Jana nayagan: தடை விலகுமா? தணிக்கை கிடைக்குமா? - விஜய்யின் ‘ஜனநாயகன்’ அப்டேட்!

விஜய் நடித்துள்ள ‘ஜனநாயகன்’ திரைப்படத்திற்கு தணிக்கைச் சான்றிதழ் வழங்குவதில் சிக்கல் நீடிக்கிறது. தணிக்கை வாரியத்தின் மேல்முறையீட்டால் படத்திற்கு வழங்கப்பட்ட சான்றிதழுக்கு நீதிமன்றம் இடைக்காலத் தடை விதித்துள்ளது. 

‘ஜனநாயகன்’ படச் சிக்கல்: இன்று உயர் நீதிமன்றத்தில் முக்கிய விசாரணை!

வழக்கின் பின்னணி: தமிழக வெற்றிக் கழகத்தின் தலைவர் விஜய் நடித்துள்ள ‘ஜனநாயகன்’ திரைப்படத்திற்கு தணிக்கைச் சான்றிதழ் பெறுவதில் நீண்ட நாட்களாக இழுபறி நீடித்து வருகிறது. முன்னதாக, இந்தப் படத்திற்கு 'U/A' சான்றிதழ் வழங்க சென்னை உயர் நீதிமன்ற தனி நீதிபதி பி.டி. உஷா உத்தரவிட்டிருந்தார். ஆனால், இந்த உத்தரவை எதிர்த்து மத்திய தணிக்கை வாரியம் உடனடியாக மேல்முறையீடு செய்தது.

தணிக்கை வாரியத்தின் வாதம்.!

மேல்முறையீட்டு விசாரணையின் போது, தணிக்கை வாரியம் தரப்பில் சில முக்கிய வாதங்கள் முன்வைக்கப்பட்டன. தணிக்கைச் சான்றிதழ் வழங்க சில சட்ட ரீதியான நடைமுறைகள் இருக்கும்போது, பட நிறுவனம் நீதிமன்றத்திற்கு அழுத்தம் கொடுத்து அவசர அவசரமாக உத்தரவு பெற்றுள்ளதாகத் தெரிவிக்கப்பட்டது. மேலும், படத்தை மறுஆய்வுக் குழுவிற்கு அனுப்பும் முடிவில் நீதிமன்றம் தலையிட்டதையும் வாரியம் சுட்டிக்காட்டியது.

நீதிமன்றத்தின் கேள்விகளும் தடையும்

இந்த வழக்கை விசாரித்த நீதிபதிகள், தணிக்கை வாரியம் தனது தரப்பு பதிலைச் சமர்ப்பிக்க கால அவகாசம் வழங்காமல் தனி நீதிபதி ஏன் உத்தரவிட்டார் எனக் கேள்வி எழுப்பினர். மேலும், தணிக்கைச் சான்றிதழ் பெறுவதற்கு முன்பே படத்தின் வெளியீட்டுத் தேதியை அறிவித்தது ஏன் என்றும் பட நிறுவனத்தைக் கண்டித்தனர். இதன் விளைவாக, படத்திற்குச் சான்றிதழ் வழங்க பிறப்பிக்கப்பட்ட முந்தைய உத்தரவுக்கு நீதிமன்றம் இடைக்காலத் தடை விதித்தது.

இன்றைய விசாரணையின் முக்கியத்துவம்

இந்த நிலையில், ஜனவரி 20-ஆம் தேதியான இன்று இந்த வழக்கு மீண்டும் விசாரணைக்கு வருகிறது. உச்ச நீதிமன்றத்தின் அறிவுறுத்தலின்படி நடைபெறும் இந்த விசாரணையில், படத்திற்குச் சான்றிதழ் கிடைக்குமா அல்லது படம் மறுஆய்வுக் குழுவிற்குச் செல்லுமா என்பது உறுதியாகத் தெரியவரும்.

திரைப்பட வெளியீடு எப்போது? 

நீதிமன்றத்தில் இன்று சாதகமான தீர்ப்பு கிடைக்கும் பட்சத்தில், படத்தை இந்த ஜனவரி மாத இறுதி அல்லது பிப்ரவரி மாதத் தொடக்கத்தில் வெளியிடப் படக்குழு திட்டமிட்டுள்ளது. விஜய்யின் அரசியல் வருகைக்கு முன்னதாக வெளியாகும் மிக முக்கியமான படம் என்பதால், இன்றைய தீர்ப்பை ரசிகர்கள் ஆவலுடன் எதிர்பார்த்துக் காத்திருக்கின்றனர்.