சேமிப்பு கணக்குல சும்மா இருக்குற பணத்துக்கு 3 மடங்கு வட்டி! இந்த ஆப்ஷனை உடனே செக் பண்ணுங்க!

சாதாரண சேமிப்புக் கணக்கில் குறைந்த வட்டியே கிடைக்கிறது. ஆனால், வங்கிகளின் 'ஆட்டோ ஸ்வீப்' வசதி மூலம், உங்கள் கணக்கில் உள்ள உபரிப் பணத்தை தானாகவே ஃபிக்சட் டெபாசிட்டிற்கு மாற்றி, சுமார் 3 மடங்கு அதிக வட்டி பெறலாம்.

3 மடங்கு வட்டி வேண்டுமா?

நம்மில் பலரும் கஷ்டப்பட்டு சம்பாதித்த பணத்தை வங்கியின் சேமிப்பு கணக்கில் (Savings Account) போட்டு வைத்திருப்போம். ஆனால், அந்தப் பணத்திற்கு வெறும் 2.5% முதல் 3% வரை மட்டுமே வட்டி கிடைக்கிறது. ஒரு சிறிய விழிப்புணர்வு இருந்தால், இதே பணத்திற்கு நீங்கள் 7% முதல் 8% வரை வட்டி பெற முடியும். இதற்கு வங்கிகள் வழங்கும் 'ஆட்டோ ஸ்வீப்' (Auto Sweep Facility) என்ற சேவைதான் காரணம்.

'ஆட்டோ ஸ்வீப்' என்றால் என்ன?

இது உங்கள் சேமிப்பு கணக்கையும், நிலையான வைப்புத் தொகையையும் (Fixed Deposit - FD) இணைக்கும் ஒரு வசதியாகும். உங்கள் கணக்கில் ஒரு குறிப்பிட்ட வரம்பிற்கு மேல் பணம் இருந்தால், அந்த உபரித் தொகையை வங்கி தானாகவே எஃப்டி (FD) கணக்கிற்கு மாற்றிவிடும்.

உதாரணமாக, உங்கள் கணக்கில் ரூ. 50,000-க்கு மேல் இருக்கும் பணத்திற்கு ஆட்டோ ஸ்வீப் வசதி செய்துள்ளீர்கள் என்று வைத்துக்கொள்வோம். இப்போது உங்கள் கணக்கில் ரூ. 80,000 இருந்தால், அதில் உள்ள உபரித் தொகையான ரூ. 30,000 தானாகவே எஃப்டி கணக்கிற்கு மாறிவிடும். இதற்கு எஃப்டி-க்கு இணையான (7% - 8%) வட்டி கிடைக்கும். மீதமுள்ள ரூ. 50,000-க்கு வழக்கமான சேமிப்பு கணக்கு வட்டி கிடைக்கும்.

ஆட்டோ ஸ்வீப் சிறப்பம்சங்கள்

1. அதிக லாபம்: சாதாரண சேமிப்பு கணக்கை விட கிட்டத்தட்ட 3 மடங்கு அதிக வட்டி கிடைக்கும்.

2. எப்போது வேண்டுமானாலும் எடுக்கலாம்: எஃப்டி-க்கு மாறினாலும், உங்களுக்குப் பணம் தேவைப்படும்போது அந்தப் பணத்தை நீங்கள் எப்போது வேண்டுமானாலும் எடுத்துக் கொள்ளலாம். இதற்குத் தனியாக எஃப்டி-யை உடைக்க வேண்டிய அவசியமில்லை.

3. அலைச்சலற்றது: இதற்காகத் தனியாக எஃப்டி கணக்கு தொடங்க வங்கிக்குச் செல்லத் தேவையில்லை. எல்லாம் தானாகவே (Automatic) நடக்கும்.

ஆட்டோ ஸ்வீப் வசதியை எப்படிப் பெறுவது?

• ஆன்லைன் மூலம்: வங்கியின் மொபைல் ஆப் அல்லது நெட் பேங்கிங் மூலம் 'Fixed Deposit' அல்லது 'More' ஆப்ஷனுக்குச் சென்றால் 'Auto Sweep Facility' என்ற வசதி இருக்கும். அதில் உங்களுக்கான வரம்பை (Limit) நிர்ணயம் செய்து ஆக்டிவேட் செய்யலாம்.

• நேரடியாக: உங்கள் வங்கி கிளைக்குச் சென்று ஒரு விண்ணப்பம் அளிப்பதன் மூலமும் இந்தச் சேவையைத் தொடங்கலாம்.

உங்களிடம் உபரிப் பணம் இருந்தால், அதைச் சும்மா சேமிப்பு கணக்கில் வைத்திருக்காமல், ஆட்டோ ஸ்வீப் மூலம் அதிக லாபம் பெறுங்கள்!