அஜித்தின் வலிமை படத்தை பார்க்க திரையுலக பிரபலங்களும் ஆர்வம் காட்டி வருகின்றனர். அந்த வகையில் வலிமை படத்தின் முதல் காட்சியை அஜித் ரசிகர்களோடு அமர்ந்து நடிகர் அருண் விஜய் பார்த்துள்ளார்.
நடிகர் அஜித் - எச்.வினோத் கூட்டணியில் கடந்த 2019-ம் ஆண்டு வெளியான நேர்கொண்ட பார்வை திரைப்படம் மாபெரும் வரவேற்பை பெற்ற நிலையில், அதே கூட்டணியில் தற்போது 2.5 ஆண்டுகள் கழித்து மாஸாக வெளியாகி உள்ள திரைப்படம் வலிமை (Valimai). அஜித் போலீஸ் அதிகாரியாக நடித்துள்ள இப்படத்தை போனி கபூர் தயாரித்துள்ளார்.
இரண்டு ஆண்டுகள் கடின உழைப்புக்கு பின் இன்று உலகமெங்கும் வலிமை திரைப்படம் ரிலீசாகி உள்ளது. இது தமிழ், தெலுங்கு, இந்தி, கன்னடம் என 4 மொழிகளில் வெளியாகி உள்ளது. இன்று காலை 4 மணிக்கு வலிமை (Valimai Movie) படத்தின் முதல் காட்சி திரையிடப்பட்டது. ரசிகர்கள் ஆரவாரத்தோடு இப்படத்தை கொண்டாடி வருகின்றனர்.
இந்நிலையில், அஜித்தின் வலிமை படத்தை பார்க்க திரையுலக பிரபலங்களும் ஆர்வம் காட்டி வருகின்றனர். அந்த வகையில் வலிமை படத்தின் முதல் காட்சியை அஜித் ரசிகர்களோடு அமர்ந்து நடிகர் அருண் விஜய் (Arun Vijay) பார்த்துள்ளார். சென்னையில் உள்ள காசி தியேட்டரில் அவர் வலிமை படத்தை கண்டுகளித்தார்.
கவுதம் மேனன் இயக்கிய என்னை அறிந்தால் படத்தில் அஜித்துக்கு வில்லனாக நடித்திருந்த அருண் விஜய், தற்போது அவரது ரசிகனாக வந்து வலிமை படத்தின் முதல் காட்சியை பார்த்துள்ளார். அவர் திரையரங்கில் ரசிகர்களோடு அமர்ந்து வலிமை படத்தை பார்த்தபோது எடுத்த புகைப்படங்கள் வெளியாகி வைரலாகி வருகின்றன.