கிராமி விருது பந்தயத்தில் முதன்முறையாக நாமினேட் ஆன தமிழ் பாடல்... தேவன் ஏகாம்பரத்தின் வருவாய் பாட்டுக்கு குவியும் பாராட்டு

Published : Nov 19, 2026, 03:08 PM IST

Grammy Nominated Tamil Song : சர்வதேச அளவில் இசைக் கலைஞர்கள் உயரிய விருதாக கருதப்படும் கிராமி விருதுக்கான நாமினேஷன் பட்டியலில் முதன்முறையாக தமிழ் பாடல் ஒன்று இடம்பெற்றுள்ளது.

PREV
15
Grammy Nominated Tamil Song

தமிழகத்தைச் சேர்ந்த இசையமைப்பாளரும் பாடகருமான தேவன் ஏகாம்பரம் மற்றும் பாடகி சுபிக்‌ஷா ரங்கராஜன் (சுஷா) இணைந்து உருவாக்கியுள்ள ‘வருவாய்’ பாடல் சர்வதேச இசை அரங்கில் புதிய கவனத்தைப் பெற்றுள்ளது. மகாகவி பாரதியாரின் பக்திப் பாடலை அடிப்படையாகக் கொண்டு, பாரம்பரிய தமிழ் இசையையும் நவீன மேற்கத்திய இசை வடிவத்தையும் இணைத்து இந்தப் பாடல் உருவாக்கப்பட்டுள்ளது.

2027-ம் ஆண்டு நடைபெறவுள்ள 69-வது கிராமி விருதுகளின் ‘Best Global Music Performance’ பிரிவில் ‘வருவாய்’ பாடல் பரிந்துரைக்கப்பட்டுள்ளது. இதன் மூலம் கிராமி விருதுக்குப் பரிந்துரைக்கப்பட்ட முதல் தமிழ் பாடல் என்ற பெருமையைப் பெற்றுள்ளது. மேலும், 2027 கிராமி விருதுகளுக்கான பரிந்துரைப் பட்டியலில் இந்தியா சார்பில் இடம்பெற்றுள்ள ஒரே படைப்பாகவும் இது அமைந்துள்ளது.

25
உலகளாவிய அங்கீகாரம்!

சுமார் மூன்று தசாப்தங்களாக இசைத்துறையில் இயங்கி வரும் தேவன் ஏகாம்பரம், இந்த அங்கீகாரம் தனக்கு மிகப்பெரிய ஆச்சரியத்தையும் மகிழ்ச்சியையும் அளித்துள்ளதாகக் கூறியுள்ளார். மொத்தம் 526 படைப்புகள் பரிந்துரைக்கப்பட்டிருந்த நிலையில், சர்வதேச அளவில் புகழ்பெற்ற பல இசைக் கலைஞர்களின் படைப்புகளுடன் தனது பாடலும் போட்டியிட்டதை அவர் சுட்டிக்காட்டியுள்ளார்.

குறிப்பாக, எந்தவொரு பெரிய இசை நிறுவனத்தின் துணையும் இல்லாமல், சுயாதீனக் கலைஞராகத் தனது சொந்த முயற்சியில் இந்தப் பாடலை உருவாக்கி வெளியிட்டதாகத் தெரிவித்துள்ளார். இத்தகைய சூழலில் கிடைத்துள்ள கிராமி அங்கீகாரம் தனக்கு இன்னும் நம்ப முடியாத அனுபவமாக இருப்பதாகவும் அவர் மகிழ்ச்சி பகிர்ந்துள்ளார்.

35
கிராமி அறிவிப்பையே மறந்துபோன பாடகி சுஷா!

‘வருவாய்’ பாடலின் வெற்றியில் முக்கியப் பங்கு வகித்த பாடகி சுஷாவுக்கும் இந்தச் செய்தி எதிர்பாராத மகிழ்ச்சியைக் கொடுத்துள்ளது. தேவனுக்காகவே இந்தப் பாடலைப் பாடியதாகக் கூறியுள்ள அவர், பாடலை உருவாக்கியது முதல் கிராமி விருதுக்குப் பரிந்துரைக்க அனுப்பியது வரையிலான அனைத்து பணிகளையும் தேவனே முன்னின்று கவனித்ததாகத் தெரிவித்துள்ளார்.

பரிந்துரைப் பட்டியல் வெளியான நாளில் தான் முழுவதுமாக ஸ்டுடியோ பணிகளில் மூழ்கியிருந்ததாகவும், செல்போனை அணைத்து வைத்திருந்ததால் கிராமி அறிவிப்பு வெளியானதையே மறந்துவிட்டதாகவும் சுஷா குறிப்பிட்டுள்ளார். பின்னர் செல்போனை இயக்கிப் பார்த்தபோதுதான் தேவன் பலமுறை தொடர்புகொள்ள முயற்சித்ததும், ஏராளமான குறுஞ்செய்திகள் வந்திருந்ததும் தெரியவந்ததாகக் கூறியுள்ளார். அந்தத் தருணம் தனக்கு மிகுந்த மகிழ்ச்சியையும் ஆச்சரியத்தையும் அளித்ததாக அவர் தெரிவித்துள்ளார்.

45
விளம்பரச் செலவின்றி கிடைத்த கிராமி அங்கீகாரம்!

கிராமி விருதுக்கான பரிந்துரையை எதிர்பாராத வகையில் கிடைத்த அதிர்ஷ்டமாகப் பார்க்கிறார் தேவன் ஏகாம்பரம். இந்தப் பரிந்துரையைப் பெறுவதற்கு குறைந்தபட்சம் 20,000 அமெரிக்க டாலர்கள், அதாவது இந்திய மதிப்பில் சுமார் ரூ.18.70 லட்சம் வரை விளம்பரத்திற்குச் செலவிட வேண்டியிருக்கும் என்று தன்னிடம் கூறப்பட்டதாக அவர் தெரிவித்துள்ளார்.

ஆனால், தனது பாடலுக்காக அத்தகைய பெரிய தொகையைச் செலவிடவில்லை என்றும், இன்ஸ்டாகிராம் வழியாக மட்டுமே பாடலை விளம்பரப்படுத்தியதாகவும் குறிப்பிட்டுள்ளார். நீண்ட காலமாக இசைத்துறையில் உழைத்து வந்த தனக்கு, தற்போது கிராமி விருதுப் பரிந்துரைப் பட்டியலில் தனது பெயரையும் படைப்பையும் காண்பது அளவற்ற மகிழ்ச்சியைத் தருவதாகக் கூறியுள்ளார். இந்த வாய்ப்பு கிடைக்கக் காரணமான பிரபஞ்சத்திற்கு தனது நன்றியையும் தெரிவித்துள்ளார்.

55
உலக அரங்கில் ஒலிக்கப்போகும் தமிழ் இசையும் பாரதியாரின் கவிதையும்!

2027 கிராமி விருது விழாவை ஆவலுடன் எதிர்பார்த்துக் காத்திருப்பதாகக் கூறியுள்ள தேவன், இந்தியாவைப் பிரதிநிதித்துவப்படுத்தும் ஒரே கலைஞராக இந்தப் பட்டியலில் இடம்பெற்றிருப்பது பெருமையளிப்பதாகத் தெரிவித்துள்ளார். அடுத்தகட்ட வாக்கெடுப்பில் இந்திய வாக்காளர்களின் ஆதரவு கிடைக்கும் என்ற நம்பிக்கையையும் அவர் வெளிப்படுத்தியுள்ளார்.

தமிழ் மொழியையும் அதன் இசை மரபையும் உலகளாவிய மேடைக்குக் கொண்டு செல்லும் முயற்சியில் தன்னால் ஒரு சிறிய பங்களிப்பைச் செய்ய முடிந்திருப்பது மகிழ்ச்சியளிப்பதாகவும் கூறியுள்ளார். குறிப்பாக, கிராமி விருதுக்குப் பரிந்துரைக்கப்பட்ட முதல் தமிழ் பாடலை உருவாக்கியவர் என்ற அடையாளம் தனது இசைப் பயணத்தில் மறக்க முடியாத மைல்கல்லாக இருக்கும் என்றும் தெரிவித்துள்ளார்.

இதுகுறித்து பாடகி சுஷா கூறுகையில், தமிழ் தனது தாய்மொழி என்பதால், அதே மொழியில் பாடிய ஒரு படைப்பு சர்வதேச அளவில் இத்தகைய அங்கீகாரத்தைப் பெற்றிருப்பது மிகுந்த பெருமையைத் தருவதாகக் குறிப்பிட்டுள்ளார். தமிழ் மொழி, கர்நாடக இசை மற்றும் தமிழர்களின் உணர்வுகளோடு கலந்த பாரதியாரின் கவிதை ஆகியவை தேவனின் மேற்கத்திய இசை அணுகுமுறையுடன் இணைந்து உலக அரங்கில் இடம்பெற்றிருப்பது தனக்கு மிகுந்த மகிழ்ச்சியை அளிப்பதாகவும் தெரிவித்துள்ளார்.

இதன் மூலம் பாரதியாரின் கவிதைக்கும் தமிழ் இசைக்கும் சர்வதேச அளவில் புதிய கவனம் கிடைத்துள்ளது. தமிழ் மொழியின் பெருமையை உலக இசை மேடையில் எடுத்துச் சென்றுள்ள ‘வருவாய்’ பாடலின் இந்தப் பயணம், தமிழ் இசை ரசிகர்களிடையே பெரும் எதிர்பார்ப்பை ஏற்படுத்தியுள்ளது.

தமிழ் சினிமா (Tamil Cinema News), டிவி நிகழ்ச்சிகள் (Tamil TV Shows), செலிபிரிட்டி செய்திகள் மற்றும் சமீபத்திய அப்டேட்களுக்காக ஏஷ்யாநெட் தமிழ் நியூஸின் பொழுதுபோக்கு பிரிவை ஆராயுங்கள். சினிமா விமர்சனங்கள் (Tamil Movies Review), நட்சத்திரங்களின் நேர்காணல்கள், தொடர்களில் நடக்கும் ட்ராமா மற்றும் பொழுதுபோக்கு உலகின் டிரெண்ட்ஸ்பாட்டிங்குடன் எப்போதும் புதுப்பித்த நிலையில் இருங்கள். திரையரங்குப் பின்னணி கதைகள்,டிரெய்லர் வெளியீடுகள்மற்றும் ரெட் கார்பெட் தருணங்களை அறிந்து கொள்ளுங்கள்.

Read more Photos on
click me!

Recommended Stories