உலகமே இந்தியாவைத் திரும்பிப் பார்க்கும் தருணம்.. 100 நாடுகள், 400 நிறுவனங்கள் - பிரம்மாண்ட AI மாநாடு!

India AI Impact இந்தியா AI இம்பாக்ட் எக்ஸ்போ 2026-ல் என்விடியா, கூகுள், ஓபன்ஏஐ பங்கேற்பு. பிப்ரவரி 16-20 வரை டெல்லியில் நடைபெறும் பிரம்மாண்ட AI கண்காட்சி. முழு விவரம்.

செயற்கை நுண்ணறிவு (AI) துறையில் இந்தியா ஒரு புதிய மைல்கல்லை எட்டவுள்ளது. புது டெல்லியில் நடைபெறவுள்ள 'இந்தியா AI இம்பாக்ட் எக்ஸ்போ 2026' (India AI Impact Expo 2026) கண்காட்சியில் உலகின் முன்னணி தொழில்நுட்ப ஜாம்பவான்கள் பங்கேற்க உள்ளனர்.

யாரெல்லாம் பங்கேற்கிறார்கள்?

இந்த பிரம்மாண்ட கண்காட்சியில் என்விடியா (NVIDIA), கூகுள் (Google), ஓபன்ஏஐ (OpenAI) போன்ற உலகின் தலைசிறந்த AI நிறுவனங்கள் உட்பட 400-க்கும் மேற்பட்ட நிறுவனங்கள் தங்கள் அரங்குகளை அமைக்கின்றன. இந்த நிறுவனங்களின் உயர் அதிகாரிகளும் இதில் கலந்து கொண்டு, இந்திய நிறுவனங்களுடன் முக்கிய ஆலோசனைகளை நடத்தவுள்ளனர்.

எப்போது? எங்கே?

பிப்ரவரி 16 முதல் 20 வரை டெல்லியில் உள்ள பிரகதி மைதானத்தில் (Pragati Maidan) இந்த கண்காட்சி நடைபெறவுள்ளது. சுமார் 75,000 சதுர மீட்டர் பரப்பளவில் பிரம்மாண்டமாக நடைபெறவுள்ள இந்த நிகழ்வில், 100-க்கும் மேற்பட்ட நாடுகளின் பிரதிநிதிகள் பங்கேற்கின்றனர்.

நோக்கம் என்ன?

மென்பொருள் தொழில்நுட்ப பூங்காக்களின் (STPI) இயக்குநர் அரவிந்த் குமார் கூறுகையில், "இந்த எக்ஸ்போ AI சுற்றுச்சூழல் அமைப்பில் உள்ளவர்களுக்கு ஒரு பாலமாக அமையும். இந்திய கண்டுபிடிப்பாளர்கள் தங்கள் திறமையை உலகிற்கு எடுத்துரைக்க இது ஒரு சிறந்த வாய்ப்பாகும்," என்றார். ஸ்டார்ட்-அப் நிறுவனங்களை முதலீட்டாளர்களுடன் இணைக்கவும் இது உதவும்.

மூன்று முக்கிய தூண்கள்

இந்த உச்சிமாநாடு 'மக்கள்' (People), 'பூமி' (Planet), மற்றும் 'முன்னேற்றம்' (Progress) ஆகிய மூன்று முக்கியக் கருத்துகளை மையமாகக் கொண்டு நடைபெறவுள்ளது. வேலைவாய்ப்பு, திறன் மேம்பாடு, நிலையான வளர்ச்சி மற்றும் எரிசக்தி திறன் கொண்ட AI குறித்து விவாதங்கள் நடைபெறும்.