ஆகஸ்ட் நெல்சன்.. செப்டம்பர் அட்லீ.. அக்டோபர் லோகேஷ் - 3 மாசம்.. 3 இயக்குனர்கள்.. மாஸ் காட்ட வரும் அனிரூத்!

ராக்ஸ்டார் அனிருத் இசையில் தொடர்ச்சியாக ஆகஸ்ட், செப்டம்பர் மற்றும் அக்டோபர் ஆகிய மூன்று மாதங்களும் திரைப்படங்கள் வெளியாகவுள்ளது. அவை மூன்றுமே மிகப்பெரிய இந்திய சூப்பர் ஸ்டார்களை கொண்டு எடுக்கப்பட்ட திரைப்படங்கள் என்பது குறிப்பிடத்தக்கது.

நெல்சன் திலிப் குமார் இயக்கத்தில் இறுதியாக வெளியான தளபதி விஜயின் "பீஸ்ட்"  திரைப்படம் அவருடைய ரசிகர்கள் மத்தியில் பெரிய வரவேற்பை பெற்றாலும், விமர்சன ரீதியாக சற்று குறைந்த மதிப்பெண்ணையே பெற்றது. இந்நிலையில் இயக்குனர் நெல்சன் திலீப் குமார் அவர்களும் பெரிய அளவில் விமர்சனங்களுக்கு உள்ளானார். இந்நிலையில் தன்னுடைய இடத்தை மீண்டும் பிடிப்பதற்காக அவர் கையாலவிற்கும் ஒரு பிரம்மாஸ்திரம் தான் "ஜெயிலர்". முதல்முறையாக தென் இந்தியாவின் மிகப்பெரிய நடிகரான சூப்பர் ஸ்டார் ரஜினிகாந்த் அவர்களை இயக்கியுள்ளார். ஏற்கனவே இந்த படத்தின் டீசர் மற்றும் முதல் சிங்கிள் பாடலான காவாலா வெளியாகி பெரிய அளவில் வரவேற்பை பெற்று வருகிறது. அனிருத் இசையில் இந்த திரைப்படம் வருகிற ஆகஸ்ட் 10ம் தேதி வெளியாக உள்ளது குறிப்பிடத்தக்கது.

அட்லீ குமார், இவரும் இறுதியாக கடந்த 2019ம் ஆண்டு தளபதி விஜய் அவர்களை வைத்து "பிகில்" என்ற மாபெரும் வெற்றி திரைப்படத்தை கொடுத்தார். ஏ.ஆர் ரகுமான் இசையில் அந்த திரைப்படத்தில் பாடல்கள் அனைத்தும் வெகுஜோராக அமைந்திருந்தது. இந்நிலையில் முதல்முறையாக பாலிவுட் பக்கம் சென்றிருக்கும் அட்லி, பாலிவுட் பாஷா என்று அழைக்கப்படும் ஷாருக்கான் அவர்களை வைத்து ஒரு ஆக்சன் திரைப்படத்தை உருவாக்கியுள்ளார். இந்த திரைப்படத்தில் முக்கிய வேடங்களில் விஜய் சேதுபதி, யோகி பாபு மற்றும் லேடி சூப்பர் ஸ்டார் நயன்தாரா உள்ளிட்டோர் நடித்துள்ளனர். இந்த திரைப்படத்திற்கும் ராக்ஸ்டார் அனிருத் இசையமைத்துள்ளார். சில தினங்களுக்கு முன்பு இந்த படத்தினுடைய Preview வெளியாகி பெரிய அளவில் வரவேற்பை பெற்றது. இந்த படம் செப்டம்பர் 7ம் தேதி வெளியாகவுள்ளது.

லோகேஷ் கனகராஜ் தற்போது தமிழ் சினிமாவின் மோஸ்ட் வான்டெட் இயக்குனர் என்றால் அதில் எந்தவிதமான சந்தேகமும் இல்லை. இறுதியாக கடந்த 2022ம் ஆண்டு உலக நாயகன் கமல்ஹாசன் அவர்களை வைத்து ஒரு சூப்பர் ஹிட் கமர்சியல் திரைப்படமாக விக்ரம் திரைப்படத்தை கொடுத்திருந்தார். இந்நிலையில் மாஸ்டர் படத்திற்கு பிறகு மீண்டும் ஒருமுறை தளபதி விஜய் அவர்களை வைத்து லியோ என்ற திரைப்படத்தை தற்பொழுது இயக்கி வருகிறார். இந்த திரைப்படத்திற்கும் அனிருத் அவர்கள் தான் இசையமைத்துள்ளார். இந்த படம் அக்டோபர் 19ம் தேதி வெளியாகவுள்ளது.