அடுத்த மாசம் வலிமை மட்டுமல்ல.... எச்.வினோத்தின் மற்றொரு படமும் ரிலீசாகப் போகுது - லீக்கான தகவல்

போனி கபூர் தயாரிப்பில் எச்.வினோத் (H vinoth) இயக்கத்தில் அஜித் (Ajith) நடித்துள்ள வலிமை (Valimai) திரைப்படம் வருகிற பொங்கல் பண்டிகைக்கு திரையரங்குகளில் ரிலீசாக உள்ளது.

சதுரங்க வேட்டை படத்தின் மூலம் இயக்குனராக அறிமுகமானவர் எச்.வினோத். வித்தியாசமான கதையம்சத்தோடு உருவாகி இருந்த இப்படம் மிகப்பெரிய வெற்றியை பெற்றது. முதல் படத்திலேயே முத்திரை பதித்த எச்.வினோத், அடுத்ததாக கார்த்தியின் தீரம் அதிகாரம் ஒன்று படத்தை இயக்கினார். 

இப்படமும் பிளாக்பஸ்டர் வெற்றியை பெற்றதோடு அஜித்தின் நேர்கொண்ட பார்வை படத்தை இயக்கும் வாய்ப்பையும் பெற்றுத்தந்தது. இது ரீமேக் படமாக இருந்தாலும் தமிழ் ரசிகர்களுக்கு ஏற்றவாறு கொடுத்து வெற்றி வாகை சூடினார் வினோத். இப்படத்தில் வினோத்தின் திறமையை பார்த்து வியந்துபோன அஜித் தனது அடுத்த படமான ‘வலிமை’ படத்தை இயக்கும் வாய்ப்பையும் கொடுத்தார்.

இந்த படம் வருகிற ஜனவரி மாதம் பொங்கல் பண்டிகைக்கு ரிலீசாக உள்ளது. இதேபோல் எச்.வினோத், கதை திரைக்கதை மற்றும் வசனம் எழுதிய ‘சதுரங்க வேட்டை 2’ (Sathuranga vettai 2) படமும் அடுத்த மாதம் ரிலீசாக உள்ளதாம். இப்படத்தில் அரவிந்த் சாமி ஹீரோவாக நடித்துள்ளார். அவருக்கு ஜோடியாக திரிஷா நடித்திருக்கிறார். இப்படத்தை சலீம் பட இயக்குனர் நிர்மல் குமார் இயக்கி உள்ளார்.

சம்பள விஷயத்தில் இப்படத்தின் நாயகன் அரவிந்த் சாமிக்கும், தயாரிப்பாளர் மனோபாலாவுக்கு இடையே மோதல் ஏற்பட்டதால் இப்படம் நீண்ட நாட்களாக ரிலீசாகாமல் முடங்கி இருந்தது. தற்போது அந்த பிரச்சனைகள் தீர்க்கப்பட்டு ரிலீசுக்கு தயாராகி உள்ளது. 

எச்.வினோத்தின் வலிமை படம் அடுத்த மாதம் ரிலீசாக உள்ளதால், அவர் பணியாற்றியுள்ள இப்படத்தையும் அடுத்த மாதமே வெளியிட்டால் வரவேற்பு கிடைக்கும் எனக் கருதி, ஜனவரி மாத இறுதியில் வெளியிட திட்டமிட்டுள்ளார்களாம்.