கீல்வாதம், இடுப்பு வலியை போக்கும் மருந்து: மொறுமொறு முடக்கத்தான் கீரை தோசை செய்வது எப்படி?

முடக்கத்தான் கீரை முடக்குவாதம், கீல்வாதம், மூட்டு மற்றும் இடுப்பு வலி போன்ற நாள்பட்ட உடல் உபாதைகளுக்குத் தீர்வு தரும் மிகச்சிறந்த இயற்கை மூலிகையாகும். மாவு அரைக்கும் பதம் முதல் மொறுமொறு தோசை வரை எப்படி என்று பார்ப்போம்.

மூட்டு வலிக்கு முடக்கத்தான் கீரை தோசை

முடக்கத்தான் கீரை என்ற பெயரிலேயே அதன் அரிய மருத்துவக் குணம் அடங்கியுள்ளது. முடக்குகின்ற வாதத்தை அறுக்கும் ஆற்றல் கொண்டதால் இதற்கு 'முடக்கத்தான்' என்ற பெயர் வந்தது. முடக்குவாதம், கீல்வாதம், நாள்பட்ட மூட்டு வலி மற்றும் இடுப்பு வலி ஆகியவற்றிற்கு இது ஒரு மிகச்சிறந்த இயற்கை அருமருந்தாகும். குறிப்பாக, மூட்டுத் தேய்மானம் மற்றும் உடல் வலியால் அவதிப்படும் முதியவர்களுக்கு இக்கீரை ஒரு வரப்பிரசாதம்.

கசப்புத் தன்மை கொண்ட இக்கீரையை வழக்கமான உணவில் சேர்த்துக் கொள்வது சற்று சவாலானது. ஆனால், சுவையான மற்றும் மொறுமொறுப்பான தோசையாகச் செய்து கொடுத்தால் குழந்தைகள் முதல் பெரியவர்கள் வரை அனைவரும் விரும்பிச் சாப்பிடுவார்கள். முடக்கத்தான் கீரை தோசை தயாரிக்கும் எளிய செய்முறை பற்றி பார்ப்போம்.

தேவையான பொருட்கள்

பச்சரிசி 3 கப்

உளுந்து 1 கப்

வெந்தயம் 1 மேஜைக்கரண்டி

முடக்கத்தான் கீரை (சுத்தம் செய்தது) 2 கப்

ஈஸ்ட் 1 மேஜைக்கரண்டி

எண்ணெய் தேவையான அளவு

உப்பு தேவையான அளவு

தண்ணீர் தேவையான அளவு

செய்முறை விளக்கம் - 1

பச்சரிசி, உளுந்து மற்றும் வெந்தயம் ஆகிய மூன்றையும் நன்கு கழுவி, 8 கப் தண்ணீர் சேர்த்து 4 முதல் 6 மணி நேரம் வரை ஊறவைத்துக் கொள்ளவும். நன்கு ஊறிய அரிசி, உளுந்து, வெந்தயக் கலவையைத் தண்ணீரை வடித்துவிட்டு, சிறிதளவு நீர் சேர்த்து கிரைண்டரில் போட்டு அரைக்கவும். இதனுடன் ஒரு மேஜைக்கரண்டி ஈஸ்ட் சேர்க்க வேண்டும். முடக்கத்தான் கீரையைத் தண்ணீரில் சுத்தமாக அலசி, அதன் இலைகளை மட்டும் தனியாக அரைத்துக் கொள்ளவும். இப்போது அரைத்த கீரையுடன், அரிசி-பருப்புக் கலவையைச் சிறிது சிறிதாகச் சேர்த்து வழவழப்பான பதத்திற்கு நைசாக அரைத்தெடுக்கவும்.

செய்முறை விளக்கம் - 2

அரைத்த மாவுடன் தேவையான அளவு உப்பு சேர்த்து கைவிடாமல் நன்கு கலக்கி வைக்கவும். இந்த மாவை 8 மணி நேரம் அல்லது இரவு முழுவதும் அப்படியே புளிக்க வைக்க வேண்டும். மாவு நன்கு பொங்கி, உப்பி மேலே வரும் வரை காத்திருக்கவும். அடுப்பில் தோசைக் கல்லை வைத்து நன்கு சூடானதும், ஒரு கரண்டி மாவை எடுத்து கல்லின் நடுவே ஊற்றி மெல்லியதாக வட்டமாகத் தேய்க்கவும். தோசையின் ஓரங்களில் தேவையான அளவு எண்ணெய் தெளிக்கவும். அடிப்பகுதி லேசாக பொன்னிறமாக மாறி, ஓரங்கள் மேலே எழும்பி வரும்போது தோசையை எடுக்கவும். இதே முறையில் மீதமுள்ள மாவிலும் தோசைகளைச் சுட்டு எடுக்கவும்.

சூடான, மொறுமொறுப்பான இந்த முடக்கத்தான் கீரை தோசையை காரசாரமான தக்காளி சட்னி, தேங்காய் சட்னி, கதம்ப சாம்பார் அல்லது இட்லிப் பொடியுடன் சேர்த்துப் பரிமாறலாம். வாரம் ஒன்று அல்லது இரண்டு முறை இந்தத் தோசையை உணவில் சேர்த்து வந்தால் மூட்டு வலி, இடுப்பு வலிக்கு நல்ல நிவாரணம் கிடைக்கும்.