நடிகை ருக்மிணியின் காரில் இருந்து ரூ.27 லட்சம் மதிப்புள்ள நகைகள் திருட்டு

நடிகை ருக்மிணி விஜயகுமாரின் காரில் இருந்து ரூ.27 லட்சம் மதிப்புள்ள நகைகள் மற்றும் பொருட்கள் திருடப்பட்ட வழக்கில், பெங்களூரு டாக்ஸி ஓட்டுநர் கைது செய்யப்பட்டு, திருடப்பட்ட பொருட்கள் மீட்கப்பட்டுள்ளன.

நடிகை ருக்மிணி விஜயகுமாரின் காரில் இருந்து வைர மோதிரங்கள் உட்பட ரூ.27 லட்சம் மதிப்புள்ள பொருட்கள் திருடப்பட்ட வழக்கில், கப்பன் பார்க் காவல்துறையினர் முக்கிய குற்றவாளியை கைது செய்துள்ளனர். பெங்களூருவில் டாக்ஸி ஓட்டுநராக பணிபுரியும் முகமது மஸ்தான் என்பவரைக் கைது செய்து, அவரிடமிருந்து திருடப்பட்ட அனைத்துப் பொருட்களையும் காவல்துறையினர் மீட்டுள்ளனர்.

நடிகை ருக்மிணியின் திருடப்பட்ட பொருட்கள்:

நடிகை ருக்மிணி மே 11ஆம் தேதி காலை நடைப்பயிற்சிக்கு சென்றபோது இந்த சம்பவம் நிகழ்ந்துள்ளது. சின்னசாமி மைதானத்தின் 18ஆவது நுழைவாயில் அருகே ருக்மிணி தனது காரை நிறுத்தியிருந்தார். காரினுள் விலையுயர்ந்த கைப்பை, பணப்பை, இரண்டு வைர மோதிரங்கள், ரோலக்ஸ் கடிகாரம் உள்ளிட்ட பல விலைமதிப்பற்ற பொருட்களை வைத்திருந்தார். ஆனால், நடைப்பயிற்சிக்கு செல்லும்போது காரைப் பூட்ட மறந்துவிட்டார். இதைப் பயன்படுத்திக் கொண்ட அருகிலிருந்த டாக்ஸி ஓட்டுநர் மஸ்தான், காரினுள் இருந்த பொருட்களை திருடிச் சென்றுவிட்டார்.

இதையடுத்து, நடிகை ருக்மிணி கப்பன் பார்க் காவல் நிலையத்தில் புகார் அளித்தார். புகாரின் அடிப்படையில் வழக்குப் பதிவு செய்த காவல்துறையினர், சிசிடிவி காட்சிகள் மற்றும் பிற ஆதாரங்களின் அடிப்படையில் குற்றவாளியை கைது செய்தனர். சுமார் ரூ.23 லட்சம் மதிப்புள்ள பொருட்கள் மீட்கப்பட்டுள்ளன.

 நடிகை ருக்மிணியின் மீட்கப்பட்ட பொருட்கள்:

ரூ.1.5 லட்சம் மதிப்புள்ள பிராண்டட் கைப்பை

ரூ.75,000 மதிப்புள்ள டிசைனர் பணப்பை

ரூ.10 லட்சம் மதிப்புள்ள இரட்டை வைர மோதிரம்

ரூ.9 லட்சம் மதிப்புள்ள ரோலக்ஸ் கடிகாரம்

ரூ.3 லட்சம் மதிப்புள்ள மற்றொரு வைர மோதிரம்

கன்னட படமான 'பஜ்ரங்கி' படத்தில் கிருஷ்ணா என்ற கதாபாத்திரத்தில் நடித்ததன் மூலம் ருக்மிணி பிரபலமானார். நடனக் கலைஞரான இவர், கன்னடம் மட்டுமின்றி தமிழ், இந்தி உள்ளிட்ட பிற மொழிப் படங்களிலும் நடித்துள்ளார். பெங்களூருவில் காரை நிறுத்தியபோது இந்தச் சம்பவம் நிகழ்ந்ததால், அதிர்ச்சியடைந்த ருக்மிணிக்கு காவல்துறையினர் திருடப்பட்ட பொருட்களை மீட்டுத் தந்துள்ளனர்.

கைது செய்யப்பட்ட குற்றவாளி நீதிமன்றக் காவலில் வைக்கப்பட்டுள்ளார். தொடர்ந்து விசாரணை நடைபெற்று வருகிறது. பொது இடங்களில் எச்சரிக்கையாக இருக்க வேண்டும் என்றும், விலைமதிப்பற்ற பொருட்களை வீட்டிலேயே பாதுகாப்பாக வைத்திருக்க வேண்டும் என்றும் பொதுமக்கள் கருத்து தெரிவித்துள்ளனர்.