Lagaan Re-Release: 25 ஆண்டுகளுக்கு பிறகு மீண்டும் தியேட்டருக்கு வரும் 'லகான்'!

Lagaan Re-Release:அமீர் கானின் கல்ட் கிளாசிக் படமான 'லகான்' வெளியாகி 25 ஆண்டுகள் நிறைவடைவதை முன்னிட்டு, ஜூன் 12, 13 மற்றும் 14 ஆகிய தேதிகளில் மீண்டும் திரையரங்குகளில் வெளியாகிறது. இதை முன்னிட்டு, அப்படத்தின் புதிய டிரெய்லர் வெளியாகி வைரலாகி வருகிறது.

25-வது ஆண்டு நிறைவை செய்யும் 'லகான்'!

லகான் வெளியாகி கால் நூற்றாண்டு கடந்த நிலையில் அது மீண்டும் பெரிய திரைக்கு வருகிறது. படத்தின் 25வது ஆண்டு விழாவைக் கொண்டாடும் விதமாக, ஜூன் 12, 13 மற்றும் 14 ஆகிய தேதிகளில் சிறப்புத் திரையிடலை தயாரிப்பாளர்கள் அறிவித்துள்ளனர். அமீர் கான் புரொடக்ஷன்ஸ் நிறுவனம் சமூக வலைத்தளத்தில் இந்த அறிவிப்பை வெளியிட்டது. கோடிக்கணக்கான இதயங்களைத் தொட்ட இந்த காவியத்தின் மேஜிக்கை மீண்டும் திரையரங்குகளில் கொண்டாடுமாறு ரசிகர்களை அழைத்துள்ளது. ரசிகர்கள் கமெண்ட்ஸ் பகுதியில் ஹார்ட்டின்களைப் பறக்கவிட்டு, இது ஒரு மிகச்சிறந்த திரைப்படம் என்று பாராட்டி வருகின்றனர்.

புதிய டிரெய்லர்

புதிதாக வெளியிடப்பட்ட டிரெய்லர், இந்திய சினிமாவில் நீங்கா இடம்பிடித்த இந்தப் படத்தின் நினைவுகளுக்கு ஒரு சமர்ப்பணமாக அமைந்துள்ளது. பிரிட்டிஷ் ஆட்சிக் காலத்தில் இருந்த கிராமப்புற இந்தியாவிற்கு இது நம்மை அழைத்துச் செல்கிறது. படத்தின் சக்திவாய்ந்த கதை மற்றும் உணர்ச்சிகரமான தருணங்களை மீண்டும் நினைவூட்டுகிறது. நட்பு, தைரியம், ஒற்றுமை, காதல், மற்றும் வெற்றிக்கான போராட்டம் என 'லகான்' படத்தை ஒரு கலாச்சார நிகழ்வாக மாற்றிய அனைத்தையும் இந்த டிரெய்லர் காட்டுகிறது. படத்தின் பின்னணி இசை மற்றும் பாடல்களின் காட்சிகள், 2001-ல் தியேட்டரில் பார்த்தவர்களுக்கும், அதைப் பார்க்கத் தவறிய இளம் தலைமுறைக்கும் ஒரு புதுவித அனுபவத்தை அளிக்கும்.

இந்திய சினிமாவின் அடையாளம்!

ஆஷுதோஷ் கௌரிகர் இயக்கி, அமீர் கான் நடிப்பில் 2001-ல் வெளியான 'லகான்: ஒன்ஸ் அபான் எ டைம் இன் இந்தியா' திரைப்படம், விமர்சன ரீதியாகவும், வணிக ரீதியாகவும் மாபெரும் வெற்றி பெற்றது. 1893-ல் நடக்கும் இந்தக் கதையில், கடுமையான வரி மற்றும் வறட்சியால் பாதிக்கப்பட்ட கிராம மக்கள், ஒரு பிரிட்டிஷ் அதிகாரியின் வினோதமான சவாலை ஏற்கிறார்கள். தங்களுக்குத் தெரியாத கிரிக்கெட் விளையாட்டில் வெற்றி பெற்றால் மட்டுமே அவர்களின் வரி ரத்து செய்யப்படும். ஏ.ஆர். ரஹ்மானின் இசை மற்றும் சிறப்பான நடிப்பு, இந்தப் படத்தை உலகளவில் வெற்றி பெறச் செய்தது. 'லகான்' திரைப்படம், சிறந்த வெளிநாட்டு மொழிப் படத்திற்கான அகாடமி விருதுக்கு (ஆஸ்கர்) பரிந்துரைக்கப்பட்டது. மேலும், தேசிய திரைப்பட விருதுகளில் எட்டு விருதுகளை வென்று, இந்திய சினிமா வரலாற்றில் மிக முக்கியமான படங்களில் ஒன்றாக அதன் இடத்தைப் பிடித்துள்ளது.