Kalyana Kadamba Sambar: மதிய உணவிற்கு அட்டகாசமான கதம்ப சாம்பார்; கல்யாண வீட்டு மணம் மாறாமல் செய்வது எப்படி?

கல்யாண வீட்டுப் பந்தி சுவையில் கமகமக்கும் கதம்ப சாம்பார் செய்வது எப்படி? கத்தரிக்காய், முருங்கைக்காய், மாங்காய் சேர்த்து வீட்டிலேயே எளிதாகச் செய்யும் ரெசிபி பற்றி பார்ப்போம்.

கல்யாண வீட்டு கதம்ப சாம்பார் செய்வது எப்படி?

கல்யாண வீடுகளுக்குச் சென்றால், பந்தியில் பரிமாறப்படும் உணவுகளில் முதலில் நம் மனதையும் நாவையும் கவர்வது மணக்கும் சாம்பார்தான். அதிலும் பலவகையான காய்கறிகள் சேர்த்துத் தளதளவெனக் கொதிக்கும் அந்த கதம்ப சாம்பாரின் வாசனையே தனித்துவமானது.

தினமும் வீட்டில் ஒரே மாதிரியான சாம்பார் வைத்துச் சலித்துப் போனவர்களுக்கு, விசேஷ நாட்களில் செய்வது போலப் பல காய்கறிகள் கலந்த இந்த கதம்ப சாம்பார் நிச்சயம் ஒரு விருந்தாக அமையும். வீட்டில் இருக்கும் எளிய மசாலாப் பொருட்களைக் கொண்டே கல்யாண வீட்டுப் பக்குவத்தில் கதம்ப சாம்பார் செய்வது எப்படி என்பதைப் பார்க்கலாம்.

தேவையான பொருட்கள்

துவரம் பருப்பு – 1 கப்

புளி – நெல்லிக்காய் அளவு

காய்கறிகள் (கத்தரிக்காய், கேரட், பீன்ஸ், முருங்கைக்காய், உருளைக்கிழங்கு) – தலா 1 கைப்பிடி அளவு (நறுக்கியது)

சின்ன வெங்காயம் – 15

தக்காளி – 2

மஞ்சள் தூள் – 1/4 ஸ்பூன்

சாம்பார் தூள் – 2 ஸ்பூன்

உப்பு – தேவையான அளவு

கொத்தமல்லி இலை – சிறிதளவு (பொடியாக நறுக்கியது)

தாளிக்கத் தேவையானவை

சமையல் எண்ணெய் – 2 ஸ்பூன்

கடுகு – 1/2 ஸ்பூன்

உளுத்தம் பருப்பு – 1/2 ஸ்பூன்

சீரகம் – 1/2 ஸ்பூன்

காய்ந்த மிளகாய் – 2

பெருங்காயத் தூள் – ஒரு சிட்டிகை

கறிவேப்பிலை – ஒரு கொத்து

கதம்ப சாம்பார் செய்முறை - 1

முதலில் துவரம் பருப்பை நன்றாகக் கழுவி குக்கரில் சேர்க்கவும். அதனுடன் சிறிது மஞ்சள் தூள், ஒரு தக்காளி மற்றும் தேவையான அளவு தண்ணீர் ஊற்றி 4 விசில் வரும் வரை வேகவைத்துக் கொள்ளவும். பருப்பு நன்கு வெந்ததும் மசித்துத் தனியாக எடுத்து வைக்கவும். நெல்லிக்காய் அளவு புளியைத் தண்ணீரில் சுமார் 15 நிமிடங்கள் ஊறவைத்து, கெட்டியான கரைசலாகக் கரைத்து வடிகட்டி வைத்துக்கொள்ளவும்.

அகன்ற பாத்திரம் அல்லது மண்சட்டியில் நறுக்கி வைத்துள்ள கத்தரிக்காய், கேரட், பீன்ஸ், முருங்கைக்காய், உருளைக்கிழங்கு ஆகிய அனைத்து காய்கறிகளையும் சேர்க்கவும். (சுவை டிப்ஸ்: காய்கறிகளுடன் சிறிது மாங்காய் துண்டுகளைச் சேர்த்தால் புளிப்புச் சுவை கூடி சாம்பார் இன்னும் ருசியாக இருக்கும்).

கதம்ப சாம்பார் செய்முறை - 2

காய்கறிகளுடன் மீதமுள்ள ஒரு தக்காளி, சின்ன வெங்காயம், தேவையான உப்பு மற்றும் சாம்பார் தூள் சேர்த்து, காய்கறிகள் மூழ்கும் அளவுக்குத் தண்ணீர் ஊற்றி நன்கு வேகவிடவும். (சிறப்பு டிப்ஸ்: கடைகளில் வாங்கும் சாம்பார் தூளுக்குப் பதிலாகக் காய்ந்த மிளகாய், கொத்தமல்லி விதை, கடலைப்பருப்பு, வெந்தயம் மற்றும் சீரகம் ஆகியவற்றை வறுத்து அரைத்துப் பயன்படுத்தினால் சுவை இன்னும் பிரமாதமாக இருக்கும்).

காய்கறிகள் முக்கால் பதம் வெந்தவுடன், வடிகட்டி வைத்துள்ள புளிக் கரைசலை ஊற்றிக் கொதிக்கவிடவும். புளியின் பச்சை வாசனை நீங்கிய பிறகு, மசித்து வைத்துள்ள துவரம் பருப்பைச் சேர்த்து நன்கு கலக்கவும். சாம்பார் மிகவும் கெட்டியாக இருந்தால் சிறிது சுடுநீர் சேர்த்து ஒரு கொதி விடவும். ஒரு சிறிய வாணலியில் எண்ணெய் ஊற்றிச் சூடானதும் கடுகு, உளுத்தம் பருப்பு, சீரகம் சேர்க்கவும். கடுகு வெடித்ததும் காய்ந்த மிளகாய், கறிவேப்பிலை மற்றும் பெருங்காயத் தூள் சேர்த்து வதக்கி, கொதிக்கும் சாம்பாரில் கொட்டி இறக்கவும். இறுதியாகப் பொடியாக நறுக்கிய கொத்தமல்லி இலைகளைத் தூவி மூடி வைத்தால், கல்யாண வீடுகளில் பரிமாறப்படும் அதே மணத்துடன் கமகமக்கும் கதம்ப சாம்பார் தயார்! மதிய உணவு நேரத்தில் சுடச்சுடச் சாதத்துடன் இந்த மணக்கும் சாம்பாரைப் பரிமாறி அசத்துங்கள்!