Messi : ரொனால்டோ சாதனை முறியடிப்பு! உலகக் கோப்பையில் புதிய வரலாறு படைத்த மெஸ்ஸி!

Messi Breaks Ronaldo Record : தனது 38 வயதில், 2026 உலகக் கோப்பையின் முதல் போட்டியிலேயே ஹாட்ரிக் கோல் அடித்து லியோனல் மெஸ்ஸி அசத்தியுள்ளார். இதன்மூலம், கிறிஸ்டியானோ ரொனால்டோவின் சாதனையை அவர் முறியடித்துள்ளார்.

அமெரிக்காவின் மிசோரி மாகாணத்திலிருந்து வரும் செய்திகளின்படி, அர்ஜென்டினா கால்பந்து அணியின் கேப்டன் லியோனல் மெஸ்ஸி, தனது 38 வயதில் ஒரு புதிய உலக சாதனை படைத்துள்ளார். செவ்வாய்க்கிழமை (உள்ளூர் நேரப்படி) அல்ஜீரியாவுக்கு எதிராக நடந்த போட்டியில், மெஸ்ஸி ஒரு அற்புதமான ஹாட்ரிக் கோல் அடித்து, அர்ஜென்டினாவை 3-0 என்ற கோல் கணக்கில் வெற்றி பெற வைத்தார். இது 2026 உலகக் கோப்பை தொடரில் அர்ஜென்டினாவின் முதல் போட்டியாகும்.

ஃபாக்ஸ் ஸ்போர்ட்ஸ் அறிக்கையின்படி, 38 வயதும் 357 நாட்களும் ஆன மெஸ்ஸி, இதன் மூலம் உலகக் கோப்பை வரலாற்றில் ஹாட்ரிக் அடித்த வயதான வீரர் என்ற பெருமையைப் பெற்றுள்ளார். இதற்கு முன்பு, அவருடைய முக்கிய போட்டியாளரான போர்ச்சுகல் வீரர் கிறிஸ்டியானோ ரொனால்டோ இந்த சாதனையை வைத்திருந்தார். 2018 ரஷ்ய உலகக் கோப்பையில், ஸ்பெயினுக்கு எதிராக ரொனால்டோ தனது 33 வயதில் ஹாட்ரிக் அடித்ததே முந்தைய சாதனையாக இருந்தது. இப்போது மெஸ்ஸி அதை முறியடித்துள்ளார். மேலும், ஒரு போட்டியில் இரண்டு கோல்கள் மற்றும் ஹாட்ரிக் அடித்த வயதான வீரர் என்ற சாதனையையும் மெஸ்ஸி படைத்துள்ளார்.

மெஸ்ஸி படைத்த சாதனை

அர்ஜென்டினாவுக்காக தனது 200வது போட்டியில் களமிறங்கிய மெஸ்ஸி, மூன்று கோல்களையும் மூன்று விதமாக அடித்து ரசிகர்களை பிரமிக்க வைத்தார். போட்டியின் 17வது நிமிடத்தில், ரோட்ரிகோ டி பால் கொடுத்த ஃப்ரீ-கிக் பாஸை, பவர்ஃபுல்லான ஒரு லாங்-ரேஞ்ச் ஷாட் மூலம் முதல் கோலாக மாற்றினார்.

அடுத்ததாக, மேக் அலிஸ்டர் அடித்த பந்து கோல்கீப்பரிடம் பட்டு ரீபவுண்ட் ஆக, சரியான நேரத்தில் அந்த பந்தை பெற்று, மிக அருகில் இருந்து தனது இரண்டாவது கோலை அடித்தார். போட்டியின் 76வது நிமிடத்தில், அவரே பந்தை எடுத்துச் சென்று, எதிரணி வீரர்களை லாவகமாக கடந்து, ஒரு அழகான கர்லிங் ஷாட் மூலம் தனது ஹாட்ரிக்கை நிறைவு செய்தார்.

இந்த ஹாட்ரிக் மூலம், மெஸ்ஸி பல சாதனைகளை தன்வசப்படுத்தியுள்ளார். அதில் முக்கியமானது, உலகக் கோப்பை வரலாற்றில் அதிக கோல்கள் அடித்த வீரர் என்ற சாதனையை சமன் செய்ததுதான். ஜெர்மனியின் மிரோஸ்லாவ் க்ளோஸேவின் 16 கோல்கள் என்ற சாதனையை மெஸ்ஸி இப்போது சமன் செய்துள்ளார்.

இதன் மூலம், பிரேசில் வீரர் ரொனால்டோ (15 கோல்கள்), ஜெர்மனியின் கெர்ட் முல்லர் (14 கோல்கள்) மற்றும் பிரான்சின் கிலியன் எம்பாப்பே (14 கோல்கள்) ஆகியோரை அவர் பின்னுக்குத் தள்ளியுள்ளார். இதே நாளில் நடந்த மற்றொரு போட்டியில், செனகலுக்கு எதிராக பிரான்ஸ் 3-1 என்ற கோல் கணக்கில் வெற்றி பெற்றபோது, எம்பாப்பே இரண்டு கோல்கள் அடித்து முல்லரின் சாதனையை சமன் செய்திருந்தார் என்பது குறிப்பிடத்தக்கது.

இன்னொரு சுவாரஸ்யமான விஷயம் என்னவென்றால், மெஸ்ஸி தனது முதல் உலகக் கோப்பை கோலை 2006-ல் செர்பியாவுக்கு எதிராக அடித்திருந்தார். சரியாக 20 ஆண்டுகளுக்குப் பிறகு, அதேபோன்ற ஒரு வரலாற்று சிறப்புமிக்க ஆட்டத்தை வெளிப்படுத்தி இந்த ஹாட்ரிக் சாதனையை அவர் நிகழ்த்தியுள்ளார்.