காதலர்களை கிறங்கடித்த “கண்ணுக்குள் நூறு நிலவா”.! இந்த பாட்டின் இசையமைப்பாளர் யார் தெரியுமா?

பாரதிராஜா-இளையராஜா கூட்டணி பிரிந்த பிறகு வெளியான முதல் படம் 'வேதம் புதிது'. பலரும் இளையராஜா இசையமைத்ததாக நினைக்கும் 'கண்ணுக்குள் நூறு நிலவா' போன்ற ஹிட் பாடல்களுக்கு இசையமைத்தது யார் தெரியுமா?

தமிழ் திரையுலகை ஆட்டிப்படைத்த 2 சிங்கங்கள்

தமிழ் சினிமாவில் கிராமத்து மண்வாசனையையும், மனித உணர்ச்சிகளையும் அழகாக திரையில் கொண்டு வந்த இயக்குனர்களில் முக்கியமானவர் பாரதிராஜா. பல காலத்துக்கு அவர் – இளையராஜா கூட்டணி ரசிகர்களை கவர்ந்த நிலையில், ஒரு கட்டத்தில் இருவரும் பிரிந்தனர். அந்த பிரிவுக்குப் பிறகு பாரதிராஜா இயக்கிய முதல் படம் தான் வேதம் புதிது.

கண்ணுக்குள் நூறு நிலவா, இது ஒரு கனவா

1987-ஆம் ஆண்டு வெளியான வேதம் புதிது திரைப்படம், கதையாலும், கதாபாத்திரங்களாலும், சமூக கருத்துகளாலும் பெரிய வரவேற்பைப் பெற்றது. சத்யராஜ், அமலா, சரிதா உள்ளிட்ட பலர் நடித்த இந்த படம், அந்தக் காலத்தில் பேசப்பட்ட முக்கிய படைப்பாக அமைந்தது.

இந்த படத்தின் இன்னொரு பெரிய பலம் – அதன் பாடல்கள். குறிப்பாக “கண்ணுக்குள் நூறு நிலவா, இது ஒரு கனவா” என்ற பாடல் இன்றும் காதலர்களின் ஃபேவரிட் பட்டியலில் இடம்பிடித்துள்ளது. இந்த பாடல் வரிகளை கவிப்பேரரசு வைரமுத்து எழுதியிருந்தார். பாடலின் மென்மையான சொற்களும், காதல் உணர்வுகளும் இன்றும் ரசிகர்களை கவர்ந்து கொண்டே இருக்கின்றன.

இளையராஜா இல்லையா?

ஆனால் பலரும் நினைத்து வந்த ஒரு தவறு என்ன தெரியுமா? இந்த படத்துக்கும், இந்த ஹிட் பாடல்களுக்கும் இசையமைத்தது இளையராஜா என்று! உண்மையில், இந்த படத்தின் இசையமைப்பாளர் தேவேந்திரன். “மண்ணுக்குள் வைரம்” படத்தின் மூலம் அறிமுகமான இவர், “வேதம் புதிது” மூலம் தனது திறமையை நிரூபித்தார்.

இளையராஜாவை விட்டுப் பிரிந்த பிறகு, புதிய இசையமைப்பாளரை தேர்வு செய்த பாரதிராஜாவின் முடிவு பலராலும் சந்தேகத்துடன் பார்க்கப்பட்டது. “இந்த படம் எடுப்பதற்கு இளையராஜா தான் சரி” என்ற விமர்சனங்களையும் அவர் சந்தித்தார். ஆனால் அந்த சந்தேகங்களை எல்லாம் உடைத்தது இந்த படத்தின் வெற்றியும், அதன் இசையும் தான்.

வைரமுத்துவுக்காக காத்திருந்த பாரதிராஜா

மேலும் இந்த படத்தில் உள்ள “மாட்டு வண்டி பாதையிலே” என்ற பாடலுக்காக ஒரு சின்ன சம்பவமும் நடந்துள்ளது. அந்த பாடலின் கடைசி வரியில் இருந்த ஒரு வார்த்தையை மாற்ற வேண்டும் என்று நினைத்த பாரதிராஜா, கவிஞர் வைரமுத்துவை தொடர்புகொள்ள முடியாமல் ஒரு நாள் முழுவதும் காத்திருந்தார். பின்னர் அவர் வந்து அந்த வரியை மாற்றியபின் தான் பதிவு நடந்தது. இந்த சம்பவம், பாடலின் மீது அவர்கள் வைத்திருந்த முக்கியத்துவத்தை காட்டுகிறது.

“வேதம் புதிது” ஒரு சாதாரண படம் அல்ல

மொத்தத்தில், “வேதம் புதிது” ஒரு சாதாரண படம் அல்ல. இது பாரதிராஜாவின் தைரியமான முடிவையும், புதிய திறமைகளுக்கு அவர் கொடுத்த வாய்ப்பையும் நிரூபித்த படம். அதே நேரத்தில், “கண்ணுக்குள் நூறு நிலவா” போன்ற பாடல்கள் காலத்தை தாண்டியும் எப்படி வாழ்கின்றன என்பதற்கும் சிறந்த உதாரணம்.