இப்போ போனா சேமிப்பு… பிறகு செலவு.. இண்டிகோ டிக்கெட் விலை உயரப்போகுது

இயக்கச் செலவுகள் மற்றும் எரிபொருள் விலை உயர்வால், இண்டிகோ நிறுவனம் விமான டிக்கெட் கட்டணங்களை உயர்த்தியுள்ளது. அந்நியச் செலாவணி மாற்றங்களும் இந்த உயர்வுக்கு காரணமாகியுள்ள நிலையில், எதிர்காலத்தில் கட்டணங்கள் மேலும் அதிகரிக்க வாய்ப்புள்ளது.

இண்டிகோ டிக்கெட் விலை

நாட்டின் மிகப்பெரிய விமான சேவை நிறுவனங்களில் ஒன்றான இண்டிகோ, இயக்கச் செலவுகள் அதிகரித்துள்ளதால் விமான டிக்கெட் கட்டணங்களை உயர்த்தும் முடிவை எடுத்துள்ளது. இந்த மாற்றம் பயணிகளின் எண்ணிக்கையை பாதிக்கக்கூடும் என்ற கவலையும் நிறுவனம் தெரிவித்துள்ளது. குறிப்பாக, மத்திய கிழக்கு பிராந்தியத்தில் நிலவும் பதற்றம் காரணமாக எரிபொருள் விலை உயர்ந்தது, சில விமான சேவைகளில் ஏற்பட்ட தடங்கல்களும் இந்த முடிவிற்கு காரணமாக உள்ளன.

விமான கட்டணம் உயர்வு

செலவுகளை சமாளிக்க, இண்டிகோ நிறுவனம் ஏற்கனவே எரிபொருள் கூடுதல் கட்டணத்தை அறிமுகப்படுத்தியுள்ளது. பயண தூரத்தைப் பொறுத்து ரூ.425 முதல் ரூ.2,300 வரை இந்த கூடுதல் கட்டணம் வசூலிக்கப்படுகிறது. விமான சேவைகளின் மொத்த இயக்கச் செலவில் சுமார் 40% எரிபொருளுக்கே செலவாகிறது. இதனால், எரிபொருள் விலை உயர்வு நேரடியாக டிக்கெட் கட்டணங்களில் தாக்கத்தை ஏற்படுத்துகிறது.

எரிபொருள் கூடுதல் கட்டணம்

இதற்கு கூடுதலாக, அந்நியச் செலாவணி மாற்றங்களும் விமான நிறுவனங்களுக்கு சவாலாக உள்ளன. பல செலவுகள் வெளிநாட்டு நாணயத்தில் இருப்பதால், ரூபாயின் மதிப்பு குறையும்போது நிறுவனத்தின் செலவுகள் மேலும் அதிகரிக்கின்றன. இந்த காரணங்களால், எதிர்காலத்தில் டிக்கெட் விலை மேலும் உயரும் வாய்ப்பு இருப்பதாக கூறப்படுகிறது.

உள்நாட்டு விமான டிக்கெட்

இந்நிலையில், உள்நாட்டு விமான டிக்கெட்டுகளுக்கான அரசின் கட்டண வரம்பு நீக்கப்பட்டுள்ளது. இதனால், விமான நிறுவனங்கள் சந்தை தேவைக்கு ஏற்ப விலையை நிர்ணயிக்கலாம். முன்பு, ஒருவழி ஏகானமி டிக்கெட்டுக்கு அதிகபட்சமாக ரூ.18,000 வரை மட்டுமே நிர்ணயிக்கப்பட்டிருந்தது. எனினும், தேவையில்லாமல் அதிக கட்டணம் வசூலித்தால் கடுமையான நடவடிக்கை எடுக்கப்படும் என்று மத்திய அரசு எச்சரித்துள்ளது.

பங்குச் சந்தையில் இண்டிகோ

இந்த செய்திகளின் பின்னணியிலும், பங்குச் சந்தையில் இண்டிகோ பங்கு சிறிய அளவில் உயர்வைக் கண்டது. ஒரு நாளில் சுமார் 1.91% உயர்ந்தாலும், கடந்த ஒரு மாதத்தில் 14% மேல் சரிவு, ஒரு வருடத்தில் சுமார் 15% குறையும் பதிவாகியுள்ளது.