"இனி கூகுள் சர்ச் தேவையில்லை.." குரோம் பிரவுசரில் வரும் அதிரடி AI மாற்றம்! படம் வரைவது முதல் பாடம் படிப்பது வரை ஈஸி!

Google Chrome கூகுள் குரோம் பிரவுசரில் நேரடியாக AI வசதி வருகிறது. இனி சர்ச் செய்யாமலே படம் வரையலாம், டேப்களை சுருக்கி படிக்கலாம். முழு விவரம் உள்ளே.

கூகுள் நிறுவனம் தனது குரோம் (Chrome) பிரவுசரை அடுத்த கட்டத்திற்கு எடுத்துச் செல்லத் தயாராகிவிட்டது. இனி ஒவ்வொரு முறையும் எதையாவது தேட வேண்டும் என்றால், கூகுள் சர்ச் பக்கத்திற்குச் செல்ல வேண்டிய அவசியமில்லை. குரோம் பிரவுசருக்கு உள்ளேயே முழுமையான செயற்கை நுண்ணறிவு (AI) வசதியை ஒருங்கிணைக்கும் பணியில் கூகுள் இறங்கியுள்ளது.

புதிய "Contextual Tasks" இன்டர்ஃபேஸ்

சமீபத்தில் வெளியான குரோம் கேனரி (Chrome Canary) சோதனையில் இந்த புதிய வசதி கண்டறியப்பட்டுள்ளது. இதற்கு 'Contextual Tasks' என்று பெயரிடப்பட்டுள்ளது. இதன் முக்கியச் சிறப்பம்சம் என்னவென்றால், இது கூகுள் சர்ச் உதவியின்றி பிரவுசருக்கு உள்ளேயே தனித்து இயங்கும். பயனர்கள் ஒரே விண்டோவில் கேள்விகளைக் கேட்கலாம், பிடிஎஃப் (PDF) பைல்கள் அல்லது படங்களை அப்லோட் செய்து சந்தேகங்களைக் கேட்கலாம்.

டேப்களை மாற்றாமலே "சம்மரி" பார்க்கலாம்!

இணையத்தில் பல டேப்களை (Tabs) திறந்து வைத்துக்கொண்டு படிக்கும் பழக்கம் உள்ளவர்களுக்கு இது ஒரு வரப்பிரசாதம். நீங்கள் படித்துக்கொண்டிருக்கும் ஒரு பக்கத்தை விட்டு வெளியேறாமலே அல்லது வேறு பக்கத்திற்கு மாறாமலே, அந்தப் பக்கத்தில் உள்ள விஷயங்களைச் சுருக்கமாக (Summarise) எடுத்துத் தருமாறு இந்த AI-யிடம் கேட்கலாம். பெர்ஃப்ளெக்சிட்டி (Perplexity) மற்றும் சாட்ஜிபிடி போன்ற செயலிகளில் இருக்கும் இந்த வசதி இனி குரோமிலும் வரவுள்ளது.

குரோமுக்குள்ளேயே ஓவியம் வரையலாம்

இந்த நேட்டிவ் AI மோட் (Native AI Mode) மூலம் படங்களையும் உருவாக்க முடியும் என்று கூறப்படுகிறது. கூகுளின் அட்வான்ஸ்டு AI மாடல்களைப் பயன்படுத்தி, பயனர்கள் கேட்கும் படங்களை அது நொடிப்பொழுதில் வரைந்து கொடுக்கும். இதற்குத் தனியாக எடிட்டிங் ஆப்களோ அல்லது வேறு இணையதளங்களோ தேவைப்படாது. கூகுள் AI ப்ரோ போன்ற சந்தா வைத்திருப்பவர்களுக்கு இன்னும் துல்லியமான மற்றும் உயர்தரமான படங்கள் கிடைக்கும் வாய்ப்புள்ளது.

எப்போது பயன்பாட்டுக்கு வரும்?

தற்போது இந்த வசதி ஆரம்பக்கட்ட சோதனையில் (Early Development) மட்டுமே உள்ளது. சோதனையின் போது சில இடங்களில் முழுமையடையாத டெக்ஸ்ட்கள் (Placeholder text) காணப்படுவதாகக் கூறப்படுகிறது. எனவே, இது முழுமையாக உருவாக்கப்பட்டு, சாதாரணப் பயனர்களின் கைகளுக்குக் கிடைக்கச் இன்னும் சில மாதங்கள் ஆகலாம். ஆனால், இது வந்தால் பிரவுசிங் அனுபவம் முற்றிலுமாக மாறிவிடும் என்பதில் சந்தேகமில்லை