டூரிஸ்ட் ஃபேமிலி படத்தை பார்த்து மெர்சலாகி வியந்து பாராட்டிய பான் இந்தியா நடிகர்!

சசிகுமார், சிம்ரன் நடிப்பில் வெளியாகி பிளாக்பஸ்டர் ஹிட்டான டூரிஸ்ட் ஃபேமிலி திரைப்படத்தை ஓடிடியில் பார்த்த பிரபல பான் இந்தியா நடிகர் அப்படத்தை வியந்து பாராட்டி உள்ளார்.

Kichcha Sudeep praises Tourist Family : நல்ல சினிமாக்களை எடுத்தால் அது மொழிகளைக் கடந்து கொண்டாடப்படும் என்பதற்கு சிறந்த எடுத்துக்காட்டு தான் டூரிஸ்ட் பேமிலி திரைப்படம். இப்படத்தை அண்மையில் ராஜமெளலி பார்த்து பாராட்டி இருந்த நிலையில், தற்போது நடிகர் கிச்சா சுதீப்பும் அப்படத்தை பார்த்து பாராட்டு மழை பொழிந்துள்ளார். அபிஷன் ஜீவிந்த் இயக்கி நடித்த 'டூரிஸ்ட் ஃபேமிலி' திரைப்படத்தைப் பார்த்த சுதீப், அதன் கதைக்களம் மற்றும் உணர்வுப்பூர்வமான திரைக்கதைக்கு மனதைப் பறிகொடுத்ததாக, சமூக வலைதளத்தில் பதிவிட்டுள்ளார்.

டூரிஸ்ட் ஃபேமிலி படத்தை பாராட்டிய கிச்சா சுதீப்

தனது அதிகாரப்பூர்வ எக்ஸ் (X) கணக்கில் படம் குறித்து எழுதியுள்ள சுதீப், "'டூரிஸ்ட் ஃபேமிலி' படத்தைப் பார்த்தேன். சமீப காலத்தில் நான் பார்த்த சிறந்த படங்களில் இதுவும் ஒன்று என்று நான் சொல்லியே ஆக வேண்டும். படத்தில் வெளிப்படும் மென்மையான உணர்வுகள், அழகான கதை சொல்லல் மற்றும் எல்லாவற்றிற்கும் மேலாக இதுபோன்ற ஒரு நுட்பமான விஷயத்தைத் திரையில் கொண்டு வர இயக்குநர் காட்டிய துணிச்சல் உண்மையிலேயே பாராட்டுக்குரியது," என்று குறிப்பிட்டுள்ளார்.

இயக்கத்தை மட்டுமல்ல, படத்தின் ஒவ்வொரு அம்சத்தையும் சுதீப் பாராட்டியுள்ளார். "படத்தில் நடித்த ஒவ்வொரு நடிகரின் நடிப்பும் அற்புதமாக இருந்தது. இசை மற்றும் ஒளிப்பதிவு படத்தின் ஆன்மாவைப் பிடித்து வைத்திருக்கிறது. முழுப் படக்குழுவினருக்கும் எனது மனமார்ந்த வாழ்த்துகள். இயக்குநர் அபிஷன் ஜீவிந்த், நீங்கள் அருமையான வேலை செய்துள்ளீர்கள்," என்று கூறி முழுப் படக்குழுவினரையும் உற்சாகப்படுத்தியுள்ளார்.

'டூரிஸ்ட் ஃபேமிலி' படத்துக்கு அதிகரிக்கும் வரவேற்பு

'டூரிஸ்ட் ஃபேமிலி' ஒரு உணர்வுப்பூர்வமான படம். துக்கம், வலி, குடும்பப் பிணைப்பு மற்றும் மீட்சிப் பயணத்தை இப்படம் மிக நுட்பமாகக் கையாண்டுள்ளது. இப்படத்தில் சசிகுமார், சிம்ரன், எம்.எஸ்.பாஸ்கர் ஆகியோருடன் சேர்ந்து படத்தின் இயக்குநரான அபிஷன் ஜீவிந்தும் நடித்துள்ளார். பெரிய விளம்பரமின்றி வெளியான இப்படத்திற்கு, கிச்சா சுதீப் போன்ற பான்-இந்தியா நட்சத்திரத்திடமிருந்து பாராட்டு கிடைத்திருப்பது படக்குழுவினருக்கு மிகுந்த ஊக்கத்தை அளித்துள்ளது.

சுதீப்பின் இந்தப் பதிவிற்குப் பிறகு, 'டூரிஸ்ட் ஃபேமிலி' படம் குறித்தான எதிர்பார்ப்பு ரசிகர்கள் மத்தியில், குறிப்பாகக் கர்நாடகாவில் அதிகரித்துள்ளது. நல்ல கதை உள்ள படங்களுக்கு மொழி ஒரு தடையல்ல என்பதை மீண்டும் நிரூபித்துள்ள சுதீப்பின் இந்தச் செயல், சிறிய மற்றும் சுயாதீனப் படங்களுக்குக் கிடைக்கும் பெரிய ஆதரவிற்குச் சான்றாக அமைந்துள்ளது.