pushpa beats spiderman : ‘ஸ்பைடர்மேன்’ சாதனையை ஒரே நாளில் அடிச்சு தூக்கி அதகளம் பண்ணிய ‘புஷ்பா’

கொரோனா இரண்டாவது அலைக்கு பின் திரையரங்குகளில் வெளியான படங்களில் முதல் நாளில் அதிக வசூல் ஈட்டிய படம் என்கிற சாதனையை புஷ்பா (pushpa) படைத்துள்ளது.

பிரபல தெலுங்கு இயக்குனர் சுகுமார் இயக்கத்தில், அல்லு அர்ஜுன் (Allu Arjun) நடித்துள்ள படம் 'புஷ்பா'. இந்த படத்தில் அல்லு அர்ஜுனுக்கு ஜோடியாக நடிகை ராஷ்மிகா மந்தனா நடித்துள்ளார். இப்படம் முழுக்க முழுக்க செம்மரக்கடத்தலை மையமாக வைத்தும்...  அவர்களுடைய வாழ்க்கையை எடுத்துக் கூறும் வகையிலும் எடுக்கப்பட்டுள்ளது.  

இப்படத்தில் அல்லு அர்ஜுன் (Allu Arjun) லாரி டிரைவராகவும், மரம் கடத்துபவராகவும் இதுவரை நடித்திராத வித்தியாசமான கதாபாத்திரத்தில் நடித்துள்ளார். மேலும் பிரபல மலையாள நடிகர் பகத் பாசில் மிரட்டல் வில்லனாக போலீஸ் அதிகாரி வேடத்தில் நடித்துள்ளார். இதுதவிர ஜெகபதி பாபு, பிரகாஷ்ராஜ், ஹரிஷ் உத்தமன், கிஷோர் உள்ளிட்ட பலர் முக்கிய கதாபாத்திரங்களில் நடித்துள்ளனர். 

இரண்டு பாகமாக தயாராகி வரும் இப்படத்தின் முதல் பாகம் தமிழ், தெலுங்கு, மலையாளம், கன்னடம், இந்தி ஆகிய ஐந்து மொழிகளில் நேற்று வெளியானது. இப்படம் விமர்சன ரீதியாக கலவையான விமர்சனங்களை பெற்று வந்தாலும், பாக்ஸ் ஆபீஸில் பட்டையைக் கிளப்பி வருவதாக கூறப்படுகிறது.

அதன்படி இந்த ஆண்டு கொரோனா இரண்டாவது அலைக்கு பின் திரையரங்குகளில் வெளியான படங்களில் முதல் நாளில் அதிக வசூல் ஈட்டிய படம் என்கிற சாதனையை புஷ்பா படைத்துள்ளது. இதற்கு முன் தீபாவளிக்கு வெளியான அக்‌ஷய் குமாரின் சூர்யவம்ஷி படம் முதல் நாளில் ரூ.26.29 கோடி வசூலித்ததே சாதனையாக இருந்தது.

இந்த சாதனையை கடந்த 16-ந் தேதி வெளியான ஸ்பைடர் மேன் நோ வே ஹோம் (spiderman no way home) திரைப்படம் முதல் நாளில் ரூ.32.67 கோடி வசூல் செய்து முறியடித்திருந்தது. இந்நிலையில், நேற்று வெளியான புஷ்பா திரைப்படம் முதல் நாளில் 40 கோடி ரூபாய்க்கு மேல் வசூலித்து கொரோனா இரண்டாவது அலைக்கு பின் வெளியான படங்களில் முதல் நாளில் அதிக வசூல் ஈட்டிய படம் என்ற சாதனையை படைத்துள்ளது.