Vicky Nayan : ‘ராக்கி’யை பார்க்க தியேட்டருக்கு திடீர் விசிட் அடித்த ‘ரெளடி‘ ஜோடி - வைரலாகும் கியூட் போட்டோஸ்

ராக்கி படத்தை தங்களது ‘ரெளடி’ பிக்சர்ஸ் மூலம் வெளியிட்ட விக்னேஷ் சிவனும், நயன்தாராவும் தியேட்டருக்கு ஜோடியாக வந்து ரசிகர்களோடு அமர்ந்து அப்படத்தை பார்த்து ரசித்துள்ளனர்.

இயக்குனர் விக்னேஷ் சிவனும், நடிகை நயன்தாராவும் 6 வருடமாக காதலித்து வருகின்றனர். காதலைப் போல் சினிமாவிலும் ஜொலித்து வரும் இவர்கள், கடந்தாண்டு ரெளடி பிக்சர்ஸ் என்கிற பட நிறுவனம் ஒன்றை தொடங்கினர். 

அந்நிறுவனம் மூலம் நெற்றிக்கண், கூழாங்கல், காத்துவாக்குல ரெண்டு காதல் போன்ற படங்களை தயாரித்துள்ளதோடு மட்டுமல்லாமல் சில படங்களை வெளியிட்டும் வருகின்றனர். 

அந்த வகையில் அருண் மாதேஸ்வரன் இயக்கத்தில் வஸந்த் ரவி, ரவீனா, பாரதிராஜா உள்ளிட்ட பலர் நடிப்பில் உருவாகியுள்ள 'ராக்கி' (Rocky) படத்தின் வெளியீட்டு உரிமையையும் அவர்கள் கடந்தாண்டு கைப்பற்றினர். 

இருப்பினும் கொரோனா அச்சுறுத்தல் காரணமாக இப்படத்தை கடந்த ஓராண்டாக வெளியிடாமல் இருந்தனர். தற்போது கிறிஸ்துமஸ் விருந்தாக இப்படம் திரையரங்குகளில் வெளியாகி உள்ளது. 

இப்படத்திற்கு விமர்சன ரீதியாக அமோக வரவேற்பு கிடைத்து வருகிறது. ரஜினி, தனுஷ் உள்ளிட்ட திரையுலக பிரபலங்களும் இப்படத்தை பார்த்து படக்குழுவினரை வெகுவாக பாராட்டினர். குறிப்பாக விக்னேஷ் சிவன், நயன்தாராவை தொலைபேசியில் தொடர்பு கொண்டு வாழ்த்தினார் ரஜினி.

இந்நிலையில், ராக்கி படத்தை தங்களது ‘ரெளடி’ பிக்சர்ஸ் மூலம் வெளியிட்ட விக்னேஷ் சிவனும், நயன்தாராவும் தியேட்டருக்கு ஜோடியாக வந்து ரசிகர்களோடு அமர்ந்து அப்படத்தை பார்த்து ரசித்துள்ளனர்.

இருவரும் கருப்பு நிற ஜீன்ஸ் பேண்ட் மற்றும் டீசர்ட் அணிந்தபடி தியேட்டருக்கு வந்தபோது எடுக்கப்பட்ட புகைப்படங்கள் சமூக வலைதளங்களில் வெளியாகி வைரலாகி வருகின்றன.