ்ஞானிகள் இரவு பகலாக உழைத்து முழு ஆதரவு அளித்துள்ளனர் என்று இஸ்ரோ தலைவர் வி. நாராயணன் தெரிவித்தார்.

அகில இந்திய மேலாண்மை சங்கத்தின் (AIMA) 52-வது தேசிய மேலாண்மை மாநாட்டில் உரையாற்றிய இஸ்ரோ தலைவர், "ஆபரேஷன் சிந்தூர் நடவடிக்கையின்போது, அனைத்து செயற்கைக்கோள்களும் 24 மணி நேரமும், எந்தவொரு தேவைக்கும் ஏற்றவாறு சிறப்பாகச் செயல்பட்டன" என்றார்.

“400-க்கும் மேற்பட்ட விஞ்ஞானிகள் 24 மணி நேரமும் முழு நேரமாகப் பணியாற்றினர், மேலும் புவி கண்காணிப்பு மற்றும் தகவல் தொடர்புக்காகப் பயன்படுத்தப்பட்ட அனைத்து செயற்கைக்கோள்களும் இந்த நடவடிக்கையின்போது சிறப்பாகச் செயல்பட்டன" என்றும் இஸ்ரோ தலைவர் மேலும் கூறினார்.

ககன்யான் திட்டத்திற்கு 2,300 சோதனைகள்

ட்ரோன்கள் மற்றும் வான் பாதுகாப்பு அமைப்புகளான உள்நாட்டில் உருவாக்கப்பட்ட ‘ஆகாஷ் தீர்’ போன்ற ஆயுதங்கள் பயன்படுத்தப்பட்ட ‘ஆபரேஷன் சிந்தூர்’ நடவடிக்கையின்போது, ஆயுத மோதல்களில் விண்வெளித் துறையின் பங்கு பெரிதும் கவனத்தை ஈர்த்தது.

இஸ்ரோவின் ககன்யான் திட்டத்தின் கீழ், 2027-ம் ஆண்டுக்குள் இந்தியாவின் முதல் மனித விண்வெளிப் பயணத்தை நிறைவேற்ற திட்டமிடப்பட்டுள்ளது. இந்தத் திட்டத்தின் கீழ் இதுவரை 7,700 தரை சோதனைகள் நிறைவடைந்துள்ளன. மனித விண்வெளிப் பயணத்திற்கு முன் மேலும் 2,300 சோதனைகள் நடத்த திட்டமிடப்பட்டுள்ளது.

இந்தியாவின் விண்வெளி நிலையம்

ககன்யான் திட்டத்தின் கீழ், மூன்று ஆளில்லா விண்வெளிப் பயணங்களை மேற்கொள்ள இஸ்ரோ திட்டமிட்டுள்ளது. அதில் முதல் பயணம் இந்த ஆண்டு டிசம்பரில் நடைபெறும் என்று எதிர்பார்க்கப்படுகிறது.

பிரதமர் நரேந்திர மோடி, 2035-ம் ஆண்டுக்குள் இந்தியாவின் சொந்த விண்வெளி நிலையத்தை அமைக்கவும், 2040-ம் ஆண்டுக்குள் இந்திய விண்வெளி வீரரை நிலவில் தரையிறக்கவும் இஸ்ரோவுக்கு இலக்கு நிர்ணயித்துள்ளார் என்பது குறிப்பிடத்தக்கது.