கூகுள் டிரான்ஸ்லேட் அப்டேட்! 70 மொழிகளில் உடனுக்குடன் மொழிபெயர்ப்பு!

கூகுள் டிரான்ஸ்லேட் செயலியில், 70+ மொழிகளில் இருவழி உரையாடல் மொழிபெயர்ப்பு மற்றும் மொழிப் பயிற்சி ஆகிய இரண்டு புதிய அம்சங்கள் அறிமுகம். ஜெமினி தொழில்நுட்பத்தால் இயக்கப்படும் இந்த அம்சங்கள், மொழிபெயர்ப்பு மற்றும் மொழி கற்றலை மேம்படுத்துகின்றன.

தொழில்நுட்ப ஜாம்பவானான கூகுள், தனது கூகுள் டிரான்ஸ்லேட் (Google Translate) செயலியில் இரண்டு புதிய அம்சங்களை அறிமுகப்படுத்தியுள்ளது. இந்த அம்சங்கள், உரையாடல்களை உடனுக்குடன் மொழிபெயர்ப்பதற்கும், மொழிப் பயிற்சியை வழங்குவதற்கும் உதவுகின்றன.

கூகுள் நிறுவனம் தனது ஜெமினி (Gemini) மாதிரிகளின் மேம்பட்ட திறன்களைப் பயன்படுத்தி, இந்த இரண்டு புதிய அம்சங்களையும் மொழிபெயர்ப்பு மற்றும் மொழி கற்றலுக்கு உதவியாக கொண்டு வந்துள்ளதாக அறிவித்துள்ளது.

இருவழி உரையாடல் மொழிபெயர்ப்பு

புதிய அப்டேட் செய்யப்பட்ட கூகுள் டிரான்ஸ்லேட் செயலி, 70-க்கும் மேற்பட்ட மொழிகளில், அரபு, பிரஞ்சு, இந்தி, கொரியன், ஸ்பானிஷ் மற்றும் தமிழ் உட்பட, ஆடியோ மற்றும் திரையில் மொழிபெயர்ப்பு என இருவழி உரையாடல்களுக்கு ஆதரவு அளிக்கிறது.

இதை பயன்படுத்த, ஆண்ட்ராய்டு அல்லது iOS சாதனங்களில் உள்ள டிரான்ஸ்லேட் செயலியைத் திறந்து, "Live translate" என்பதைத் தேர்ந்தெடுத்து, நீங்கள் மொழிபெயர்க்க விரும்பும் மொழிகளைத் தேர்வு செய்து பேசத் தொடங்கலாம். அப்போது, நீங்கள் பேசும் மொழியும், மொழிபெயர்க்கப்பட்ட மொழியும் உங்கள் சாதனத்தின் திரையில் எழுத்து வடிவிலும், ஆடியோ வடிவிலும் காண்பிக்கப்படும்.

இந்த புதிய வசதி, அமெரிக்கா, இந்தியா மற்றும் மெக்சிகோ ஆகிய நாடுகளில் உள்ள பயனர்களுக்கு உடனடியாகக் கிடைக்கிறது. இது, இரைச்சல் நிறைந்த சூழல்களிலும் தெளிவாக குரலை அடையாளம் காணும் திறன் கொண்டது. உதாரணமாக, விமான நிலையங்கள் அல்லது சத்தமான கஃபேக்களில் கூட இந்த அம்சம் துல்லியமாகச் செயல்படும் என்று கூகுள் தெரிவித்துள்ளது.

மொழிப் பயிற்சி அம்சம் (Beta)

மேலும், இந்த வாரம் ஒரு புதிய பீட்டா மொழிப் பயிற்சி அம்சமும் அறிமுகப்படுத்தப்படவுள்ளது. இது, ஆங்கிலம் பேசுபவர்கள் ஸ்பானிஷ் மற்றும் பிரஞ்சு மொழிகளைக் கற்றுக்கொள்ளவும், ஸ்பானிஷ், பிரஞ்சு மற்றும் போர்த்துகீசியம் பேசுபவர்கள் ஆங்கிலம் கற்றுக்கொள்ளவும் உதவும்.

இந்த அம்சத்தைப் பயன்படுத்த, செயலியில் "Practice" என்பதைத் தேர்ந்தெடுத்து, உங்கள் திறமையின் அளவையும் இலக்குகளையும் நிர்ணயிக்க வேண்டும். அதற்கேற்ப, தனிப்பயனாக்கப்பட்ட பயிற்சிகளை ஜெமினி உருவாக்கும். பயனர்கள் உரையாடல்களைக் கேட்டு, கேட்கும் வார்த்தைகளைத் தட்டிப் புரிந்துகொள்ளலாம் அல்லது உதவிக்குறிப்புகளுடன் பேசப் பயிற்சி செய்யலாம். இந்த ஊடாடும் பயிற்சிகள் பயனர்களின் திறமைக்கு ஏற்ப தானாகவே மாறும் வகையில் வடிவமைக்கப்பட்டுள்ளன.

இந்த புதிய அம்சங்கள், மொழி தடைகளைத் தாண்டி மக்கள் எளிதாக ஒருவருக்கொருவர் தொடர்பு கொள்ள உதவும் என்று கூகுள் நம்புகிறது.