Fortuner 2026: கெத்து காட்ட வரும் புதிய ஃபார்ச்சூனர்... என்னவெல்லாம் மாறப்போகுது?

டொயோட்டா ஃபார்ச்சூனரின் அடுத்த தலைமுறை மாடல் 2026 இறுதியில் அறிமுகமாகும் என எதிர்பார்க்கப்படுகிறது. டெஸ்டிங்கில் உள்ள இந்த காரின் ஸ்பை படங்கள், புதிய டிசைன் ஆகியவற்றைக் காட்டுகின்றன.

New Generation Toyota Fortuner

இந்தியாவில் டொயோட்டா ஃபார்ச்சூனருக்கு ஒரு பெரிய ரசிகர் பட்டாளமே இருக்கிறது. அதன் ரோடு பிரசன்ஸ், ஆஃப்-ரோடு திறன், பிராண்ட் மீதான நம்பிக்கை, மற்றும் நல்ல ரீசேல் வேல்யூ ஆகியவைதான் இதற்குக் காரணம். இந்த எஸ்யூவி தற்போது இரண்டாவது தலைமுறை மாடலாக விற்பனையில் உள்ளது. 2025-ஆம் ஆண்டின் மத்தியில், 48V மைல்டு-ஹைப்ரிட் (நியோ டிரைவ்) தொழில்நுட்பத்துடன் ஒரு அப்டேட் செய்யப்பட்டது. இப்போது, டொயோட்டா ஃபார்ச்சூனர் ஒரு முழுமையான தலைமுறை மாற்றத்திற்குத் தயாராகி வருகிறது. இது 2026-ஆம் ஆண்டின் இறுதியில் அறிமுகமாகும் என எதிர்பார்க்கப்படுகிறது.

மூன்றாவது தலைமுறை டொயோட்டா ஃபார்ச்சூனர், 2026 இறுதியில் உலகளவில் அறிமுகமாகி, 2027-ன் தொடக்கத்தில் இந்தியாவில் அறிமுகம் செய்யப்படும் என்று எதிர்பார்க்கப்படுகிறது. சமீபத்தில் தாய்லாந்தில் இதன் சோதனை மாடல் ஒன்று டெஸ்டிங் செய்யும்போது கேமராவில் சிக்கியுள்ளது. இது காரின் டிசைனில் பெரிய மாற்றங்கள் இருப்பதைக் காட்டுகிறது.

டிசைனில் என்னென்ன மாற்றங்கள்?

சோதனை செய்யப்பட்ட மாடல் முழுவதுமாக மறைக்கப்பட்டிருந்தாலும், அதன் ஒட்டுமொத்த தோற்றமும், மஸ்குலர் பாடியும் தற்போதைய மாடலைப் போலவே தெரிகிறது. இருப்பினும், புதிய ஃபார்ச்சூனர் இன்னும் கொஞ்சம் பாக்ஸியான, கம்பீரமான தோற்றத்துடனும், அகலமான முன்பக்க அமைப்புடனும் வர வாய்ப்புள்ளது.

முன்பக்கத்தைப் பொறுத்தவரை, 2026 டொயோட்டா ஃபார்ச்சூனரில் சற்று கீழே பொருத்தப்பட்ட ஸ்ப்ளிட் ஹெட்லேம்ப் அமைப்பு, முற்றிலும் புதிய மற்றும் பெரிய கிரில், மறுவடிவமைப்பு செய்யப்பட்ட பம்பர், மெல்லிய LED DRL-கள் மற்றும் சற்று கீழே வைக்கப்பட்ட ஃபாக் லேம்ப் கிளஸ்டர்கள் ஆகியவை இடம்பெறும். பானட்டும் முன்பை விட தட்டையாகக் காணப்படுகிறது.

அலாய் வீல்கள், டெயில்கேட் டிசைன், LED டெயில்லேம்ப்கள் மற்றும் பின்பக்க பம்பர் ஆகியவை முழுமையாக மாற்றியமைக்கப்படும். அதே சமயம், தற்போதைய மாடலில் உள்ள சதுர வடிவ வீல் ஆர்ச்சுகள், ரூஃப் ரெயில்கள் மற்றும் சில டிசைன் அம்சங்கள் அப்படியே தொடரும் என எதிர்பார்க்கப்படுகிறது. ஒரு முக்கிய மெக்கானிக்கல் அப்டேட்டாக, Hilux மாடலில் இருந்து பெறப்பட்ட மேம்படுத்தப்பட்ட IMV லேடர்-ஃப்ரேம் சேஸி இதில் வரலாம்.

அதிக டெக்னாலஜி மற்றும் புதிய வசதிகள்

டிசைனைப் போலவே, புதிய 2026 டொயோட்டா ஃபார்ச்சூனர் எஸ்யூவியின் இன்டீரியரும் முழுமையாக மறுவடிவமைப்பு செய்யப்பட்டு, அதிக வசதிகளுடன் வர வாய்ப்புள்ளது. புதிய Hilux மாடலில் இருந்து 12.3-இன்ச் பெரிய டச்ஸ்கிரீன் இன்ஃபோடெயின்மென்ட் சிஸ்டம் மற்றும் முழு டிஜிட்டல் டிரைவர் டிஸ்ப்ளே ஆகியவை இதில் இடம்பெறலாம்.

சோதனை வாகனத்தின் கீழ் பம்பரில் பொருத்தப்பட்டிருந்த ADAS ரேடார் மாட்யூல் மற்றும் விண்ட்ஸ்கிரீனுக்குப் பின்னால் உள்ள கேமராக்கள், டொயோட்டாவின் 'Safety Sense' பாதுகாப்புத் தொகுப்பு இதில் இடம்பெறுவதை உறுதி செய்கின்றன.

புதிய ஃபார்ச்சூனரில் வென்டிலேட்டட் மற்றும் பவர்டு முன்பக்க சீட்கள், வயர்லெஸ் சார்ஜிங், 360 டிகிரி கேமரா, சன்ரூஃப், மேம்படுத்தப்பட்ட கனெக்டிவிட்டி அம்சங்கள் மற்றும் OTA (ஓவர்-தி-ஏர்) அப்டேட்கள் போன்ற வசதிகளையும் டொயோட்டா வழங்கலாம்.

தற்போதைய இன்ஜின்கள் தொடருமா?

இந்தியாவிற்கு வரும் 2026 டொயோட்டா ஃபார்ச்சூனரில், தற்போதைய 2.7 லிட்டர் பெட்ரோல் மற்றும் 2.8 லிட்டர் டீசல் இன்ஜின் ஆப்ஷன்களே தொடரும் என எதிர்பார்க்கப்படுகிறது. டொயோட்டாவின் 48V மைல்டு-ஹைப்ரிட் சிஸ்டத்துடன் கூடிய 2.8 லிட்டர் டீசல் இன்ஜின், ஃபார்ச்சூனர் நியோ டிரைவ் ஆகவும் கிடைக்கும். டிரான்ஸ்மிஷன் ஆப்ஷன்களான 6-ஸ்பீடு மேனுவல், டார்க் கன்வெர்ட்டர் ஆட்டோமேட்டிக் மற்றும் 4WD சிஸ்டம் ஆகியவற்றிலும் எந்த மாற்றமும் இருக்காது எனத் தெரிகிறது.