டிவிஎஸ் நிறுவனம் மலிவு விலை எலெக்ட்ரிக் ஸ்கூட்டரை அறிமுகப்படுத்தி உள்ளது. அதன் விலை 50 ஆயிரத்திற்கும் குறைவாக உள்ளது. அந்த ஸ்கூட்டர் பற்றி விரிவாக பார்க்கலாம்.
இந்தியாவின் முன்னணி இருசக்கர மற்றும் மூன்று சக்கர வாகனத் தயாரிப்பு நிறுவனமான டிவிஎஸ் மோட்டார் கம்பெனி, எலக்ட்ரிக் ஸ்கூட்டர் மார்க்கெட்டில் ஒரு புதிய அதிரடியை ஏற்படுத்தியுள்ளது. அந்நிறுவனம் தனது எலக்ட்ரிக் வாகன வரிசையில் மிகவும் விலை குறைந்த ஸ்கூட்டரான டிவிஎஸ் ஆர்பிட்டர் V1 (1.8 kWh) மாடலை அறிமுகம் செய்துள்ளது. வாடிக்கையாளர்கள் சுலபமாக எலக்ட்ரிக் ஸ்கூட்டரை வாங்கும் வகையில், 'பேட்டரி-ஆஸ்-எ-சர்வீஸ்' (BaaS) என்ற புதிய திட்டத்தையும் டிவிஎஸ் அறிவித்துள்ளது.
25
டிவிஎஸ் ஆர்பிட்டர் வி1
இந்த BaaS திட்டத்தின் மூலம், டிவிஎஸ் எலக்ட்ரிக் ஸ்கூட்டர் வரிசையின் ஆரம்ப விலை வெறும் ரூ.49,999 (டெல்லி எக்ஸ்-ஷோரூம், PM E-Drive உட்பட) ஆகக் குறைந்துள்ளது. இந்தத் திட்டத்தில், ஸ்கூட்டரை பேட்டரி இல்லாமல் வாங்கிக்கொள்ளலாம். பேட்டரிக்கு தனியாக சந்தா செலுத்த வேண்டும். இதனால் ஆரம்பகட்ட செலவு குறைவதோடு, பேட்டரிக்கு நீண்ட கால உத்தரவாதமும் கிடைக்கிறது. ஒருவேளை, BaaS திட்டம் இல்லாமல் முழுமையாக ஸ்கூட்டரை வாங்க விரும்பினால், புதிய டிவிஎஸ் ஆர்பிட்டர் V1 மாடலின் விலை ரூ.84,500. இது மாநிலங்களுக்கு ஏற்றவாறு மாறக்கூடும்.
35
டிவிஎஸ் ஆர்பிட்டர் வி1 மாடல்
நகர்ப்புறங்களில் தினமும் பயணம் செய்பவர்களுக்காகவே இந்த 1.8 kWh பேட்டரி கொண்ட டிவிஎஸ் ஆர்பிட்டர் V1 பிரத்யேகமாக வடிவமைக்கப்பட்டுள்ளது. இந்த புதிய அறிமுகத்தின் மூலம், டிவிஎஸ் ஆர்பிட்டர் வரிசையில் இப்போது V1 (1.8 kWh) மற்றும் V2 (3.1 kWh) என இரண்டு வேரியன்ட்கள் உள்ளன.
டிவிஎஸ் ஆர்பிட்டர் V1, ஒருமுறை சார்ஜ் செய்தால் 86 கி.மீ வரை செல்லும் என சான்றளிக்கப்பட்டுள்ளது (IDC ரேஞ்ச்). இதன் பேட்டரியை வெறும் 2 மணி 20 நிமிடங்களில் 0-விலிருந்து 80% வரை சார்ஜ் செய்துவிட முடியும். இதனால், தினசரி பயணங்களுக்கு இது மிகவும் ஏற்றதாக இருக்கும். மேலும், கனெக்டட் மொபைல் ஆப், வைஸருடன் கூடிய முன்பக்க எல்இடி ஹெட்லேம்ப், இன்கமிங் கால் விவரங்களைக் காட்டும் கலர் எல்சிடி கிளஸ்டர் போன்ற நவீன அம்சங்களும் இதில் உள்ளன.
55
டிவிஎஸ் ஆர்பிட்டர் வி1 அம்சங்கள்
இந்த ஸ்கூட்டரின் வடிவமைப்பு ஸ்டைலாகவும், அதே சமயம் பயன்படுத்துவதற்கு எளிதாகவும் இருக்கிறது. 845 மி.மீ நீளமுள்ள இதன் தட்டையான சீட், ஓட்டுபவருக்கும் பின்னால் அமர்ந்திருப்பவருக்கும் வசதியான பயணத்தை உறுதி செய்கிறது. கால்கள் வைக்க 290 மி.மீ அகலமான இடவசதி உள்ளது. அகலமான மற்றும் நிமிர்ந்த ஹேண்டில்பார் இருப்பதால், நீண்ட தூரம் ஓட்டினாலும் சோர்வு ஏற்படாது. சீட்டுக்கு அடியில் 34 லிட்டர் ஸ்டோரேஜ் வசதி கொடுக்கப்பட்டுள்ளது. இதில் இரண்டு ஹெல்மெட்களை எளிதாக வைத்துக்கொள்ளலாம்.
