நெல்சன் மட்டும் போதாது... தலைவர் 169 படத்துக்காக மேலும் ஒரு பிளாக்பஸ்டர் இயக்குனரை களமிறக்கிய ரஜினி

Thalaivar 169 : தலைவர் 169 படத்தின் படப்பிடிப்பு வருகிற ஆகஸ்ட் மாதம் தொடங்க உள்ள நிலையில், தற்போது ஆரம்பக்கட்ட பணிகள் விறுவிறுப்பாக நடைபெற்று வருகிறது. 

நயன்தாரா நடிப்பில் வெளியான கோலமாவு கோகிலா படம் மூலம் தமிழ் சினிமாவில் இயக்குனராக அறிமுகமானார் நெல்சன். கடந்த 2018-ம் ஆண்டு ரிலீசான இப்படம் பாக்ஸ் ஆபிஸில் மாபெரும் வசூல் ஈட்டி பிரம்மாண்ட வெற்றியை ருசித்தது. இதையடுத்து சிவகார்த்திகேயன் நடித்த டாக்டர் படத்தை இயக்கினார் நெல்சன்.

டார்க் காமெடி ஜானரில் முழுக்க முழுக்க நகைச்சுவை படமாக எடுக்கப்பட்டிருந்த இப்படம் கடந்தாண்டு வெளியாகி பிளாக்பஸ்டர் ஹிட் அடித்தது. இப்படம் பாக்ஸ் ஆபிஸில் ரூ.100 கோடிக்கு மேல் வசூலித்து சாதனை படைத்தது. இதையடுத்து விஜய் நடித்த பீஸ்ட் படத்தை இயக்கினார் நெல்சன். இப்படம் கடந்த ஏப்ரல் மாதம் தமிழ் புத்தாண்டை ஒட்டி ரிலீசானது.

விமர்சன ரீதியாக இப்படம் கடும் சறுக்கலை சந்தித்தாலும் பாக்ஸ் ஆபிஸில் ரூ.200 கோடிக்கு மேல் வசூலித்து நஷ்டம் இன்றி தப்பித்தது. இதையடுத்து ரஜினியின் தலைவர் 169 படத்தை இயக்க ஒப்பந்தமானார் நெல்சன், இப்படத்திற்கு அனிருத் இசையமைக்க உள்ளதாகவும், சன் பிக்சர்ஸ் நிறுவனம் தயாரிக்க உள்ளதாகவும் கடந்த பிப்ரவரி மாதம் அறிவிப்பு வெளியானது.

இப்படத்தின் படப்பிடிப்பு வருகிற ஆகஸ்ட் மாதம் தொடங்க உள்ள நிலையில், தற்போது ஆரம்பக்கட்ட பணிகள் விறுவிறுப்பாக நடைபெற்று வருகிறது. இந்நிலையில், இப்படத்தில் இயக்குனர் கே.எஸ்.ரவிக்குமாரும் இணைந்துள்ளாராம். இவர் திரைக்கதையில் நெல்சனுடன் இணைந்து பணியாற்ற உள்ளதாக கூறப்படுகிறது. பீஸ்ட் படம் மோசமான திரைக்கதை காரணமாகத் தான் சறுக்கலை சந்தித்தது, அதன்காரணமாகவே தற்போது கே.எஸ்.ரவிக்குமாரை ரஜினி களமிறக்கி உள்ளதாக கோலிவுட்டில் பேச்சு அடிபடுகிறது.

இதையும் படியுங்கள்... வேற வழியில்ல... அனிருத்தை தான் கல்யாணம் பண்ணிப்பேன் - விருது விழாவில் ஓப்பனாக சொன்ன அரபிக் குத்து பாடகி