கஸ்டமர்ஸ் உஷார்! 4 மணிநேரம் ஜிபே, நெட் பேங்கிங் வேலை செய்யாது! பிரபல வங்கி அறிவிப்பு!

ஹெச்டிஎப்சி வங்கி, கணினி அமைப்பு மேம்படுத்தல் காரணமாக ஜனவரி 10, 2026 அன்று அதிகாலை 4 மணிநேரம் டிஜிட்டல் வங்கி சேவைகளை தற்காலிகமாக நிறுத்தவுள்ளது. இந்த நேரத்தில் நெட் பேங்கிங், UPI போன்ற சேவைகள் பாதிக்கப்படும்.

ஹெச்டிஎப்சி வங்கி சேவைகள் நிறுத்தம்

ஹெச்டிஎப்சி வங்கி தனது கணினி அமைப்புகளை மேம்படுத்தும் பணிகளை (System Maintenance) மேற்கொள்ள உள்ளதால், நாளை ஜனவரி 10, 2026 அன்று அதிகாலையில் டிஜிட்டல் வங்கி சேவைகள் தற்காலிகமாக நிறுத்தப்படும் என்று அறிவித்துள்ளது.

வங்கியின் அறிவிப்பின்படி, நாளை அதிகாலை 02:30 மணி முதல் காலை 06:30 மணி வரை (மொத்தம் 4 மணிநேரம்) பராமரிப்பு பணிகள் நடைபெறும். இந்த நேரத்தில் வாடிக்கையாளர்கள் தங்களது வங்கிச் சேவைகளை அணுகுவதில் சிக்கல் ஏற்படும்.

எந்தெந்த சேவைகள் பாதிக்கப்படும்?

பராமரிப்பு பணிகளின் போது கீழே கொடுக்கப்பட்டுள்ள முக்கிய சேவைகள் வேலை செய்யாது:

• நெட் பேங்கிங் மற்றும் மொபைல் ஆப் அணுகல்.

• யுபிஐ (UPI) பணப் பரிமாற்றங்கள்.

• நிதிப் பரிமாற்ற சேவைகளான NEFT, IMPS மற்றும் RTGS.

• ஆன்லைன் பேமெண்ட்கள் மற்றும் கணக்கு தொடர்பான இதர பரிவர்த்தனைகள்.

இருப்பினும், இந்த நேரத்தில் வாடிக்கையாளர்கள் பேஸாப் வேலட் (PayZapp Wallet) மூலம் தொடர்ந்து பணப் பரிமாற்றங்களைச் செய்யலாம் என்று வங்கி தெரிவித்துள்ளது. எனவே, அவசரத் தேவைகளுக்காகப் பணத்தை முன்கூட்டியே திட்டமிட்டுக் கொள்ள அறிவுறுத்தப்படுகிறது.

டிஜிட்டல் ரூபாயுடன் புதிய இணைப்பு

மற்றொரு முக்கியச் செய்தியாக, ஹெச்டிஎப்சி வங்கி தனது 'ஸ்மார்ட்கேட்வே' (SmartGateway) தளத்தில் ரிசர்வ் வங்கியின் டிஜிட்டல் ரூபாயை (Digital Rupee) இணைத்துள்ளது. இதன் மூலம் வணிகர்கள் எவ்வித பரிவர்த்தனை கட்டணமும் இன்றி வாடிக்கையாளர்களிடம் இருந்து பணத்தைப் பெற்றுக்கொள்ள முடியும். இது பாதுகாப்பான மற்றும் கூடுதல் கட்டணமில்லாத புதிய பேமெண்ட் முறையாக அறிமுகம் செய்யப்பட்டுள்ளது.

பணப் பரிமாற்ற பாதுகாப்பு டிப்ஸ்!

ஆன்லைன் மோசடிகளில் இருந்து தப்பிக்க வங்கி சில பாதுகாப்பு ஆலோசனைகளையும் வழங்கியுள்ளது:

1. பேங்க் ஸ்டேட்மென்ட்: உங்கள் வங்கி கணக்கு விவரங்களை அடிக்கடி சரிபார்க்கவும். மிகச்சிறிய அளவில் தெரியாத பரிவர்த்தனை நடந்திருந்தாலும் உடனே வங்கியைத் தொடர்பு கொள்ளவும்.

2. அதிகாரப்பூர்வ ஆப்கள்: ஜிபே (GPay), போன்பே (PhonePe) போன்ற யுபிஐ ஆப்களை எப்போதும் கூகுள் பிளே ஸ்டோர் அல்லது ஆப்பிள் ஆப் ஸ்டோர் போன்ற அதிகாரப்பூர்வ தளங்களில் இருந்து மட்டுமே பதிவிறக்கம் செய்யவும்.