சூப்பர் ஸ்டார் ரஜினிகாந்த் நடிப்பில் கடந்த 2002 ஆம் ஆண்டு வெளியான 'பாபா' திரைப்படம் 20 வருடங்களுக்கு பின்னர், நேற்று சில மாற்றங்களுடன், டிஜிட்டல் முறையில் ரிலீஸ் ஆனது. இந்த படத்தின் கிளைமேக்ஸில் நிகழ்ந்த மாற்றம் குறித்த தகவல் தான் தற்போது வெளியாகி உள்ளது.
சூப்பர் ஸ்டார் ரஜினிகாந்த் நடிப்பில் 2002ல் வெளியான திரைப்படம் பாபா. இந்த படத்திற்கு கதை, திரைக்கதை எழுதியதுடன் சூப்பர்ஸ்டார் ரஜினிகாந்த் இப்படத்தை தயாரித்தும் இருந்தார். ரஜினியை வைத்து அண்ணாமலை, வீரா, பாட்ஷா போன்ற ஹிட் படங்களை இயக்கிய சுரேஷ் கிருஷ்ணா இந்த படத்தை இயக்கினார். ரஜினிகாந்தின் மனதுக்கு மிகவும் நெருக்கமான இந்த படம், மிக பிரமாண்டமாக வெளியான நிலையில், கலவையான விமர்சனங்களை பெற்று படு தோல்வியை சந்தித்தது.
இந்த படத்தில் ரஜினிகாந்துக்கு ஜோடியாக அப்போதைய டாப் ஸ்டார் நடிகையான மனிஷா கொய்ராலா நடித்திருந்தார். மேலும் முக்கிய வேடங்களில் கவுண்டமணி, டெல்லி கணேஷ், சுஜாதா, எம்.என்.நம்பியார் ஆஷிஷ் வித்யார்த்தி, சாயாஜி ஷிண்டே, சங்கவி, கருணாஸ் உள்ளிட்ட பலர் நடித்திருந்தனர். ஏ.ஆர்.ரஹ்மான் இசையில் இந்த படத்தில் இடம்பெற்ற பாடல்களுக்கும் ரசிகர்கள் மத்தியில் நல்ல வரவேற்பு கிடைத்தது.
ரஜினிகாந்த் தான் தெய்வமாக வழிபடும், பாபாஜியின் மகிமைகளை எடுத்து கூறும் விதமாக இந்த படத்தின் திரைக்கதையை எழுதி இருந்தார். அதே நேரம்... முழு தெய்வீக படமாக மட்டுமே இல்லாமல், காதல் ஆக்ஷன், அரசியல், செண்டிமெண்ட், காமெடி என அனைத்து அம்சங்களும் நிறைந்த படமாக இது இருந்தது. இந்த படத்தில் ரஜினி காட்டிய அந்த பாபா முத்திரை, படம் வெளியான சமயத்தில் குழந்தைகளை பெரிதும் கவர்ந்தது. பின்னர் ரஜினி அரசியல் குறித்து அறிவித்தபோது... அந்த முத்திரையை தான் தன்னுடைய கட்சி கொடியிலும் பயன்படுத்தி இருந்தார்.
இப்படம் வெளியாகி 20 வருடங்கள் ஆகும் நிலையில், மீண்டும் இந்த படத்தை ரஜினிகாந்த் ரீ-ரிலீஸ் செய்ய திட்டமிட்டிருந்த நிலையில்... படத்தை டிஜிட்டல் முறையில் மாற்றியதோடு, கிளைமேக்ஸ் காட்சியிலும் மாற்றம் செய்திருந்ததாக கூறப்பட்டது. அந்த வகையில் தற்போது, இந்த படம் புது பொலிவுடன் நேற்று வெளியான நிலையில்... இப்படத்தில் இடம்பெற்றுள்ள கிளைமேக்சில் ஏற்பட்டுள்ள மாற்றம் குறித்த தகவல் வெளியாகியுள்ளது.
அதாவது ‘பாபா’ படத்தில், அரசியல் பாதையே சரி என்ற கிளைமேக்ஸ் இருக்கும். இன்றைக்கு தனது ரசிகர்களே அதை விரும்பமாட்டார்கள் என உணர்ந்த அவர், மீண்டும் ரிலீஸ் செய்யப்பட்டுள்ள படத்தில் கிளைமேக்ஸை மாற்றியுள்ளார். ‘நீ உன் தாயின் மனதை காயப்படுத்தி இருக்கிறாய். எனவே மீண்டும் பிறந்து தாயின் ஆசையை நிறைவேற்று. நேரம் வரும்போது உன்னை அழைக்கிறேன்’ என பாபா கூறுவது போல் இறுதிகாட்சி மாற்றப்பட்டுள்ளதாம்.
சேனலை கிளிக் செய்து பின்தொடரவும்