கேஸ் ஏஜென்சியில் இருந்து பேசுவதாகச் சொல்லி ஏமாற்றும் கும்பல்! உஷார் மக்களே.. தப்பிப்பது எப்படி?

LPG Cylinder கேஸ் சிலிண்டர் வாடிக்கையாளர்களைக் குறிவைக்கும் புதிய வாட்ஸ்அப் மோசடி! பணத்தை இழக்காமல் இருக்க இந்த பாதுகாப்பு டிப்ஸ்களைப் படியுங்கள்.தப்பிப்பது எப்படி?

இந்தியாவில் டிஜிட்டல் பரிவர்த்தனைகள் அதிகரித்து வரும் நிலையில், அதற்கேற்ப மோசடி கும்பல்களின் கைவரிசையும் புதுப்புது வடிவங்களை எடுத்து வருகிறது. தற்போது சமையல் எரிவாயு (LPG Cylinder) வாடிக்கையாளர்களைக் குறிவைத்து ஒரு புதிய மோசடி அரங்கேறி வருகிறது. வாட்ஸ்அப் (WhatsApp) மற்றும் எஸ்எம்எஸ் (SMS) மூலம் வாடிக்கையாளர்களைத் தொடர்பு கொள்ளும் மோசடியாளர்கள், உங்களின் வங்கிக் கணக்கை காலி செய்யக் காத்திருக்கிறார்கள்.

சமீபகாலமாகப் பல வாடிக்கையாளர்களுக்கு "உங்களது கேஸ் கனெக்ஷன் துண்டிக்கப்பட உள்ளது" அல்லது "சிலிண்டர் விலையில் தள்ளுபடி பெற இந்த லிங்க்கை கிளிக் செய்யவும்" எனத் தூண்டில் போடும் செய்திகள் வருகின்றன. இதை நம்பி லிங்க்கை கிளிக் செய்பவர்கள் மிகப்பெரிய நிதி இழப்பைச் சந்திக்க நேரிடுகிறது.

மோசடியாளர்களின் தந்திரம்: எப்படி ஏமாற்றுகிறார்கள்?

இந்த மோசடி கும்பல் பெரும்பாலும் அதிகாரப்பூர்வ கேஸ் ஏஜென்சி போலத் தங்களை அடையாளப்படுத்திக் கொள்கிறது. அவர்கள் அனுப்பும் செய்தியில் ஒரு போலி லிங்க் (Fake Link) இருக்கும். அதை கிளிக் செய்தவுடன், உங்களது பெயர், முகவரி மற்றும் வங்கிக் கணக்கு விவரங்களைக் கேட்கும் ஒரு பக்கம் திறக்கும்.

சில நேரங்களில், "மின்சாரக் கட்டணம் அல்லது கேஸ் பில் நிலுவையில் உள்ளது, உடனே ஒரு செயலியை (App) தரவிறக்கம் செய்து ₹10 செலுத்தி அப்டேட் செய்யுங்கள்" என ஆசை காட்டுவார்கள். நீங்கள் பதிவிறக்கம் செய்யும் அந்தச் செயலி, உங்களது போனை அவர்களின் கட்டுப்பாட்டிற்குள் கொண்டு சென்று, ஓடிபி (OTP) உள்ளிட்ட ரகசிய விவரங்களைத் திருடிவிடும்.

பாதுகாப்பாக இருப்பது எப்படி? இதோ சில வழிமுறைகள்!

• அதிகாரப்பூர்வ செயலிகளை மட்டும் பயன்படுத்துங்கள்: சிலிண்டர் முன்பதிவு செய்ய பாரத் கேஸ், இண்டேன் அல்லது ஹெச்பி கேஸ் நிறுவனங்களின் அதிகாரப்பூர்வ செயலிகளை (Apps) மட்டுமே பயன்படுத்துங்கள்.

• சந்தேகத்திற்குரிய லிங்க்குகளைத் தவிர்க்கவும்: தெரியாத எண்களில் இருந்து வரும் வாட்ஸ்அப் செய்திகளையோ அல்லது அதில் உள்ள லிங்க்குகளையோ ஒருபோதும் கிளிக் செய்யாதீர்கள்.

• தனிப்பட்ட விவரங்களைப் பகிர வேண்டாம்: கேஸ் ஏஜென்சியில் இருந்து பேசுவதாகக் கூறினாலும், உங்களது ஓடிபி (OTP) அல்லது வங்கி விவரங்களை யாரிடமும் பகிர வேண்டாம். எந்தவொரு நிறுவனமும் தொலைபேசியில் ஓடிபி கேட்காது.

• அதிகாரப்பூர்வ இணையதளம்: ஏதேனும் சந்தேகம் இருந்தால், அந்தந்த நிறுவனத்தின் அதிகாரப்பூர்வ இணையதளத்திற்குச் சென்று சரிபார்க்கவும் அல்லது உங்கள் ஏஜென்சியை நேரடியாகத் தொடர்பு கொள்ளவும்.

மோசடி நடந்தால் என்ன செய்ய வேண்டும்?

ஒருவேளை நீங்கள் இத்தகைய மோசடியில் சிக்கி பணத்தை இழந்திருந்தால், காலதாமதம் செய்யாமல் உடனடியாக 1930 என்ற சைபர் கிரைம் உதவி எண்ணைத் தொடர்பு கொண்டு புகார் அளிக்கலாம். மேலும், www.cybercrime.gov.in என்ற இணையதளத்திலும் உங்களது புகாரைப் பதிவு செய்யலாம். விழிப்புணர்வு ஒன்றே உங்களது கடின உழைப்பின் மூலம் ஈட்டிய பணத்தைப் பாதுகாக்கும் ஒரே வழி.