Vendakkai Thuvaiyal : நாவில் நடனமாடும் வெண்டைக்காய் துவையல்..இப்படி ஒருமுறை செய்து பாருங்க!

Vendakkai Thuvaiyal : வெண்டைக்காயை வைத்து சுவையான காரசாரமான துவையல் செய்வது எப்படி? உளுந்து, கடலைப்பருப்பு, வரமிளகாய், தேங்காய் சேர்த்து மணமாகத் தயாரிக்கும் இந்த வெண்டைக்காய் துவையல், சூடான சாதத்துடன் சாப்பிட அட்டகாசமாக இருக்கும். எளிய செய்முறை இதோ.

வெண்டைக்காய் துவையல் செய்வது எப்படி?

வெண்டைக்காயை வழக்கமாக சாம்பார், பொரியல் என்று செய்து சாப்பிட்டு அலுத்துவிட்டதா? அப்படியானால், இந்த முறை வெண்டைக்காயை வைத்து நாவூற வைக்கும் காரசாரமான துவையல் செய்து பாருங்கள்.

புளியின் புளிப்பு, வரமிளகாயின் காரம், தேங்காயின் சுவை, வறுத்த பருப்பு வகைகளின் மணம் என அனைத்தும் சேர்ந்து இந்தத் துவையலுக்கு தனி ருசியைக் கொடுக்கும்.

குறிப்பாக, சூடான சாதத்தில் ஒரு ஸ்பூன் நல்லெண்ணெய் ஊற்றி, இந்த வெண்டைக்காய் துவையலைப் பிசைந்து சாப்பிட்டால், இன்னும் கொஞ்சம் சாதம் கேட்கத் தோன்றும். வீட்டில் வெண்டைக்காய் இருந்தால், இந்த ரெசிபியை ஒருமுறை செய்து பாருங்கள்.

வெண்டைக்காய் துவையல் செய்யத் தேவையான பொருள்கள்

வெண்டைக்காய் - 200 கிராம்

எண்ணெய் - 2 டீஸ்பூன்

உளுந்து - 1 டேபிள்ஸ்பூன்

கடலைப்பருப்பு - 1 டேபிள்ஸ்பூன்

மல்லி விதை - 1 டீஸ்பூன்

காய்ந்த வரமிளகாய் - 3 முதல் 5

பூண்டு - 3 பல்

சின்ன வெங்காயம் - – 6 முதல் 8

புளி - சிறிய நெல்லிக்காய் அளவு

துருவிய தேங்காய் - 1\4 கப்

கொத்தமல்லித் தழை - சிறிதளவு

உப்பு - தேவையான அளவு

வெண்டைக்காய் துவையல் செய்முறை - படி 1

வெண்டைக்காயை வதக்கவும்

முதலில் வெண்டைக்காயை நன்றாகக் கழுவி, ஈரமில்லாமல் துடைத்து சிறு துண்டுகளாக நறுக்கிக்கொள்ளவும். கடாயில் 2 டீஸ்பூன் எண்ணெய் ஊற்றி, நறுக்கிய வெண்டைக்காயை மட்டும் சேர்த்து வதக்கவும். அதன் பிசுபிசுப்புத் தன்மை குறைந்து, வெண்டைக்காய் நன்கு வதங்கியதும் தனியாக எடுத்து வைக்கவும்.

படி 2

பருப்பு வகைகளை வறுக்கவும்

அதே கடாயில் சிறிதளவு எண்ணெய் ஊற்றி, உளுந்து, கடலைப்பருப்பு, மல்லி விதை, காய்ந்த வரமிளகாய் ஆகியவற்றைச் சேர்த்து மிதமான தீயில் வாசனை வரும் வரை வறுக்கவும். பருப்புகள் கருகிவிடாமல் பார்த்துக்கொள்ளவும்.

படி 3

மற்ற பொருள்களைச் சேர்க்கவும்

இப்போது பூண்டு, தோலுரித்த சின்ன வெங்காயம், புளி, துருவிய தேங்காய் ஆகியவற்றைச் சேர்த்து நன்றாக வதக்கவும். வெங்காயம் சற்று வதங்கி, தேங்காயின் பச்சை வாசனை நீங்கியதும் உப்பு மற்றும் கொத்தமல்லித் தழையைச் சேர்த்து கிளறிவிட்டு அடுப்பை அணைக்கவும்.

படி 4

துவையலாக அரைக்கவும்

வதக்கிய பொருள்களை ஒரு தட்டில் மாற்றி நன்றாக ஆறவிடவும். சூடாக இருக்கும்போதே மிக்ஸியில் அரைத்தால் சுவையும் பதமும் மாறக்கூடும் என்பதால், ஆறிய பிறகு அரைப்பது நல்லது.

படி 5

முதலில் ஆறிய பருப்பு, மசாலா கலவையை மிக்ஸி ஜாரில் போட்டு அரைக்கவும். பிறகு வதக்கிய வெண்டைக்காயையும் சேர்த்து, கெட்டியான துவையல் பதத்திற்கு அரைத்து எடுத்துக்கொள்ளவும்.

படி 6

சுவையான வெண்டைக்காய் துவையல் தயார்

சூடான சாதத்தில் இந்தத் துவையலைச் சேர்த்து, சிறிதளவு நல்லெண்ணெய் ஊற்றிப் பிசைந்து சாப்பிட்டுப் பாருங்கள். அப்பளம், வடகம் அல்லது வறுத்த மோர் மிளகாயுடன் சேர்த்துச் சாப்பிட்டாலும் அருமையாக இருக்கும்.

வெண்டைக்காய் துவையல் சுவையாக வர சில குறிப்புகள்

பிசுபிசுப்பு குறைய: வெண்டைக்காயைக் கழுவிய பிறகு முழுமையாகத் துடைத்து நறுக்கவும். பின்னர் நன்றாக வதக்கவும்.

காரத்தை மாற்றலாம்: மிதமான காரம் விரும்பினால் 2 - 3 வரமிளகாயும், அதிக காரம் விரும்பினால் 4 - 5 வரமிளகாயும் சேர்க்கலாம்.

 புளிப்பு சரியாக இருக்க: புளியை அதிகமாகச் சேர்க்க வேண்டாம். வெண்டைக்காயின் சுவையை மறைக்காத அளவில் சேர்க்கவும்.

தண்ணீர் கவனம்: துவையல் கெட்டியாக இருந்தால்தான் சாதத்தில் பிசைந்து சாப்பிட நன்றாக இருக்கும். எனவே தண்ணீர் சேர்க்காமல் அல்லது மிகக் குறைவாகச் சேர்த்து அரைக்கவும்.

சேமிப்பு: தேங்காய் சேர்ப்பதால் புதிதாக அரைத்துச் சாப்பிடுவது சிறந்தது. மீதமிருந்தால் காற்றுப் புகாத பாத்திரத்தில் குளிர்சாதனப் பெட்டியில் வைத்து, விரைவில் பயன்படுத்தவும்.

வெண்டைக்காய் துவையலுக்கு ஏற்ற உணவுகள்

1. சூடான சாதம் மற்றும் நல்லெண்ணெய்

2. தயிர் சாதம்

3. இட்லி, தோசை

4. கஞ்சி மற்றும் எளிய மதிய உணவு

வெண்டைக்காயை வழக்கமான பொரியலாகச் செய்யாமல், இப்படித் துவையலாக மாற்றினால் வீட்டில் உள்ளவர்களுக்கும் ஒரு வித்தியாசமான சுவை கிடைக்கும். குறிப்பாக, காரசாரமான துவையல் விரும்புபவர்கள் இந்த ரெசிபியைத் தவறவிடாதீர்கள்.