'அண்ணாத்த' கிட்ட இருந்து எனிமிய காப்பாத்துப்பா... திருப்பதி ஏழுமலையானிடம் சரண்டர் ஆன விஷால்! வைரல் போட்டோஸ்!

நடிகர் விஷால் (Vishal) - ஆர்யா (Arya) நடிப்பில் உருவாகியுள்ள 'எனிமி' (Enemy)  திரைப்படம் நாளை வெளியாக உள்ள நிலையில், அந்த படத்தின் வெற்றிக்காகவும், தன்னுடைய வேண்டுதலை நிறைவேற்றுவதற்காகவும் விஷால் திருப்பதி ஏழுமலையானை இன்று காலை தரிசனம் செய்துள்ளார். இதுகுறித்த புகைப்படங்கள் தற்போது வெளியாகியுள்ளது.  

சிறந்த நண்பர்களான ஆர்யா - விஷால் இருவரும் இயக்குனர் பாலா இயக்கத்தில் வெளியான 'அவன் இவன்' படத்தை தொடர்ந்து இணைந்து நடித்துள்ள திரைப்படம் 'எனிமி'.

இந்த படத்தை அரிமா நம்பி, இருமுகன் ஆகிய படங்களை இயக்கிய ஆனந்த் சங்கர்  இயக்கி வருகிறார். நடிகை மிருணாளினி இந்தப் படத்தில் கதாநாயகியாக நடித்துள்ளார். இந்தப் படத்தை வினோத் தயாரிக்கிறார். மம்தா மோகன்தாஸ், பிரகாஷ் ராஜ் உள்ளிட்டோரும் இந்தப் படத்தில் முக்கியக் கதாபாத்திரங்களில் பலர் நடித்துள்ளனர்.

மிகப்பெரிய பட்ஜெட்டில், விஷால் - ஆர்யா மீண்டும் ஒன்றிணைந்து நடித்துள்ள, இந்த படத்தின் மீதான எதிர்பார்ப்பு ரசிகர்கள் மத்தியில் அதிகரித்துள்ள நிலையில், நாளை தீபாவளி திருநாளை முன்னிட்டு இந்தப்படம் ரிலீசாக உள்ளது.

சிறு வயதில் இருந்தே போலீஸ் அதிகாரியாக தயாராகும் குழந்தைகள் இருவரில், விஷால் எப்படி போலீஸ் அதிகாரியாக மாறுகிறார், என்ன காரணத்திற்காக ஆர்யா வில்லனாக மாறும் சூழல் உருவாகிறது என்பதை வித்தியாசமான கண்ணோட்டத்தோடு, அதிரடி ஆக்ஷன் காட்சிகளோடு திரைப்படமாகியுள்ளார் இயக்குனர்.

இந்நிலையில் நடிகர் விஷால் தன் நெடுநாள் வேண்டுதலை நிறைவேற்றும் விதமாக திருப்பதி பெருமாளை தரிசிக்க சென்றுள்ளார். கடந்த வருடமே திருப்பதி சென்று கடவுளை தரிசிக்க திட்டமிட்டிருந்தார் ஆனால் கொரோனா பொதுமுடக்கம் காரணமாக அவரால் செல்ல முடியவில்லை. திருப்பதி சென்ற அவர் கீழ்திருப்பதியிலிருந்து மேல்திருப்பதிக்கு  மலையில் நடந்தே சென்று ஏழுமலையானை தற்போது தரிசனம்  செய்துள்ளார்.

மேலும் எனிமியின் பட வெற்றிக்காகவும் வேண்டிக்கொண்டுள்ளார். இவர் திருப்பதியில் சுவாமி தரிசனம் செய்து விட்டு திரும்பும் போது, பிரபல நடிகையும், அரசியல் வாதியுமான ரோஜாவை சந்தித்த புகைப்படமும் வெளியாகியுள்ளது.

நாளைய தினம், சூப்பர் ஸ்டார் ரஜினிகாந்தின் 'அண்ணாத்த' படமும் வெளியாக உள்ளதால், பெருவாரியான ரசிகர்கள் தலைவரின் படத்தையே பார்க்க கூடும். எனவே எனிமி படமும் வெற்றிபெற வேண்டும் என ஏழுமலையானிடம் இன்று விஷால் வேண்டிக்கொள்வதற்காகவே சென்றுள்ளதாக பார்க்கப்படுகிறது.