ஏப்ரல் 1 முதல் 7 அதிரடி மாற்றங்கள்.. ஏடிஎம், சம்பளம், வரி.. எல்லாமே மாறுது.!

ஏப்ரல் 1, 2026 முதல் தொடங்கும் புதிய நிதியாண்டில், வருமான வரி, வங்கி சேவைகள், மற்றும் சம்பளக் கட்டமைப்பு ஆகியவற்றில் முக்கிய மாற்றங்கள் அமலுக்கு வருகின்றன.

ஏப்ரல் 1, 2026 முதல் புதிய நிதியாண்டு தொடங்குகிறது. இதனுடன், வரி, வங்கி, சேமிப்பு, செலவுகள் போன்ற பல துறைகளில் முக்கியமான மாற்றங்கள் அமலுக்கு வருகின்றன. இந்த மாற்றங்கள் பொதுமக்களின் தினசரி வாழ்க்கை, சம்பளம், சேமிப்பு மற்றும் செலவின முறைகளால் நேரடி தாக்கத்தை ஏற்படுத்தும். குறிப்பாக, வருமான வரி சட்டம் முதல் ஏடிஎம் பயன்படுத்துதல் வரை பல விதிமுறைகள் புதுப்பிக்கப்படுகின்றன. புதிய நிதியாண்டு ஆரம்பமே ஒரு “பண ஒழுங்கு மாற்றம்” போல இருக்கும்.

புதிய வருமான வரி சட்டம் 2025, வரி கணக்கீட்டை எளிமைப்படுத்தும் நோக்கில் கொண்டு வரப்பட்டுள்ளது. இதில் “நிதி ஆண்டு” மற்றும் “மதிப்பீட்டு ஆண்டு” என்ற பிரிவுகளை மாற்றி “வரி ஆண்டு” என்ற புதிய கருத்து அறிமுகப்படுத்தப்பட்டுள்ளது. இருப்பினும், பழைய மற்றும் புதிய வரி முறைகளில் வரி சலுகைகளில் மாற்றம் இல்லை. புதிய வரி முறை இயல்பான தேர்வாக தொடரும் என்பதால், குறைந்த கழிவுகளுடன் எளிய வரி கட்டமைப்பை மக்கள் அதிகம் தேர்வு செய்யும் வாய்ப்பு உள்ளது.

வங்கி சேவைகளிலும் மாற்றங்கள் உள்ளன. ஏடிஎம்-ல் பணம் எடுக்கும் இலவச பரிவர்த்தனைகளின் வரம்பு மாற்றப்படலாம். யுபிஐ மூலம் ஏடிஎம்-ல் பணம் எடுப்பதும் இப்போது அந்த இலவச வரம்பில் கணக்கிடப்படும். சில வங்கிகள் தினசரி பணம் எடுக்கும் வரம்பை குறைத்துள்ளன. இதனால், அதிகமாக ஏடிஎம் பயன்படுத்தும் நபர்களுக்கு கூடுதல் கட்டணங்கள் விதிக்கப்படலாம். மேலும், குறைந்தபட்ச இருப்புத் தொகை விதிமுறைகளும் கடுமையாக்கப்பட வாய்ப்பு உள்ளது.

ஊழியர்களுக்கு சம்பள கட்டமைப்பில் பெரிய மாற்றம் வர உள்ளது. புதிய விதிப்படி, அடிப்படை சம்பளம் மொத்த சம்பளத்தின் குறைந்தது 50% ஆக இருக்க வேண்டும். இதனால் இபிஎப்-க்கு செலுத்தும் தொகை அதிகரிக்கும். இது ஓய்வூதிய சேமிப்பை உயர்த்தினாலும், கையில் கிடைக்கும் சம்பளம் குறையக்கூடும். அதே சமயம், கிராச்சுவுட்டி போன்ற நீண்டகால நன்மைகள் அதிகரிக்கும். அரசு ஊழியர்களுக்கு ஓய்வூதிய திட்டங்களைத் தேர்வு செய்யும் சுதந்திரமும் அதிகரிக்கப்படலாம்.

மேலும், பான் மற்றும் ஆதார் இணைப்பு விதிகள் கடுமையாக்கப்படுகின்றன. அதிக மதிப்புள்ள பரிவர்த்தனைகளுக்கான கண்காணிப்பு அதிகரிக்கும். இதன் மூலம் வரி ஏய்ப்பை கட்டுப்படுத்த அரசு முயற்சிக்கிறது. இதற்கிடையில், எரிபொருள் விலை, எல்பிஜி, பாஸ்டேக் கட்டணங்கள் மற்றும் ரயில் டிக்கெட் ரத்து விதிகளிலும் மாற்றங்கள் எதிர்பார்க்கப்படுகின்றன. முதலீட்டாளர்களுக்கு எஸ்டிடி மற்றும் மூலதன லாப வரிகளில் மாற்றங்கள் வரக்கூடும். மொத்தத்தில், இந்த புதிய நிதியாண்டு ஒவ்வொரு குடும்பத்திற்கும் அவர்களின் நிதி திட்டங்களை மறுபரிசீலனை செய்ய வேண்டிய காலமாக இருக்கும்.