Tiruchendur Thirupagam Sweet : திருச்செந்தூர் முருகன் கோவில் ஸ்பெஷல் திருப்பாகம்.. கந்த சஷ்டிக்கு வீட்டிலேயே செய்து பாருங்க!

 Thirupagam Sweet : கந்த சஷ்டியை முன்னிட்டு திருச்செந்தூர் முருகன் கோவில் பிரசாதமான திருப்பாகத்தை வீட்டிலேயே எளிமையாகச் செய்வது எப்படி? தேவையான பொருட்கள், பக்குவமான செய்முறை மற்றும் சுவையான பிரசாதம் தயாரிக்கும் குறிப்புகளை இங்கே தெரிந்துகொள்ளுங்கள்.

திருப்பாகம்

முருகப்பெருமானுக்கு உகந்த கந்த சஷ்டி திருநாளில், விரதம் இருந்து முருகனை வழிபடுவது மட்டுமல்லாமல், அவருக்குப் பிடித்தமான இனிப்புகளை நைவேத்தியமாகப் படைத்து வழிபடுவதும் சிறப்பானதாகக் கருதப்படுகிறது. அதிலும் குறிப்பாக, அறுபடை வீடுகளில் ஒன்றான திருச்செந்தூர் சுப்பிரமணிய சுவாமி திருக்கோவிலில் பிரசாதமாக வழங்கப்படும் திருப்பாகத்திற்கு தனி மகத்துவம் உண்டு.

திருச்செந்தூர் கந்த சஷ்டி விழாவின்போது முருகப்பெருமானுக்குப் படைக்கப்படும் சிறப்புப் பிரசாதம் திருப்பாகம்.பால், சர்க்கரை, நெய் உள்ளிட்ட எளிய பொருட்களைக் கொண்டு தயாரிக்கப்படும் இந்தத் திருப்பாகம், வாயில் வைத்ததும் கரையும் அளவுக்கு மென்மையான சுவையைக் கொண்டது.

கோவிலில் முருகப்பெருமானுக்குப் படைக்கப்படும் இந்தப் பிரசாதத்தை வீட்டிலேயே செய்து, கந்த சஷ்டி நாளில் வேலவனுக்கு நைவேத்தியம் செய்து வழிபடலாம். குழந்தைகள் முதல் பெரியவர்கள் வரை அனைவரும் விரும்பிச் சாப்பிடும் இந்தத் திருப்பாகத்தை எப்படிச் செய்வது என்று பார்க்கலாம்.

கந்த சஷ்டி: சூரசம்ஹாரத்தின் சிறப்புகள்

கந்த சஷ்டி என்பது முருகப்பெருமானின் வீரத்தையும், தீமையை அழித்து நன்மையை நிலைநாட்டிய திருப்பெருமையையும் போற்றும் முக்கியமான திருவிழாவாகும். ஐப்பசி மாத வளர்பிறை பிரதமை முதல் சஷ்டி வரை ஆறு நாட்கள் கந்த சஷ்டி விரதம் கடைப்பிடிக்கப்படுகிறது.

இந்த ஆறு நாட்களும் பக்தர்கள் முருகப்பெருமானை நினைத்து விரதம் இருந்து, கந்த சஷ்டி கவசம், திருப்புகழ் உள்ளிட்ட பாடல்களைப் பாடி வழிபடுவார்கள்.

சூரசம்ஹாரம் என்றால் என்ன?

தேவர்களைத் துன்புறுத்தி வந்த சூரபத்மன் என்ற அசுரனை அழித்து, தேவர்களைக் காப்பாற்ற முருகப்பெருமான் போரிட்ட நிகழ்வே சூரசம்ஹாரம் என்று அழைக்கப்படுகிறது. பார்வதி தேவியிடம் இருந்து ஞானவேல் பெற்ற முருகப்பெருமான், சூரபத்மனுடன் போரிட்டு அவனை வதம் செய்தார். இறுதியில் சூரபத்மன் மயிலாகவும் சேவலாகவும் மாறியதாகவும், அவற்றை முறையே தனது வாகனமாகவும் கொடியாகவும் முருகப்பெருமான் ஏற்றுக்கொண்டதாகவும் கந்த புராணம் கூறுகிறது.

சூரசம்ஹாரம் என்பது ஆணவம், அகங்காரம், தீய எண்ணங்கள் போன்றவற்றை அழித்து நன்மை வெற்றி பெறுவதைக் குறிக்கும் ஆன்மிக நிகழ்வாகவும் பக்தர்களால் போற்றப்படுகிறது.

சூரசம்ஹாரம் நடைபெறும் நேரம்

தேதி: நவம்பர் 15, 2026 – ஞாயிற்றுக்கிழமை

முக்கிய நிகழ்வு: சூரசம்ஹாரம்

திருச்செந்தூரில் மாலை சுமார் 4 மணியளவில் சூரசம்ஹார நிகழ்வு தொடங்கும் என அறிவிக்கப்பட்டுள்ளது.

நவம்பர் 16: திருக்கல்யாணம்.

திருப்பாகம் செய்வதற்குத் தேவையான பொருட்கள்

• கடலை மாவு - 1 கப்
• சர்க்கரை - 2 1\2 கப்
• பால் - 1 கப்
• நெய் - 1 கப்
• முந்திரி பருப்பு - 1 கப்
• குங்குமப்பூ - சிறிதளவு
• ஏலக்காய் தூள் - சிறிதளவு

திருப்பாகம் செய்முறை - படி 1

முந்திரி பொடி தயார் செய்தல்

முதலில் முந்திரி பருப்பை மிக்ஸியில் போட்டு நைசாகப் பொடித்து வைத்துக்கொள்ளவும். முந்திரியை வறுக்க வேண்டிய அவசியமில்லை. பொடியாக அரைத்தால் திருப்பாகத்தில் நன்றாகக் கலந்துவிடும்.

படி 2

மாவுக் கலவையைத் தயாரித்தல்

ஒரு அகலமான, அடி கனமான பாத்திரத்தை எடுத்துக்கொள்ளவும். அதில் கடலை மாவு, சர்க்கரை, பால், ஏலக்காய் தூள் மற்றும் குங்குமப்பூ சேர்க்கவும். கட்டிகள் இல்லாமல் நன்றாகக் கரைத்து கலக்கவும்.

படி 3

முந்திரிப் பொடி சேர்த்தல்

தயாரித்து வைத்துள்ள முந்திரிப் பொடியை இந்தக் கலவையில் சேர்த்து நன்றாகக் கலக்கவும்.

படி 4

மாவு, சர்க்கரை, பால், முந்திரி அனைத்தும் ஒன்றாகக் கலந்திருக்க வேண்டும்

படி 5

அடுப்பில் வைத்து கிளறுதல்

இப்போது பாத்திரத்தை அடுப்பில் வைத்து மிதமான தீயில் தொடர்ந்து கிளறவும். அடிப்பிடிக்காமல் இருக்க இடைவிடாமல் கிளறுவது மிகவும் முக்கியம். கலவை மெதுவாகக் கெட்டியாகத் தொடங்கும்.

படி 6

நெய் சேர்த்தல்

கலவை கெட்டியாகத் தொடங்கியதும் நெய்யைச் சிறிது சிறிதாகச் சேர்த்துக் கிளறவும். ஒரே நேரத்தில் மொத்த நெய்யையும் ஊற்றாமல், இரண்டு அல்லது மூன்று ஸ்பூன் வீதம் சேர்த்து நன்றாகக் கிளறுவது நல்லது.

படி 7

திருப்பாகம் பதம் வருதல்

கலவை நன்றாகச் சுருண்டு, அல்வா போன்ற மென்மையான பதத்திற்கு வரும்போது மீதமுள்ள நெய்யையும் தேவைக்கேற்ப சேர்த்து நன்றாகக் கிளறவும். கலவை பாத்திரத்தில் ஒட்டாமல் வரத் தொடங்கும்போது அடுப்பை அணைக்கவும்.

படி 8

பரிமாறுதல்

சூடாக இருக்கும்போதே ஒரு கிண்ணத்தில் மாற்றவும். சிறிது ஆறியதும் திருப்பாகம் சாப்பிடத் தயாராகிவிடும். மணமும் சுவையும் நிறைந்த திருச்செந்தூர் முருகன் பிரசாதம் வீட்டிலேயே தயார்.

திருப்பாகம் சுவையாக வருவதற்கான முக்கியக் குறிப்புகள்

• கடலை மாவில் கட்டிகள் இல்லாமல் பால் சேர்த்துக் கரைக்க வேண்டும்.
• அடி கனமான பாத்திரத்தைப் பயன்படுத்தினால் அடிப்பிடிப்பதைத் தவிர்க்கலாம்.
• மிதமான தீயில் மட்டுமே சமைக்க வேண்டும்.
• நெய்யைச் சிறிது சிறிதாகச் சேர்த்துக் கிளற வேண்டும்.
• அதிக நேரம் அடுப்பில் வைத்தால் திருப்பாகம் கடினமாகிவிடலாம்.
• மென்மையான அல்வா பதம் வந்ததும் அடுப்பிலிருந்து இறக்க வேண்டும்.

திருப்பாகத்தின் சிறப்புகள் என்ன?

திருப்பாகம் என்பது திருச்செந்தூர் முருகப்பெருமான் கோவிலுடன் தொடர்புடைய பிரசித்தி பெற்ற இனிப்புப் பிரசாதமாகும். கடலை மாவு, பால், சர்க்கரை, நெய், முந்திரி ஆகியவற்றின் சேர்க்கையால் தனித்துவமான சுவையையும் மணத்தையும் கொண்டுள்ளது.

மற்ற அல்வா வகைகளைப் போல இல்லாமல், இது மென்மையான பதத்தில் தயாரிக்கப்படுவது இதன் தனிச்சிறப்பாகும். முருகப்பெருமானுக்கு நைவேத்தியம் செய்து, குடும்பத்தினருக்கும் பக்தர்களுக்கும் பிரசாதமாகப் பகிர்ந்து கொடுக்கலாம்.

திருச்செந்தூர் முருகப்பெருமானின் அருளைப் பெறும் இந்தப் புனித கந்த சஷ்டி நாளில், வீட்டிலேயே திருப்பாகம் செய்து வேலவனுக்கு நைவேத்தியம் படைத்து குடும்பத்தினருடன் பிரசாதமாகப் பகிர்ந்து மகிழுங்கள்.